يتاليانىڭ گەنۋيا قالاسىنداعى كارلو فەليچە تەاترىندا «ترۋبادۋر» قويىلىمى 2019-2020 جىلعا ارنالعان وپەرا جانە بالەت ماۋسىمىن اشتى. ءدال وسى قويىلىم 1991 جىلى 18 قازاندا تولىقتاي قالىپقا كەلتىرىلگەن جاڭا كارلو فەليچە تەاترىندا دا العاشقى ماۋسىمدى اشىپ، قوناقتار قابىلداعان ەدى. گەنۋيا جۇرتشىلىعى ءۇشىن «ترۋبادۋر» - جاندانۋدىڭ نىشانى.

مىنە اراعا 28 جىل سالىپ، تانىمال ۆەرديانا تريلوگياسى (لا تراۆياتا، ريگولەتتو، ترۋبادۋر) قازاق عىلىمي-زەرتتەۋ مادەنيەت ينستيتۋتى وتكەن جىلى تاڭداعان، قازاقستاننىڭ ەڭ ۇزدىك 50 سۋرەتشىسىنىڭ قاتارىنا ەنگەن وتانداستارىمىزدىڭ قاتىسۋىمەن تىپتەن قۇلپىرا ءتۇستى.

«ءبىزدىڭ باستى ماقساتىمىز ايگىلى ليبرەتتونىڭ وپەرا رۋحىن، اتموسفەراسىن جەتكىزۋ بولدى. ەڭ الدىمەن، ءبىز كومپوزيتور ۆەرديدىڭ ءوز شىعارماسىندا ايتقىسى كەلگەنىن ءتۇيسىنىپ، پاش ەتكىمىز كەلدى. قازان ايىندا بىزدە تاعى دا ۆەرديدىڭ «دون كارلوس» وپەراسى بولدى. بۇل جۇمىس وسىلايشا «ترۋبادۋرعا» جالعاستى. ءسويتىپ، بىزدە ۆەرديدىڭ وپەرالىق كۇيىنەن شىعۋعا ءتىپتى ۋاقىت تا بولمادى»، - دەدى ساحنا ديزاينەرى جانە كوستيۋمدەر بويىنشا سۋرتەشى سوفيا تاسماعامبەتوۆا.

سوفيا ءۇشىن بۇل يتالياداعى العاشقى قويىلىم جۇمىسى. سۋرەتشى گەنۋيادا بولعانىنا وتە قۋانىشتى ەكەنىن جاسىرمايدى. ول دايىندىق پروتسەسىنىڭ كۇردەلىلىگى رەجيسسەرگە بايلانىستى ەكەنىن، قويىلىمعا ۆەرديدىڭ بارلىق دەرلىك شىعارمالارىمەن تانىس مارينا بيانكي قاتىسقاندىقتان  جۇمىس ىستەۋ جەڭىل بولعانىن ايتادى.

«تەاتردا ارنايى جابدىق – اينالاتىن شەڭبەر بار. ۇستىندە دەكوراتسيا قويىلعان، بۇل دەكوراتسيا سپەكتاكل بويىنشا اينالادى. ساحنا وزگەرىسى كورەرمەننىڭ كوز الدىندا جۇزەگە اسادى، بۇل ءدال وسى وپەرا ءۇشىن وتە ماڭىزدى، ويتكەنى كىدىرتۋ مۇمكىن ەمەس. ول ءۇشىن جاي مۋزىكا جوق. سول سەبەپتى ءبىز ءدال وسىنداي ءتاسىلدى تاڭدادىق»، - دەپ ءوز قۇپياسىمەن ءبولىستى ساحنا بەزەندىرۋشى، كوستيۋمدەر بويىنشا سۋرتەشى پاۆەل دراگۋنوۆ.

سوفيا تاسماعامبەتوۆا مەن پاۆەل دراگۋنوۆ ۇزاق ۋاقىتتان بەرى وزدەرىنىڭ جەكە شىعارماشىلىق تاندەمىن قۇرىپ، دەكوراتسيادان باستاپ كوستيۋمدەرگە دەيىن سپەكتاكلدەردىڭ تولىق ساحنالىق ديزاينىن جاسايدى. پاۆەل ەرلەر كوستيۋمدەرىن ازىرلەسە، سوفيا – ايەلدەردىڭ كيىمىن دايىندايدى. شىعارمانىڭ مازمۇنىمەن تانىسقاننان كەيىن ستسەنوگرافتار ەسكيزدەر، رەكۆيزيت، بۋتافوريا، كوستيۋمدەر ازىرلەۋگە كىرىسىپ، ءار كەيىپكەردىڭ سيپاتىنا قاراي اكسەسسۋارلارىن جەكە-جەكە تاپتىشتەپ سۋرەتىن سالىپ، دايىندايدى.

«ساحنا جاي عانا كىسى نانعىسىز. ۇيلەسىمدى دەكوراتسيانىڭ اينالۋى، بارلىق قۇرال-جابدىقتار مەن جارىقتىڭ وزگەرۋى، وپەرانىڭ ءوزى، مۋزىكا قاراپايىم ەمەس. ماعان شىنىمەن دە قاتتى ۇنادى»، - دەيدى قويىلىمنان كەيىن كورەرمەن كارلو باربيەري.

گەنۋياداعى باستى وپەرا تەاترى كارلو فەليچەدەگى «ترۋبادۋر» قويىلىمىنا 2000 ورىنعا تۇگەل كورەرمەن لىق تولدى. كارلو-فەليچە تەاترى - يتالياداعى ءىرى وپەرا ءۇيى، ول وپەرا مەن بالەت سپەكتاكلدەرىن دە، اۋقىمدى كونتسەرتتەردى دە قابىلدايدى. عيماراتتىڭ العاشقى تاسى 1826 جىلى ناۋرىزدا قالانعان.

Abai.kz