«الاتاۋ» ءداستۇرلى ونەر تەاترىنىڭ XI ماۋسىمى كورەرمەنگە «قورلان» دراماسىن ۇسىندى. ارۋحان تەمىربەكقىزى رەجيسسەرلىك ەتكەن قويىلىمنىڭ وزەگىندە بەلگىلى ءانشى، اقىن ەستاي مەن اڭىزعا اينالعان قورلان اراسىنداعى كىرشىكسىز ماحاببات جاتىر. الايدا ساحناداعى بۇل سەزىم حيكاياسى ەكى ادامنىڭ تاعدىرىمەن عانا شەكتەلمەيدى. قويىلىمعا تەرەڭىرەك ۇڭىلگەن سايىن جەكە ادامنىڭ قاسىرەتىنەن حالىقتىڭ تاعدىرىن، ءبىر ايەلدىڭ كوز جاسىنان تۇتاس ءداۋىردىڭ شەرىن كورۋگە بولادى.

«قورلان» دەسە، ەڭ الدىمەن ەستايدىڭ ءانى ەسكە تۇسەدى. بۇل ءاننىڭ وزىندە ءبىر ءداۋىردىڭ مۇڭى، ءبىر حالىقتىڭ جۇرەك ءسوزى، ادام بالاسىنا ورتاق ۇلى سەزىمنىڭ تابى بار.

قازاقستاننىڭ حالىق ءارتىسى، دوسحان جولجاقسىنوۆتىڭ پايىمداۋىنشا، ۇلتتىق دۇنيەنى ساحناعا شىعارعاندا ونىڭ تابيعاتىن جوعالتپاۋ اسا ماڭىزدى.

«مەن ءوز باسىم ۇلتتىق دۇنيەلەردى بۇگىنگى زاماننىڭ ساحنالىق شەشىمدەرىنە وپ-وڭاي قيا سالاتىن ادام ەمەسپىن. ويتكەنى ۇلتتىق ونەردىڭ ءوز بولمىسى، ءوز مىنەزى، ءوز كيەسى بار. ونى زاماناۋي فورماعا سالامىن دەپ تابيعاتىنان اجىراتىپ الۋعا بولمايدى. بىراق ورنى تابىلعان، قيسىنى كەلگەن دۇنيە كوكىرەگىڭنەن وزىنە ورىن الىپ، كەيىن جەمىسىن بەرە باستايدى»، - دەيدى ونەر قايراتكەرى.

ونىڭ ايتۋىنشا، «قورلاندا» رەجيسسەرلىك شەشىمنىڭ اسىرەسە سپەكتاكلدىڭ باستالۋى مەن اياقتالۋىندا ۇلكەن ماعىنالىق جۇك بار.

«قازاق قىزىنىڭ ۇزاتىلۋى، قىزىل كيىم، ساۋكەلە - مۇنىڭ ءبارى حالقىمىزدىڭ عاسىرلار بويعى تانىمىمەن استاسىپ جاتىر. قازاقتا قىزدى ۇزاتقاندا قىزىلعا كيىندىرگەن. ساۋكەلە دە سول سالتاناتتىڭ ءبىر بەلگىسى. ال سپەكتاكلدەگى اق ساۋكەلە مەن ونىڭ ساحنالىق ماعىناسى ماعان وزگەشە اسەر ەتتى. ونى مەن و دۇنيەلىك ەلەستەي، بۇل دۇنيەدەن تىس ءبىر جالعان دۇنيەلىك بۇيىمداي قابىلدادىم. بۇل - رەجيسسەردىڭ ءساتتى تاپقان شەشىمدەرىنىڭ ءبىرى»، - دەيدى دوسحان جولجاقسىنوۆ.

شىنىندا دا، قويىلىمدا ءاربىر دەتالدىڭ وزىندىك ءتىلى بار. قورلان - ءبىر ادامنىڭ اتى بولعانىمەن، ساحنادا ول ءبىر عانا ايەل بولىپ قالمايدى. ول - مىڭداعان انانىڭ، جاردىڭ، قىزدىڭ ءۇنىن ارقالاعان بەينە. ونىڭ تاعدىرىنان اشتىقتىڭ زارى، قۋعىن-سۇرگىننىڭ اششى تابى، سوعىستىڭ قارالى كولەڭكەسى سەزىلەدى. بىراق قورلاننىڭ باستى ەرەكشەلىگى - ونىڭ سىنباۋىندا. جانى جارالانسا دا، رۋحى مۇقالمايدى.

وسى تۇرعىدان العاندا قورلان بەينەسى قازاق ايەلىنىڭ نازىكتىگى مەن قايسارلىعىن ءبىر بويىنا جيناعان تۇلعا رەتىندە كورىنەدى.

ءبىرىنشى قۇرامدا قورلان ءرولىن سومداعان گۇلنافيس سالىققىزى دا كەيىپكەردىڭ كۇشىن ونىڭ سىرتقى بولمىسىنان ەمەس، ىشكى الەمىنەن ىزدەگەنىن ايتادى.

«مەن ءۇشىن باتىرلىق - سىرتقى كەسكىن-كەلبەتپەن ولشەنەتىن قاسيەت ەمەس. باتىرلىق ادامنىڭ ىشكى جان دۇنيەسىندە، جۇرەگىنىڭ بەرىكتىگىندە، تاعدىردىڭ سىنىنا قارسى تۇرا بىلەتىن سابىرىندا جاتىر. سوندىقتان مەن قورلاندى دا ەڭ الدىمەن سىرتقى بولمىسىمەن ەمەس، ىشكى قۋاتىمەن كوردىم»، - دەيدى اكتريسا.

گۇلنافيس سالىققىزىنىڭ قورلانى نازىكتىگىن جاسىرعان، ەركىندىكتى سۇيەتىن، ءور مىنەزدى قىز رەتىندە كورىنەدى. ونىڭ ۇستىندەگى شالبار، بوزبالاعا ۇقساس ءجۇرىسى مەن ەركىن قىلىعى دا وسى مىنەزدىڭ ساحنالىق بەلگىسىنە اينالعان.

اكتريسا قورلاندى ەر ادامعا ۇقساتۋ ارقىلى قايسار ەتۋدى ماقسات ەتپەگەنىن ەرەكشە اتاپ وتەدى.

«مەن انامىن. سوندىقتان قورلاندى ساحنادا ەر ادامعا ۇقساتقىم كەلگەن جوق. قايتا ايەل قالپىن ساقتاي وتىرىپ، ايەلدىڭ بويىنداعى قايسارلىقتى كورسەتكىم كەلدى. سەبەبى مىقتى بولۋ ءۇشىن ايەل ءوز نازىكتىگىنەن باس تارتۋى شارت ەمەس. نازىكتىك پەن بەرىكتىك ءبىر-بىرىنە قاراما-قايشى قاسيەت ەمەس. كەرىسىنشە، كەيدە ايەلدىڭ ەڭ ۇلكەن كۇشى - ونىڭ نازىكتىگىندە، سابىرىندا، ءۇنسىز كوتەرگەن اۋىرلىعىندا جاتادى»، - دەيدى ول.

بۇل وي سپەكتاكلدىڭ جالپى تابيعاتىمەن دە ۇندەسەدى. قورلاننىڭ تاعدىرعا كونۋى - رۋحاني جەڭىلىس ەمەس. ول اۋىرتپالىقتى ايقايمەن ەمەس، سابىرمەن كوتەرەدى. ونىڭ ۇنسىزدىگى السىزدىككە ەمەس، ىشكى بەرىكتىككە اينالادى.

«مەن قورلاندى ويناعان جوقپىن دەسەم دە بولادى. مەن وعان ءوز ىشىمدەگى ايەلدى سالدىم. ءوزىم كورگەندى، ءوزىم سەزىنگەندى، ءوزىم ءۇنسىز كوتەرگەن نارسەلەردى ونىڭ بولمىسىنا سىڭىرۋگە تىرىستىم»، - دەيدى گۇلنافيس سالىققىزى.

ەكىنشى قۇرامداعى بيبىگۇل ورىنباساردىڭ قورلانى دا العاشقى قۇرامداعى بەينەدەن بولەك سيپاتقا يە. ول - ەركەلەۋ، ەركىن وسكەن، وجەت ءارى پىسىق قىز. مىنەزىندە اڭعالدىق پەن اقكوڭىلدىلىك قاتار ورىلەدى. بىراق ەكى اكتريسانىڭ سومداۋىنداعى قورلاندى بىرىكتىرەتىن ورتاق وزەك بار: جۇرەكتىڭ تازالىعى، سەزىمنىڭ شىنايىلىعى جانە رۋحتىڭ بەرىكتىگى.

بيبىگۇل ورىنباسار ءۇشىن بۇل ءرولدىڭ ەڭ ۇلكەن قيىندىعى - تاريحتا «ەستايدىڭ قورلانى» بولىپ قالعان ايەلدىڭ بولمىسىن ساحنادا قايتا ءتىرىلتۋ.

«ەستاي مەن قورلاننىڭ ماحابباتى - قازاق تاريحىندا دا، حالىق جادىندا دا ايرىقشا ورىن العان اسىل حيكايا. ءبىر ءاننىڭ ىشىنە تۇتاس ءبىر عۇمىردىڭ مۇڭىن، ءبىر جۇرەكتىڭ ساعىنىشىن، ءبىر ماحابباتتىڭ ماڭگىلىك سىرىن سىيعىزعان ەستايدىڭ «قورلانى»- مەن ءۇشىن جاي عانا ءان ەمەس، تاعدىردىڭ ءۇنى»، - دەيدى اكتريسا.

ونىڭ ايتۋىنشا، قورلان بۇرىن سومداعان كەيىپكەرلەرىنىڭ ەشقايسىسىنا ۇقسامايدى.

«قورلاننىڭ تابيعاتى بولەك. ونىڭ بويىندا وجەتتىك تە، باتىلدىق تا، قايسارلىق تا بار. كەيدە ءتىپتى ەركەكشە وكتەم مىنەز تانىتاتىن ەركىندىگى، سونىمەن بىرگە ەركەلىگى مەن نازىكتىگى قاتار ءورىلىپ جاتىر. وسىنداي مىنەزدىڭ ءبارى ونى ەستايدىڭ جۇرەگىندە ماڭگى قالعان قورلان ەتىپ كورسەتەدى»، - دەيدى بيبىگۇل ورىنباسار.

قويىلىمداعى كوركەمدىك شەشىمدەردىڭ ءبىرى - ۇلتتىق تانىم مەن سيمۆولدىق ءتىلدىڭ قاتار قولدانىلۋى. قورلاننىڭ ۇزاتىلار ساتىندەگى قىزىل كويلەك، اق ساۋكەلە، ساحناداعى قار، شاشىلعان پاراقتار، ورىندىق، ساندىق، وتكەل سەكىلدى زاتتاردىڭ بارلىعى وقيعانىڭ استارىن تەرەڭدەتەدى.

قازاقستاندىق تەاتر رەجيسسەرى، پروفەسسور، قازاقستاننىڭ ەڭبەك سىڭىرگەن قايراتكەرى، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ قويۋشى-رەجيسسەرى اۋباكىر راحميوۆ سپەكتاكلدەگى وسى سيمۆوليكالىق ءتىلدى رەجيسسەرلىك شەشىمنىڭ ماڭىزدى قىرى رەتىندە اتاپ وتەدى.

«ارۋحاننىڭ سپەكتاكلدەرىنىڭ ءبىر ەرەكشەلىگى - ونىڭ كوپ دۇنيەنى سيمۆول ارقىلى شەشۋگە ۇمتىلاتىنىندا. «قورلاندا» دا سونداي ىزدەنىس بار. ورىندىق، ساندىق، وتكەل، ءماتىن، جامىلعى - بۇلاردىڭ ءبارى جاي عانا ساحنالىق زات ەمەس. ولاردىڭ ارقايسىسىنىڭ وزىندىك ماعىناسى بار»، - دەيدى ول.

ماسەلەن، نۇرماعامبەتكە قاتىستى جاعدايدى اشۋ ۇستىندە ساحناعا جان-جاقتان ۇشقان پاراقتاردىڭ ءتۇسۋى - ءبىر ادامنىڭ اۋزىنان شىققان ءسوزدىڭ ەل ىشىنە قالاي تارايتىنىن بەينەلەيدى. وسەك ءبىر جەردە قالمايدى. ءبىر اۋىز ءسوز ەكىنشى اۋىزعا جەتكەن سايىن وزگەرىپ، تۇرلەنىپ، اقىرىندا ادامنىڭ تاعدىرىنا اينالۋى مۇمكىن. ساحناداعى شاشىلعان پاراقتار - وسى قۇبىلىستىڭ كوزگە كورىنگەن بەينەسى.

اۋباكىر راحميوۆ سپەكتاكلدەگى تابيعي قۇبىلىستاردىڭ دا جاي عانا ساحنالىق ەففەكت ەمەس ەكەنىن اتاپ وتەدى.

«مەزگىلدى كورسەتۋ، داۋىلدىڭ تۇرۋى دا جاي ەففەكت ءۇشىن جاسالماعان. ونى تۇسىنگەن كورەرمەن استارىنان ارماننىڭ استان-كەستەن بولىپ، بىت-شىت بولىپ جاتقانىن اڭعارادى. قۇسنيدىڭ ماڭگىلىككە قۇرباندىققا كەتۋى دە بەلگىلى ءبىر سيمۆوليكالىق شەشىمدەر ارقىلى بەرىلگەن»، - دەيدى ول.

ال ساحنادان كورگەنىن عانا ەمەس، سەزگەنىن الىپ قايتۋ - قويىلىمنىڭ نەگىزگى مۇراتىنىڭ ءبىرى.

«ساحناداعى زاتتىڭ ءوزى ءبىر بولەك، ونىڭ بىلدىرەتىن ويى ءبىر بولەك. كورەرمەن كوزبەن كورگەنىنەن گورى كوڭىلمەن سەزگەنىن الىپ قايتسا، ونەردىڭ ماقساتى ورىندالعانى. سوندىقتان وسى سيمۆوليكالىق ءتىلدى ءالى دە تەرەڭدەتە ءتۇسۋ كەرەك دەپ ويلايمىن»، - دەيدى اۋباكىر راحميوۆ.

قويىلىمداعى ەرەكشە كەيىپكەرلەردىڭ ءبىرى - قوجبان. بۇل ءرولدى جولامان جاناباەۆ سومدايدى. قوجبان — قۇسني مەن قورلاننىڭ باۋىرى. رەجيسسەرلىك شەشىمدە ول اۋتيزم سپەكترىندەگى بالا رەتىندە تانىستىرىلادى. بىراق اكتەر كەيىپكەردىڭ ەرەكشەلىگىن سىرتقى قيمىلمەن عانا كورسەتۋگە ۇمتىلماي، ونىڭ ىشكى الەمىنە ەنۋگە تىرىسقان.

جولامان جاناباەۆ ءۇشىن بۇل ءرولدىڭ ورنى بولەك. ويتكەنى قوجبان - ونىڭ ساحناداعى العاشقى جۇمىسى.

«مەن ءۇشىن بۇل - ساحناداعى ۇلكەن جەتىستىكتەرىمنىڭ ءبىرى. قويىن داپتەرىمە ەرەكشە اتاپ جازىپ قوياتىنداي ەڭبەك بولدى. ويتكەنى بۇل - مەنىڭ ساحناداعى العاشقى جۇمىسىم»، - دەيدى اكتەر.

دايىندىق بارىسىندا قوجباننىڭ بەينەسى اكتەر ءۇشىن بىرتىندەپ وزگەرە تۇسكەن.

«دايىندىق بارىسىنداعى ىزدەنىس پەن كەيىپكەردى تەرەڭىرەك تانۋعا دەگەن تالپىنىسىمنىڭ ناتيجەسىندە ەرەسەك قوجباننىڭ ىشىنەن بالا، پاك، پەرىشتە قوجباندى تاۋىپ الدىم. ونىڭ دەنساۋلىعىنداعى ەرەكشەلىگى مەن ىشكى الەمىنىڭ تازالىعى بۇل كەيىپكەردى مەن ءۇشىن بۇرىنعىدان دا قىمبات ەتە ءتۇستى»، - دەيدى جولامان جاناباەۆ.

قوجباننىڭ تازالىعى كورەرمەنگە دە بىردەن جەتەدى. ونىڭ اپكەلەرىمەن ويناۋى، قالجىڭداسۋى، «ءبارىمىز باقىتتى بولامىز» دەگەن سوزگە بالاداي سەنۋى - كەيىپكەردىڭ ەسەپسىز، كۇدىكسىز الەمىن اشادى.

اكتەردىڭ ايتۋىنشا، الەۋمەتتىك جەلىدە جاريالاعان دايىندىق بارىسىنداعى بەينەماتەريالدىڭ ءبىرى ون جەتى مىڭنان استام قارالىم جيناپ، سول جەردە جازىلعان ءبىر پىكىر وعان ەرەكشە اسەر ەتكەن.

«ءبىر كورەرمەن ءوزىنىڭ دە ەرەكشە بالاسى بار ەكەنىن ايتىپ، ساحنادان ءوز بالاسىن كورگەندەي بولعانىن، جۇرەگىنىڭ وزگەشە كۇيگە تۇسكەنىن جازىپتى. وسى ءبىر اۋىز ءسوز مەن ءۇشىن ۇلكەن قولداۋعا اينالدى. سول ساتتەن باستاپ قوجباننىڭ مەن ءۇشىن عانا ەمەس، كورەرمەن ءۇشىن دە ماڭىزدى كەيىپكەر ەكەنىن ءتۇسىندىم»، - دەيدى ول.

جولامان جاناباەۆ ءۇشىن قوجباننىڭ ساحناداعى تاعدىرى اتا-اناسىنا دەگەن ساعىنىشپەن دە استاسقان.

«بۇل كەيىپكەردى ساحناعا الىپ شىعۋىما تۇرتكى بولعان ەڭ ۇلكەن موتيۆاتسيا - باقيلىق بولعان اكەم مەن انامنىڭ رۋحىنا دەگەن قۇرمەتىم ەدى. ولار دا سول جەتى ءجۇز كورەرمەننىڭ اراسىندا بولىپ، مەنىڭ ساحناداعى العاشقى قادامىمدى كورسە ەكەن دەپ ارماندادىم»، - دەيدى اكتەر.

سۇحباتتىڭ سوڭىنداعى ونىڭ ءسوزى دە سپەكتاكلدىڭ وزەگىندەگى ساعىنىش سەزىمىمەن ۇندەسەدى:

«اكە، انا، سىزدەردىڭ سارى قوزىلارىڭىز ساحناعا شىقتى. جولامان بولىپ ەمەس - جانناتتىق قوجبان بولىپ».

ال ەستاي بەينەسى ەكى قۇرامدا ەكى ءتۇرلى ساحنالىق تىنىس تابادى. ءبىرىنشى قۇرامدا ءىلياس شۇكىمان سومداعان ەستاي - بايىپتى، سابىرلى، سالماقتى ەر ادام. ونىڭ بويىندا ءومىردىڭ پارقىن تۇسىنەتىن، سەزىمىن سىرتقا كوپ شىعارا بەرمەيتىن تۇلعانىڭ بولمىسى بار.

ەكىنشى قۇرامداعى نۇرسۇلتان ناجەكەنوۆ سومداعان ەستايدىڭ تابيعاتى وزگەشە. ول - ويناقىراق، جەڭىل اۋرالى، قىز بالانىڭ ەركەلىگىن كوتەرە بىلەتىن، سەرى مىنەزدى، سەزىمىن اشىقتاۋ بىلدىرەتىن كەيىپكەر.

ءبىر كەيىپكەردىڭ ەكى اكتەردە ەكى ءتۇرلى سيپات تابۋى قويىلىمنىڭ قىزىقتى تۇستارىنىڭ بىرىنە اينالعان. ەستايدىڭ نەگىزگى بولمىسى وزگەرمەگەنىمەن، ساحنالىق تىنىسى وزگەرەدى: بىرىندە سالماق باسىم بولسا، ەكىنشىسىندە سەرىلىك پەن ەركىندىك العا شىعادى.

وسى سەكىلدى ەكى قۇرامداعى ەكى قورلان دا ءبىر-ءبىرىن قايتالامايدى. گۇلنافيس سالىققىزىنىڭ قورلانى - ىشكى ەركىندىگىمەن جانە ءور مىنەزىمەن ەرەكشەلەنسە، بيبىگۇل ورىنباساردىڭ قورلانى - اڭعال اقكوڭىلدىلىگى، ەركەلىگى مەن وجەتتىگىن قاتار الىپ جۇرەدى. ەكى بەينەنىڭ دە ءوز تابيعاتى بار. بىراق ەكەۋىن جالعاپ تۇرعان ءبىر قاسيەت - شىنايىلىق.

قورلاننىڭ جەڭگەسى باعيلا دا قويىلىمدا بىرجاقتى كەيىپكەر رەتىندە بەرىلمەيدى. ەل ىشىندە ول وسەكشى ايەل رەتىندە قابىلدانعانىمەن، رەجيسسەر ونىڭ ارەكەتىنىڭ استارىنداعى سەبەپكە ۇڭىلەدى. ونىڭ قورلان مەن ەستاي اراسىنداعى كەزدەسۋدى ءۇي ىشىنە ايتۋىنىڭ تۇبىندە بىرەۋدى قارالاۋ ەمەس، وتباسىنىڭ ابىرويىن ساقتاۋ، «ەل-جۇرتقا نە بەتىمىزدى ايتامىز؟» دەگەن قوعامدىق قىسىمنان قورقۋ جاتىر.

بۇل - ادامدى سىرتقى مىنەزىنە قاراپ ءبىر-اق اۋىز سوزبەن باعالاۋدىڭ وڭاي، ال ونىڭ ىشكى سەبەبىن ءتۇسىنۋدىڭ الدەقايدا قيىن ەكەنىن كورسەتەتىن تۇس. باعيلا - وسەك تاراتۋشى عانا ەمەس، ءوز زامانىنىڭ سالتى مەن قوعامدىق پىكىرىنىڭ اراسىندا قالعان ايەل.

«قورلاننىڭ» كوركەمدىك قۋاتى دا وسىندا. مۇندا ماحاببات جەكە باستىڭ باقىتى رەتىندە عانا ەمەس، ۋاقىت پەن تاعدىردىڭ الدىندا سىنالعان ادامدىق ولشەم رەتىندە كورىنەدى. ەستاي مەن قورلاننىڭ سەزىمى ارقىلى رەجيسسەر حالىق جادىندا ساقتالعان ءبىر مۇڭدى قوزعايدى. ساحنادا ەكى ادامنىڭ جۇرەگى سويلەگەندەي بولعانىمەن، سول جۇرەكتىڭ سوعىسى - تۇتاس ۇلتتىڭ جۇرەگىنىڭ سوعىسى.

قويىلىم اياقتالعاننان كەيىن ساحنادا بولعان وقيعادان گورى ادامنىڭ ءوز ىشىندە قالعان ءۇن ماڭىزدىراق سەزىلەدى. ويتكەنى «قورلان» - ەستاي مەن قورلاننىڭ ماحابباتى تۋرالى عانا ەمەس، ادامنىڭ جەكە تاعدىرى مەن حالىق تاعدىرىنىڭ ءبىر-بىرىنەن اجىرامايتىنىن كورسەتەتىن شىعارما.

تاريحتا تالاي ادامنىڭ اتى ۇمىتىلدى. بىراق ولاردىڭ كورگەن قايعىسى، سۇيگەنى، كۇتكەنى، جوعالتقانى حالىق جادىندا قالدى. تەاتردىڭ مىندەتى دە - سول ۇمىت قالعان ۇندەردى قايتا ەستىرتۋ.

ارۋحان تەمىربەكقىزىنىڭ رەجيسسەرلىك شەشىمدەرىندە قورلاننىڭ جەكە باسىنىڭ قاسىرەتى بىرتە-بىرتە ۇلتتىق جادتىڭ قاسىرەتىنە ۇلاسادى. ونىڭ ماحابباتى - ءبىر قىزدىڭ ارمانى عانا ەمەس، ۋاقىتتان جەڭىلگەن تالاي ارماننىڭ جيىنتىعى.

قورلاننىڭ تاعدىرى ادامدى تاعدىر سىنايتىنىن، زامان وزگەرتەتىنىن، ۋاقىت الىستاتاتىنىن ەسكە سالادى. بىراق رۋحىن جوعالتپاعان ادام عانا ءوز تاريحىن ساقتاپ قالادى. قورلان - سول ساقتالعان رۋحتىڭ اتى. ال ەستايدىڭ ءانى - سول رۋحتىڭ عاسىرلار بويى وشپەي كەلە جاتقان ءۇنى.

«قورلان» ارقىلى «الاتاۋ» ءداستۇرلى ونەر تەاترى ءبىر ماحابباتتىڭ تاريحىن عانا ەمەس، حالىقتىڭ جۇرەگىندە قالعان ءبىر ءداۋىردىڭ سىرىن ساحناعا شىعاردى. ويتكەنى كەيدە ءبىر ادامنىڭ تاعدىرىن ايتۋ - تۇتاس ەلدىڭ تاعدىرىن ايتۋ. ال ءبىر جۇرەكتىڭ ءۇنىن ەستۋ - مىڭ جۇرەكتىڭ ءۇنىن ەستۋمەن تەڭ.

ينارا اۋباكيروۆا،

«الاتاۋ» ءداستۇرلى ونەر تەاترىنىڭ ادەبيەت ءبولىم باسشىسى

Abai.kz