مارات ءتاجين قازاقستاننىڭ چەحياداعى ەلشىسى بولىپ تاعايىندالدى. بۇل تۋرالى اقوردانىڭ ءباسپاسوز قىزمەتى حابارلادى.

"مەملەكەت باسشىسىنىڭ جارلىعىمەن مارات مۇحانبەتقازىۇلى ءتاجين قازاقستان رەسپۋبليكاسىنىڭ چەح رەسپۋبليكاسىنداعى توتەنشە جانە وكىلەتتى ەلشىسى قىزمەتىنە تاعايىندالدى", - دەلىنگەن حابارلامادا.

مارات ءتاجين 1960 جىلى 8-ءشى ءساۋىر كۇنى اقتوبە قالاسىندا دۇنيەگە كەلگەن. 1981 جىلى الماتى حالىق شارۋاشىلىعى ينستيتۋتىن ەكونوميست ماماندىعى بويىنشا بىتىرگەن. الەۋمەتتانۋ عىلىمدارىنىڭ دوكتورى.

1999-2001 جىلدارى قر پرەزيدەنتىنىڭ قاۋىپسىزدىك ماسەلەلەرى بويىنشا كومەكشىسى، قاۋىپسىزدىك كەڭەسىنىڭ حاتشىسى، 2001 جىلى ۇلتتىق قاۋىپسىزدىك كوميتەتىنىڭ توراعاسى، 2007-2009 جىلدارى سىرتقى ىستەر ءمينيسترى، 2014-2017 جىلدارى قر رەسەي فەدەراتسياسىنداعى ەلشىسى بولعان. 2019 جىلدىڭ ناۋرىزىنان قىركۇيەگىنە دەيىن مەملەكەتتىك حاتشى قىزمەتىن اتقارعان. كەيىننەن ونىڭ ورنىنا قىرىمبەك كوشەرباەۆ كەلگەن.

Abai.kz