28 قاراشادا «استانا» فۋتبول كلۋبى ەۋروپا ليگاسى توپتىق كەزەڭى اياسىندا انگليالىق «مانچەستەر يۋنايتەد» كومانداسىن قابىلدايدى.

بۇل توپتىق كەزەڭدەگى 5-ءشى ماتچ. ەلوردالىق كوماندا العاشقى 4 ويىندا دا جەڭىلىپ، پلەي-وفف كەزەڭىنە شىعۋ مۇمكىندىگىنەن ەرتە ايىرىلعان بولاتىن.

العاشقى ويىندا قۇرامىندا جالعىز قازاقستاندىق ويىنشى بار «استانا» سىرت الاڭدا ءدال وسى «مانچەستەر يۋنايتەدتەن» 1:0 ەسەبىمەن جەڭىلگەن. ول كەزدە «ولد ترا́ففوردتا» جەڭىسكە جەتە المايتىنىن بىلە تۇرا، 35, 37 جاستاعى سەربيالىق، رەسەيلىك ويىنشىلاردى الاڭعا شىعارىپ، 90 مينۋت بويى قورعانعانى ءۇشىن «استانا» باپكەرىنە رەنىش بىلدىرگەن ەدىك. فۋتبول ماماندارى نازار اۋداراتىن وسىنداي ويىندا يۋري پەرتسۋح سىندى جاستارىمىزدى الاڭعا جىبەرىپ، تاجىريبە جيناۋىنا، مامانداردىڭ كوزىنە تۇسۋىنە مۇمكىندىك جاساۋىمىز كەرەك ەدى...

وسىدان كەيىن ءوز الاڭىندا سەربيالىق «پارتيزان» كلۋبىن قابىلداعان «استانا» تاعى جەڭىلدى. «استانا ارەنا» تابلوسىندا 1:2 ەسەبى تىركەلدى. ءبىزدىڭ كوماندا ساپىنان جالعىز گولدى يسلانديالىق لەگيونەر رۋنار مار سيگۋرونسسون سوقتى.

بۇل باسى عانا ەكەن. ماسقارانىڭ كوكەسى وسىدان كەيىنگى ەكى ويىندا ورىن الدى. گوللانديالىق «الكما́ر» كومانداسى «استانانى» اياعان جوق. ەكى ويىندا جاۋاپسىز 11 گول سوقتى! الدىمەن گااگا قالاسىندا 6:0 ەسەبىمەن تالقاندادى دا، اراعا ون كۇن سالىپ قازاقستان استاناسىندا 0:5 ەسەبىن تىركەدى.

ەكى ويىندا دا وتاندىق جانكۇيەرلەر «استانا» كومانداسىنىڭ جىگەرسىزدىك تانىتقانىنا كۇيىندى. "ەل چەمپيوناتىندا ماڭىزدى ويىندار كۇتىپ تۇر" دەگەن سىلتاۋمەن از-گە قارسى كەزدەسۋلەرگە ءجۇردىم-باردىم قارادى. «استانانىڭ» باس باپكەرى رومان گريگورچۋك ءار سۇحباتىندا "ەكى جاقتى كۇرەس جۇرگىزۋگە ويىنشىلارىم جەتپەيدى" دەپ ەڭىرەگەندە ەكى ەتەگى جاسقا تولىپ ءجۇردى. سول ءۇشىن ەۋروپا ليگاسىن قۇربان ەتىپ، ىشكى بىرىنشىلىككە كۇش سالاتىنىن ءبىلدىردى.

رەسمي دەرەك بويىنشا، «استانانىڭ» جىلدىق بيۋدجەتى 9 ميلليارد 800 ميلليون تەڭگە. 10 لەگيونەر ويىنشى بار (ەكەۋى جاڭا قازاق). باپكەرى ۋكراينالىق. الاتىن جالاقىلارى جايلى ايتساق جان شوشىيدى. بۇلاردىڭ اراسىندا اينا 50-100 مىڭ، جىلىنا 1 ملن دوللارعا دەيىن جالاقى الاتىندار بار. وسىنشا قارجىنى قۇمعا قۇيىپ وتىرعانى ازداي، ەكى تۋرنيردە تەر توگۋگە شارشايمىز دەگەن سىلتاۋمەن، ەۋروپا ليگاسىنداعى 4 ويىندا قاقپالارىنا 14 گول جىبەرىپ وتىر. وزدەرىنىڭ سوققانى جالعىز گول. بۇل جەردە ۇپاي جايلى ايتۋدىڭ ءوزى ارتىق.

ءجا، بۇلار وتكەن وقيعالار. ەندى الدا ەكى ويىن قالدى. العاشقىسى ەرتەڭ «استانا ارەنادا» وتپەك. قارسىلاسى اتاقتى «مانچەستەر يۋنايتەد». بۇل جەردە اتاقتى دەگەن ءسوزدى امالسىز قولدانىپ وتىرمىز. ايتپەسە، ءبىزدىڭ استاناعا اتاقتى «مانچەستەر يۋنايتەد» كەلە جاتقان جوق.

«مانچەستەر يۋنايتەد» باپكەرى «استاناعا» قارسى ماتچقا تومەندەگى ويىنشىلاردى الىپ كەلدى:

قاقپاشىلار: لي گرانت، ماتەي كوۆار;

قورعاۋشىلار: ليۋك شوۋ، ماكس تەيلور، اكسەل تۋانزەبە، تەدەن مەنگي، ديشون بەرنارد، يتان لەيرد;

جارتىلاي قورعاۋشىلار: دجەسسي لينگارد، ديلان لەۆيتت، يتان گالبرەيت، ارناۋ پۋيگمال، دجەيمس گارنەر، تاحيت چونگ، ەيندجەل گومەس;

شابۋىلشىلار: مەيسون گرينۆۋد، لاردجي رامازاني، د'ماني بۋگەيل-مەللور.

كىمدى تانىدىڭىز؟ فۋتبول دەسە ىشكەن اسىن جەرگە قوياتىن جانكۇيەرلەردىڭ ءوزى ەكى-ءۇش ويىنشىنى ارەڭ تانيتىن بولار. ميۋ ساپىندا بىرنەشە جىلدان بەرى دوپ تەۋىپ جۇرگەن قورعاۋشى ليۋك شوۋ مەن جارتىلاي قورعاۋشى دجەسسي لينگاردتى ايتىپ وتىرمىز. تاحيت چونگ، مەيسون گرينۆۋد سەكىلدى جاس بالالارعا باس-كوز بولۋ ءۇشىن وسى ەكەۋى عانا كەلىپ وتىر. وزگە جاس فۋتبولشىلاردىڭ ەسىم-سويىن ءالى ەشكىم بىلمەيدى...

جاس فۋتبولشىلار كەلسە نە بوپتى دەمەڭىز. ماسەلەنىڭ ءبارى وسىندا. قارا كۇزدە جەرەبە تارتىلىپ، ءبىزدىڭ توپقا «مانچەستەر يۋنايتەد» تۇسكەن بەتتە، ەلوردالىق كلۋب باسشىلارى ەل كۇتپەگەن ارەكەتكە بارعان. «استانا» - «مانچەستەر يۋنايتەد» ويىنىندا ەڭ قىمبات بيلەت 55 مىڭ تەڭگە بولىپ بەكىتىلدى.

«مانچەستەر يۋنايتەدكە» قارسى ويىن:

1-ءشى كاتەگورياداعى ورىنداردىڭ بيلەت باعاسى - 55 000 (ەلۋ بەس مىڭ) تەڭگە;
2-ءشى كاتەگورياداعى بيلەتتەر - 40 000 (قىرىق مىڭ) تەڭگە;
3-ءشى كاتەگورياداعى بيلەتتەر - 25 000 (جيىرما بەس مىڭ) تەڭگە;
4-ءشى كاتەگورياداعى بيلەتتەر - 16000 (ون التى مىڭ) تەڭگە;
5-ءشى كاتەگورياداعى بيلەتتەر - 11,000 (ون ءبىر مىڭ) تەڭگە;
6-ءشى كاتەگورياداعى بيلەتتەر - 4000 ء(تورت مىڭ) تەڭگە;

فۋتبول كورۋگە ىڭعايلى ورىندارداعى ەڭ ارزان بيلەت 16 مىڭ تەڭگە. ال 5-6-شى كاتەگورياداعى ورىنداردان ويىن تاماشالاۋ وتە ىڭعايسىز. 5-ءشى كاتەگوريا قوس قاقپانىڭ ارت جاعى. ال 6-شى كاتەگوريا ستاديوننىڭ ءتورت بۇرىشىندا ورنالاسقان. الايدا ولاردىڭ ءوزى 11 مىڭ جانە 4 مىڭ تەڭگە ەكەن.

وتاندىق اقپارات قۇرالدارىنىڭ جازۋىنشا، بيلەت باعاسى بۇل ساندارمەن شەكتەلمەگەن كورىنەدى. اياق-قولى جەڭىل الىپ-ساتارلار بيلەتتى كاسساعا تۇسىرمەي ساتىپ الىپ، كوتەرمە باعامەن ساتىپ ءجۇر ەكەن. ءتىپتى كەي بيلەتتىڭ قۇنى 120 مىڭ تەڭگەگە دەيىن جەتكەن.

ەندەشە وسىنشا اقشا جۇمساپ، ماركۋس رەشفورد، داۆيد دەحەا، پول پوگبا سىندى جۇدىزداردى كورمەك بولعان جانكۇيەرلەر قايتپەك؟! «استانا» باسشىلىعى "الدانىپ قالعان" جانكۇيەرلەردىڭ اقشاسىن قايتارا ما؟ جوعارداعى جۇلدىزدار كەلەدى دەمەسە، 18-19 جاستاعى بالا-شاعانىڭ ويىنىن كورۋ ءۇشىن ەشكىم دە مۇنشا قارجىسىن قالتاسىنان شىعارماس ەدى عوي...

ءسوز سوڭىندا ايتارىمىز، قازاقستان چەمپيوناتى اياسىنداعى ويىنداردا «استانا ارەنادا» بيلەت باعاسى 200-500 تەڭگەدەن. ال ەۋروپا ليگاسىندا باعا 100 ەسە قىمباتتاپ وتىر. بۇنى "توناۋشىلىق" دەپ باعالاۋدان باسقا امال جوق.

«استانا» ونسىز دا حالىقتىڭ ەسەبىنەن كۇن كورىپ وتىرعان كلۋب. «استاناعا» ەل بيۋدجەتىنەن بولىنەتىن قارجىنىڭ قانشا ەكەنىن جوعارىدا ايتتىق. ەندەشە، «سامۇرىق-قازىنانىڭ» سان ميلليونىن سارىپ ەتىپ وتىرعان كوماندانىڭ بيلەت باعاسىن شارىقتاتىپ، حالىقتى تاعى توناۋعا قاقىسى جوق ەدى...

قۋانىش قاپپاس

Abai.kz