ەليسەي سارايىندا وتكەن كەلىسسوز ۇزاققا سوزىلدى. تۇنگە قاراي ءتورت ليدەردىڭ بىرلەسىپ ءباسپاسوز ءماسليحاتىن وتكىزۋىمەن اياقتالدى. رەسەي پرەزيدەنتى ۆلاديمير پۋتين مەن 2019 جىلدىڭ كوكتەمىندە سايلانعان ۋكراينا پرەزيدەنتى ۆلاديمير زەلەنسكي ءبىرىنشى رەت كەزدەستى.
تاراپتار دونباسستاعى جاعدايدى تالقىلاپ، 2019 جىلدىڭ سوڭىنا دەيىن وق اتپاۋدى قامتاماسىز ەتۋگە كەلىستى.
تاراپتار سونىمەن بىرگە تۇتقىنداردى الماستىرۋ ماسەلەسىن تالقىلاپ، "قىزىل كرەست" ۇيىمىنىڭ قىزمەتكەرلەرىنە ولارعا جاعداي جاساۋدى قامتاماسىز ەتۋگە مۇمكىندىك بەرۋگە كەلىسكەن.
بۇدان بولەك مەملەكەت باسشىلارى كەيىنگى كەزدەسۋلەردە جىكشىلدەردىڭ باقىلاۋىنداعى ايماقتاردا جەرگىلىكتى سايلاۋلار وتكىزۋ فورماتىن تالقىلاۋ بويىنشا كەلىسكەن.
ناتيجەسىندە بىرلەسكەن دەكلاراتسيا قابىلداندى.
بارلىق ليدەرلەر بۇل كەزدەسۋدى "سەنىمدى قالپىنا كەلتىرۋ" ءۇشىن ماڭىزدى دەپ اتاپ ءوتتى. ۆلاديمير زەلەنسكي مۇنى بەيبىتشىلىككە قادام دەپ قاراۋعا بولادى دەدى. ول سونىمەن بىرگە پۋتينمەن ارادا پىكىر كەلىسپەۋشىلىكتىڭ بولعانىن، ونى ازىرگە شەشۋگە مۇمكىن بولماعانىن اتاپ ءوتتى.
Abai.kz
