قازىر پارلامەنت ماجىلىسىندە قولدانىستاعى دەنساۋلىق ساقتاۋ زاڭناماسىنا تۇزەتۋلەر ەنگىزۋ ماسەلەسى قىزۋ تالقىلانۋ ۇستىندە.

دەپۋتاتتاردىڭ «قىزىلشەكە بولىپ» ايتىسىپ-تارتىسۋىنا ارقاۋ بولعان ماڭىزدى تاقىرىپتاردىڭ ءبىرى – ۆاكتسينالاۋدى مىندەتتەۋ تۋرالى ۇسىنىس.
سەبەبى، دەنساۋلىق ساقتاۋ مينيسترلىگى باسشىلارىنىڭ مالىمدەۋىنشە، ءبىر جىل ىشىندە 13,5 مىڭ ادام قىزىلشا دەرتىنە شالدىعىپ، وسى اۋرۋعا قارسى ەكپە جاسالماعان 21 بالا شەتىنەپ كەتكەن بولىپ شىقتى.

قازاقستان – وسىنداي جۇقپالى دەرتتەرگە قارسى ۆاكتسينالاردى بيۋدجەت قارجىسىنا ساتىپ الىپ، تەگىن ەگۋدى قامتاماسىز ەتىپ وتىرعان ساناۋلى مەملەكەتتىڭ ءبىرى. كەدەي ەلدەر ولارعا دۇنيەجۇزىلىك دەنساۋلىق ساقتاۋ ۇيىمىنىڭ كومەگىمەن ارەڭ قول جەتكىزۋدە. مىسال ءۇشىن، افريكا كونتينەنتىندەگى كەيبىر ەلدەردە مىڭداعان ءسابي قىزىلشادان قايتىس بولعان. بەلگىلى سەبەپتەرمەن ۆاكتسينالاۋ جۇمىسىن بوساڭسىتىپ العان ۋكراينادا دا بالالاردىڭ قىزىلشادان شەتىنەۋى كوبەيە تۇسكەن.

ءبىز، قازاقتار، وتكەن عاسىردىڭ قىرىقىنشى-ەلۋىنشى جىلدارى قىزىلشا دەرتى حالقىمىزعا جاۋداي تيگەنىن جادىمىزدان شىعارماۋىمىز قاجەت. مەن قىزىلجار ءوڭىرىنىڭ ءبىر تۇكپىرىندەگى تۋعان اۋىلىمدا ون شاقتى قۇرساق كوتەرگەنىمەن، التى-جەتى ءسابيى بەسىكتەن شىقپاي جاتىپ، قىزىلشانىڭ قۇربانى بولىپ، ەكى-ءۇش-اق بالاسى ءتىرى قالعاندىعىن ايتىپ، جىلامسىراپ وتىرعان تالاي اق جاۋلىقتى انانى كوردىم. سولاردىڭ ءبىرى – ءوز شەشەم ەدى...

سوندىقتان دا اتا-انالارىمىز دارىگەردىڭ ايتقانىن ەكى ەتپەي، بىزگە قاجەتتى ۆاكتسينانىڭ ءبارىن ەككىزدى. امان-ەسەن وسكەنىمىز سونىڭ ارقاسى شىعار.
جالپى ەلىمىزدە ۆاكتسينالاۋ قولعا الىنعاننان باستاپ سابيلەر ءولىمى كۇرت ازايعانى ءمالىم. ەندى كەيىنگى جىلدارى بالالارىنا ەكپە سالۋدان ءارتۇرلى سەبەپپەن باس تارتاتىن اتا-انالار سانى كوبەيىپ بارا جاتقاندىعى الاڭ تۋعىزباي قويمايدى. وسىعان وراي مىندەتتى ۆاكتسينالاۋدى ۇسىنعان دەنساۋلىق ساقتاۋ مينيسترلىگىنىڭ ماماندارىن تۇسىنۋگە دە، قولداۋعا دا بولادى دەپ سانايمىن. ولار ءوز بالالارىنىڭ عانا ەمەس، بۇكىل ۇلتتىڭ ۇرپاعىنىڭ قامىن ويلاپ وتىرعاندىعى انىق.

كارىباي مۇسىرماننىڭ الەۋمەتتىك جەلىدەگى پاراقشاسىنان

Abai.kz