مەملەكەت باسشىسىنىڭ «اباي جانە ءححى عاسىرداعى قازاقستان» اتتى ماقالاسىنا قاتىستى بەلگىلى اقىن، ابايتانۋشى الماحان مۇحامەتقاليقىزى ءوز ويىن ورتاعا سالدى.

ول قاسىم-جومارت توقاەۆتىڭ اباي تۋرالى ءاربىر پىكىرىن قاداعالاپ وقىپ شىققان.

«مەن قانشاما جىلدار بويى وسىلاي بولسا دەگەن ويىممەن ءجۇر ەدىم. تۋرا وسى ويىمدى وقىعانداي-اق بارلىعى پرەزيدەنتتىڭ اۋزىنان شىققانىنا مەن كەرەمەت قۋاندىم. مەن جىلدار بويى وسى سۇراقتارعا جاۋاپ تابا الماي جۇرگەن ەدىم. ءار ۇلتتىڭ بيىك تۇلعاسى بولادى عوي. سول تۇلعا ارقىلى ۇلتتى تانىتۋ دەگەن قاي زاماندا دا بار دۇنيە. بىراق ءبىز ءوزىمىزدىڭ قۇندىلىعىمىزدى ۋاقىتىندا باعالاي بىلمەيتىن ەلدىڭ قاتارىندامىز عوي. اباي تۋرالى اۋدارمالارعا قاتتى نازار اۋدارۋ، ابايدى الەمدىك دەڭگەيدە تانىتا وتىرىپ، قازاق ۇلتىن تانىتۋ، اباي تۋرالى ورتالىقتاردى كوبەيتۋ دەگەن بۇل مەنىڭ قانشاما ۋاقىتتان بەرى ايتىپ كەلە جاتقان دۇنيەم ەدى»،- دەدى الماحان مۇحامەتقاليقىزى.

ونىڭ ايتۋىنشا، اباي جاسقا بولىنبەيتىن، ۇلتقا بولىنبەيتىن، ەسكىرمەيتىن، ءوزىنىڭ قۇندىلىعىن ەشقاشان جويمايتىن، الماس سياقتى جان-جاقتان جارقىراپ كورىنەتىن، ۇلتتىڭ قاي سالاسىنان بولسا دا زەرتتەۋگە لايىق قازاقتىڭ ەڭ بيىگى.

«سوندىقتان دا ونى تانىپ، ابايدىڭ قۇندىلىعىن ءبىلىپ، ابايدى وسىنداي دەڭگەيگە كوتەرىپ، اباي تۋرالى جان-جاقتى پىكىرىن ءبىلدىرىپ، تەرەڭنەن تالداپ جازعانىنا مەن شىن ريزا بولىپ وتىرمىن. شىنىندا دا اباي ەشقاشان ولمەيدى. قازىر "ابايتانۋشىلار ازايىپ بارادى" دەگەن الاڭداۋشىلىعىمىزعا جاۋاپ بەرىپتى. سوندىقتان دا اباي جاڭا قىرىنان جارقىراپ كورىنىپ، باسقاشا، وسى كۇنگە دەيىنگى كوپ سۇراقتارىمىزعا جاۋاپ تاباتىن ۋاقىت كەلگەنىن بايقاتتى. كەرەمەت. سول تىلەگىمىزگە جەتكىزسىن»، - دەيدى ابايتانۋشى.

سونىمەن قاتار، ول ابايدىڭ الاش ارىستارىمەن دە ۇندەس ەكەنىن ايتتى.

«مۇحتاردىڭ دا ايتىپ كەتكەنى، مىرجاقىپتىڭ دا ايتقانى وسى. ءاليحان بوكەيحانوۆتىڭ دا ايتاتىنى وسى. ەڭ ءبىرىنشى ابايدى الەمگە تانىتقان ءاليحان بوكەيحان. اباي ءوز داۋىرىندە دە ءوز دەڭگەيىندە تانىلا العان جوق. ول ەندى – تابيعاتتىڭ زاڭى. ودان كەيىن سوۆەت ۇكىمەتى كەزىندە داۋىرگە قاراي بۇرمالادىق. شىعارمالارىنىڭ كوبى كەڭەس ءداۋىرىنىڭ ءسوزىن سويلەپ كەتتى. ەندى، ءبىز تاۋەلسىز ەلدىڭ، تاۋەلسىز قازاقستاننىڭ ابايىن جاساپ شىعارۋ ءۇشىن بىزگە توقاەۆ سياقتى وتە جان-جاقتى ويلايتىن پرەزيدەنتتىڭ اۋزىنان شىققان وسىنداي ۇلكەن ماقالانىڭ باستاۋ بولۋى قاجەت. جانە مەنىڭ ءبىر قۋانىپ وتىرعانىم، و باستا ەلدىڭ باسىنا كەلگەندە ۇلتتىڭ بويتۇمارىنا، بيىك شىڭىنا اينالعان اباي ەلىنە بارىپ، ابايدان باستاعانى مەنى قۋانتقان ەدى» - دەيدى ابايتانۋشى.

Abai.kz