ءبىر ايدان اسا ۋاقىت ءوتتى. قازاقستاننىڭ رەسەيدەگى ەلشىسى تاعايىندالعان جوق. الگىندە قر سىرتقى ىستەر ءمينيسترىنىڭ ورىنباسارى ەرجان اشىقباەۆ ەلشى تاعايىنداۋ ءتارتىبىن ءتۇسىندىرىپ، ءسوز سويلەپتى.

ۆيتسە-ءمينيستردىڭ ايتۋىنشا، ەلشى قىزمەتىنە ۇمىتكەر بار ەكەن. تەك، قارسى تاراپتىڭ كەلىسىمى كەرەك. قازاقستاننىڭ رەسەيدەگى ەلشىسىن تاعايىنداۋ بەلگىلەنگەن ءتارتىپ بويىنشا جۇزەگە اسادى.  الايدا، ۇمىتكەرلەردىڭ كىم ەكەنىن اشىقباەۆ مىرزا اشىپ ايتپاپتى. تengrinews.kz سولاي دەيدى.

- ءبارى دە اگرەمان العاننان كەيىن بەلگىلى بولادى. ول رەسەي تاراپىنان سۇرالادى (فرانتسۋزشا agrément - ماقۇلداۋ، كەلىسىم). اگرەمان - بۇل ءىس جۇزىندە ادامدى تاعايىنداۋعا قابىلداۋشى تاراپتىڭ كەلىسىمى. سوندىقتان، بارلىق ارەكەتتەر بەلگىلەنگەن ءتارتىپ بويىنشا ورىندالادى،- دەيدى ۆيتسە-مينيستر.

ەستەرىڭزگە سالا كەتەيىك، وسىعان دەيىن قر رەسەيدەگى توتەنشە جانە وكىلەتتى ەلشىسى قىزمەتىن يمانعالي تاسماعامبەتوۆ اتقارعان. ال 2019 جىلدىڭ 18 جەلتوقسانىندا يمانعالي نۇرعاليۇلى قازاقستاننىڭ رەسەيدەگى ەلشىسى قىزمەتىنەن بوساتىلدى. سىرتقى ىستەر مينيسترلىگى ونىڭ وتستاۆكاسىن ءوز ءوتىنىشى بويىنشا جانە زەينەتكە شىعۋ جاسىنا بايلانىستى دەپ تۇسىندىرگەن.

ال، وستاۆكاعا كەتكەن تاسماعامبەتوۆتىڭ ورنىنا قازاقستاننىڭ رەسەيدەگى ەلشىلىگىنىڭ كەڭەسشىسى نۇرجان قاجىاقباروۆ ۋاقىتشا تاعايىندالعان. سىرتقى ىستەر ءمينيسترى مۇحتار تىلەۋبەردى ەلشى تاعايىندالعانعا دەيىن نۇرجان قاجىاقباروۆتىڭ وسى قىزمەتتە بولاتىنىن ايتقان.

رەسمي دەرەكتەرگە كوز جۇگىرتسەك، رەسەي قازاق تاۋەلسىزدىگىن 1991 جىلدىڭ 17 جەلتوقسانىندا مويىنداپتى. ال ەكى ەل اراسىنداعى ديپلوماتيالىق قارىم-قاتىناستار 1992 جىلدىڭ قازانىنان باستاپ ورناي باستاعان. قازاقستاننىڭ رەسەيدەگى ەلشىلىگى دە سول 1992 جىلى اشىلعان ەكەن. قازىر ماسكەۋدە باس ەلشىلىك، پەتەربور مەن قازاندا باس كونسۋلدىق، استراحان مەن ومبىدا كونسۋلدىقتار ورنالاسقان.

وسىعان دەيىن كىمدەر ەلشى بولدى؟

1994-2002 جىلدار ارالىعىندا - تايىر مانسۇروۆ،

2002-2003 جىلدار ارالىعىندا - التىنبەك سارسەنبايۇلى،

2003-2006 جىلدار ارالىعىندا - قىرىمبەك كوشەرباەۆ،

2006-2007 جىلدار ارالىعىندا - جانسەيىت تۇيمەباەۆ،

2007-2008 جىلدار ارالىعىندا - نۇرتاي ابىقاەۆ،

2008-2009 جىلدار ارالىعىندا - ادىلبەك جاقسىبەكوۆ،

2009-2012 جىلدار ارالىعىندا - زاۋىتبەك تۇرىسبەكوۆ،

2012-2014 جىلدار ارالىعىندا - عالىم ورازباقوۆ،

2014-2017 جىلدار ارالىعىندا - مارات ءتاجين،

2017-2019 جىلدار ارالىعىندا - يمانعالي تاسماعامبەتوۆ رەسەيدەگى ەلشىلىكتى باسقاردى.

قازاق پەن ورىس گەوگرافيالىق تۇرعىدان دا، ەكونوميكالىق تۇرعىدان دا جاقىن قارىم-قاتىناستاعى ەلدەر. كەدەندىك وداق ءبىر بار. ەۋرازيالىق وداق ەكى بار. جەتى مىڭ شاقىرىمعا سوزىلعان الەمدەگى ەڭ ۇزىن قۇرلىقتىق شەكارا تاعى بار. البەتتە، مەملەكەتارالىق ديپلوماتيالىق قارىم-قاتىناس ەلشىلەرگە تىكەلەي بايلاناستى ەكەنى ءسوزسىز.

1994 جىلى ماسكەۋدەگى ديپكەڭسەگە العاش بولىپ بارعان تايىر مانسۇروۆ ەدى. ەڭ ۇزاق ۋاقىت ەلشى بولعان دا سول - تايىر مانسۇروۆ. 8 جىل. ۇكىمەتتە از عانا قىزمەت قىلعان عالىم ورازباقوۆتان باسقاسىنىڭ بارلىعى دا ەلدەگى بەدەلدى ساياساتكەرلەر. التىنبەك سارسەنبايۇلى، قىرىمبەك كوشەرباەۆ، نۇرتاي ابىقاەۆ، جانسەيىت تۇيمەباەۆ، ادىلبەك جاقسىبەكوۆ، زاۋىتبەك تۇرىسبەكوۆ، مارات ءتاجين، يمانعالي تاسماعامبەتوۆ...

قازاقستان ءۇشىن ستراتەگيالىق ماڭىزى بار بۇل قىزمەتكە باراتىن كەلەسى ادام كىم؟ جوعارىدا ۆيتسە-مينيستر ناقتى ۇمىتكەردىڭ بار ەكەنىن ايتتى. ول كىم؟ كادرلىق ديپلومات پا، الدە ساياسي سالماعى بار قايراتكەر تۇلعا ما؟ كەلەسى ەلشى ۇلتتىق، مەملەكەتتىك مۇددەنى ويلايتىن، رەسەيمەن اراداعى قارىم-قاتىناستا تەڭ قۇقىقتى ساياسات جۇرگىزە الاتىن ادام با؟

يمانعالي نۇرعاليۇلى وتستاۆكاعا كەتكەلى دە ءبىر ايدان اسا ۋاقىت ءوتتى. رەسەيدەگى قازاقستان ەلشىلىگىنە كىم تاعايىندالاتىنى تۋرالى ناقتى اقپارات جوق. ءتىپتى، ۇمىتكەرلەردىڭ كىم ەكەندىكتەرى دە بەلگىسىز... بىزدەگى جالقى سۇراق - كەلەسى ەلشى كىم بولادى؟

Abai.kz