بيىل 12 ەلدە 31 قازاق ءتىلىن ۇيرەتۋ ونلاين-سىنىپتارىن اشۋ كەرەك. بۇل تۋرالى قر اقپارات جانە قوعامدىق دامۋ مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى داۋرەن اباەۆ ايتتى، دەپ حابارلايدى قازاقپارات.

«قانداستاردى قولداۋدى ودان ءارى جالعاستىرۋ ماقساتىندا بيىل الەۋمەتتىك-ەكونوميكالىق قولداۋ شارالارى كەشەنىنىڭ ناقتى پايىمداۋىن جاساۋ كەرەك.

بىرىنشىدەن، وتانداستار فورۋمىن جانە شەتەلدەگى قازاقتاردىڭ كىشى قۇرىلتايىن جوعارى دەڭگەيدە وتكىزۋ قاجەت.

ەكىنشىدەن، 12 ەلدە 31 قازاق ءتىلىن ۇيرەتۋ ونلاين-كلاستارىن جانە كەمىندە 7 ەلدە قازاق مادەني-ىسكەرلىك ۇيلەرىن اشۋ كەرەك»، - دەدى مينيستر.

داۋرەن اباەۆ ۇشىنشىدەن، «قانداستار» مارتەبەسىن ءبىر تەرەزە ءپرينتسيپى بويىنشا بەرۋگە ارنالعان قىزمەتتى ىسكە قوسۋ قاجەتتىگىن ايتتى.

«ۆيتسە-مينيستر مارات ازىلحانوۆقا بيىل كونفەسسياارالىق جانە ەتنيكاارالىق قاتىناستار سالاسىنداعى بارلىق مىندەتتەردىڭ ساپالى ورىندالۋىن قامتاماسىز ەتۋدى تاپسىرامىن»، - دەدى ول.

Abai.kz