ءىى دۇنيەجۇزىلىك سوعىستاعى جەڭىستىڭ 75 جىلدىعى قارساڭىندا ورتالىق ازيا ەلدەرىندە كوركەم فيلمدەر ءتۇسىرىلىپ كورەرمەنگە جول تارتا باستادى. سونىڭ ءبىرى ءتۇسىرىلىمى جاقىندا عانا بىتكەن رەجيسسەر دجاحونگير احمەدوۆتىڭ تاشكەنت وبلىسىنىڭ زانگيات اۋدانىنىڭ حاناباد اۋىلىنىڭ تۇرعىنى  زۋلفيا زاكيروۆانىڭ بەس ۇلىنىڭ مايداننان ورالماۋىنا ارنالعان "يلحاك" ءفيلمى. وسى ورايدا اياگوزدىك سىر قوجالارىنىڭ ءبىر اۋلەتىنەن تارايتىن قاسىم اتامىزدىڭ 15 ۇلىن مايدانعا اتتاندىرىپ، 14 قارا قاعاز العانى ويعا ورالادى.  

وسىنداي اۋلەتتىڭ بولعانىن اياكوزدىكتەردىڭ ءالى كۇنگە بىلمەيتىنى وكىنىشتى-اق!!!

ءبىر اكەدەن تاراعان 14 جىگىتتىڭ ەلگە ورالماۋى ءىى دۇنيەجۇزىلىك سوعىستىڭ تاريحىندا بولماعان وقيعا. بۇل جايىندا جالعىز ءوزى عانا ەلگە ورالعان اۋلەتتىڭ تۇڭعىشى بازارعالي اتامىزدىڭ: «اشتىق الماعان باۋىرلارىمدى سوعىس الدى» دەپ تاعدىر سالعان جالعىزدىعىنا نالىعانىن قاسىموۆا نۇركامال بازارعاليقىزى ءبىر كەزىككەنىمىزدە سىر عىلىپ ايتىپ ەدى.

«ەل ەسىندە ءبىر جىل قالعىڭ كەلسە – اس بەر، ون جىل قالعىڭ كەلسە – اعاش وتىرعىز، ال ماڭگى قالعىڭ كەلسە – بالا تاربيەلە» دەيدى حالىق دانالىعى. قازاق حالقىنىڭ بۇل دانالىعى تەگىن ايتىلماعان قاسىموۆا نۇركامال بازارعاليقىزى جارتى عاسىرىن جاستار تاربيەسى مەن ءبىلىم جۇيەسىندەگى قىزمەتكە ارناعان ادام ەكەنىن جانە ول سالادا ابىرويلى بولعانىن بىلەتىنمىن.

ءتىپتى ەسكى ۋاقىتتا لاو-تسزى دەيتىن عۇلامادان قالعان دەگەن ءبىر ءسوزى بار ەدى: «دانا ادام… ءوزىن جارىققا شىعارا بەرمەيدى، سوندىقتان ءجۇزى جارقىن; ول ءوزى تۋرالى ايتپايدى، سوندىقتان دا اتاقتى; ول ءوزىن دارىپتەمەيدى، سوندىقتان دا ول سىيلى; ول ءوزىن اسقاقتاتپايدى، سوندىقتان دا ول وزگەلەر اراسىندا بيىك كورىنەدى». نۇركامال بازارعاليقىزىن اسقاقتاتقان ونىڭ شاكىرتى سەرىكزات دۇيسەنعازين ەدى.

بۇلاي دەيتىنىمىز، سەرىكزات دۇيسەنعازين شىعىس قازاقستان وبلىسى، اياگوز اۋدانى، تارباعاتاي اۋىلىنىڭ تۋماسى. 2002 جىلدان بۇگىنگى كۇنگە دەيىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ادەبيەتى كافەدراسىندا دوتسەنت، 2006 جىلدان ەۇۋ-دا فيلولوگيا فاكۋلتەتى دەكانىنىڭ ورىنباسارى قىزمەتىن اتقارادى. فيلولوگيا عىلىمدارىنىڭ كانديداتى، رەسپۋبليكالىق ايتىستاردىڭ جەڭىمپازى، رەسپۋبليكالىق جىر ءمۇشايراسىنىڭ جۇلدەگەرى، ءبىر وقۋلىقتىڭ، ءبىر عىلىمي مونوگرافيانىڭ، وتىزعا جۋىق عىلىمي ماقالانىڭ، كوپتەگەن پۋبليتسيستيكالىق ماقالالاردىڭ اۆتورى، بىرنەشە ادەبي، عىلىمي-تانىمدىق جيناقتاردىڭ قۇراستىرۋشىسى.سەرىكزات ماقسۇتۇلى دۇيسەنعازيننىڭ ورىسشا تاماشا سويلەگەنىنە تاڭ قالعانىمىزدا ءوز ۇستازىنىڭ نۇركامال بازارعاليقىزى ەكەنىن ايتقانى جادىمىزدا جاتتالىپ قالعان ەدى.

نۇركامال اپايدىڭ اكەسى بازارعالي اتامىز ءىى جاھان سوعىسىنىڭ تاريحىندا قالاتىن جان. ولاي دەيتىنىمىز ءبىر اۋلەتتەن 15 اعايىندى جىگىت وتان قورعاۋعا اتتانىپ، تەك بازارعالي اتا عانا امان-ەسەن ەلگە ورالىپتى.

بۇل ەندى رەسپۋبليكا تاريحشىلارى مەن كينوگەرلەرى جاپپاي قولعا الاتىن تاقىرىپ بولعاندىقتان ءبىز باس جاعىن عانا ءسوز ەتىپ وتىرمىز. تەك 14 بىردەي بوزداققا نۇر-سۇلتان تورىنەن ەسكەرتكىش تۇرعىزۋ قولعا الىنسا، جوعىمىز تۇگەندەلەر ەدى. 

ءابىل-سەرىك الىاكبار

Abai.kz