قازاقستاننان قىتايعا باراتىن پويىز، اۆتوبۋس پەن ۇشاقتاردىڭ ۋاقىتشا توقتاعانى بەلگىلى. وسى رەتتە قر يدم ازاماتتىق اۆياتسيا كوميتەتىنىڭ توراعاسى تالعات لاستاەۆ پەن كولىك كوميتەتىنىڭ توراعاسى سامات عىلىموۆ جولاۋشىلارعا بيلەت قۇنى قالاي قايتارىلاتىنىن ءتۇسىندىرىپ بەردى.

قر يدم كولىك كوميتەتىنىڭ توراعاسى سامات عىلىموۆتىڭ ايتۋىنشا، پويىز بەن اۆتوبۋسقا الىنعان بيلەتتەردىڭ قۇنى تولىعىمەن يەسىنە قايتارىلادى.

«نۇر-سۇلتان-ءۇرىمجى مەن الماتى-ءۇرىمجى باعىتىنداعى پويىزدار اقتوعاي ستانساسىندا ءبىر پويىز بولىپ بىرىگىپ، ارى قاراي ۇرىمجىگە باعىت الاتىن. ول جاققا بيلەت العانداردىڭ كوبى دوستىق ستانساسىنان ءتۇسىپ قالادى. انىقتاعانىمىزداي، دوستىقتان ارى قاراي ۇرىمجىگە دەيىن 22 بيلەت الىنعان ەكەن. وسى 22 ادامنىڭ ىشىندە 8-ءى بيلەتتى قايتارعان. قالعان 14 ادامعا وپەراتورلار حابارلاسىپ، پويىزدىڭ جۇرمەيتىنىن، بيلەت قۇنىن الىپ كەتۋى كەرەكتىگىن ايتىپ جاتىر»، - دەدى سامات عىلىموۆ.

ال ازاماتتىق اۆياتسيا كوميتەتىنىڭ توراعاسى تالعات لاستاەۆتىڭ ايتۋىنشا، اۋە بيلەتتەرىنىڭ دە تولىق قۇنى يەلەرىنە قايتارىلادى. 3 اقپاننان باستاپ اتالعان رەيستەرگە بيلەت العاندار ونى ساتىپ العان جەرلەرىنە قايتارا الادى. بيلەتتەر ءۇشىن اقشا ايىپپۇلسىز راسىمدەلىپ، تولىق كولەمدە قايتارىلادى. قالىپ قويعان جولاۋشىلاردى ەلگە قايتارۋ ءۇشىن بەيجىڭ جانە ءۇرىمجى قالالارىنان قوسىمشا رەيستەر ۇيىمداستىرىلادى.

ەسكە سالا كەتسەك، بۇعان دەيىن سامات عىلىموۆ قازاقستاننان قىتايعا باراتىن بارلىق اۆتوبۋس پەن پويىز ۋاقىتشا توقتاتىلعانىن، ازاماتتىق اۆياتسيا كوميتەتىنىڭ توراعاسى تالعات لاستاەۆ 3 اقپاننان باستاپ قىتاي حالىق رەسپۋبليكاسىمەن تۇراقتى اۋە قاتىناسى ۋاقىتشا توقتايتىنىن حابارلاعان ەدى.

Abai.kz