قازاقستاننىڭ ۆيتسە-پرەزيدەنتى، 2026 جىلعى اباي اتىنداعى ادەبيەت پەن ونەر سالاسىنداعى مەملەكەتتىك سىيلىقتى بەرۋ جونىندەگى كوميسسيانىڭ توراعاسى ەرلان قارين كوميسسيانىڭ سوڭعى شەشىمىنە قاتىستى تۇسىنىكتەمە بەردى. ول بۇل تۋرالى Facebook پاراقشاسىندا جازدى.

ەرلان قارين:

– 2026 جىلعى اباي اتىنداعى ادەبيەت پەن ونەر سالاسىنداعى مەملەكەتتىك سىيلىقتى بەرۋ جونىندەگى كوميسسيانىڭ سوڭعى شەشىمى تۋرالى سول كوميسسيانىڭ توراعاسى رەتىندە تۇسىنىكتەمە بەرە كەتەيىن.

بىرىنشىدەن، كونكۋرسقا تۇسكەن ۇمىتكەرلەردىڭ بارلىعىن سىيلايمىز، قۇرمەتتەيمىز. ولار ءتول رۋحانياتتىڭ دامۋىنا ۇلكەن ۇلەس قوسىپ كەلە جاتقان بەلگىلى تۇلعالار. ءوزىم دە بىرقاتارىن جەكە تانيمىن. بىراق مەملەكەتتىك سىيلىق – تۇلعاعا ەمەس، تۋىندىعا بەرىلەتىن سىيلىق. وسىنىڭ اراجىگىن اجىراتىپ العان دۇرىس. اتاقتى بىرەۋگە ۇناۋ نەمەسە جاعۋ ءۇشىن، رەنجىپ قالماسىن دەگەن سەبەپپەن بەرەتىن بولساق، ونەر ودان دامىمايدى، بۇل اتاقتىڭ مارتەبەسى ارتپايدى.

ەكىنشىدەن، ءبارىمىز تارتىپكە باعىنۋىمىز قاجەت. ۇسىنىلعان تۋىندىلاردىڭ بارلىعى داۋىسقا سالىندى. بىراق داۋىس بەرۋ قورىتىندىسى بويىنشا بىردە-ءبىر جۇمىس كوميسسيا مۇشەلەرىنىڭ ايقىن باسىم داۋىسىنا يە بولا العان جوق. كەرىسىنشە، جۇمىستاردى قولداماعاندار مەن قالىس قالعانداردىڭ ۇلەسى باسىم بولدى. مىسالى، 2023 جىلى گۋمانيتارلىق عىلىمدار سالاسىنداعى ا.بايتۇرسىنۇلى اتىنداعى مەملەكەتتىك سىيلىق لايىقتى جۇمىستاردىڭ جوقتىعىنا بايلانىستى بەرىلگەن جوق. سوندىقتان كونكۋرس بولعاسىن ونىڭ ناتيجەسى دە ءارتۇرلى بولۋى مۇمكىن، ونى دۇرىس قابىلداۋ كەرەك.

ۇشىنشىدەن، وتىرىستىڭ سوڭىندا اباي اتىنداعى مەملەكەتتىك سىيلىققا تۇتاستاي رەفورما كەرەك ەكەنى ايتىلدى. بۇل پىكىردى كەشەلى بەرى جەلى قولدانۋشىلارى دا قولداپ جازۋدا. شىنىندا دا، مەملەكەتتىك سىيلىقتى بەرۋ ءتارتىبى قازىرگى كەزەڭنىڭ تالاپتارىنا سايكەس كەلمەيدى. سىيلىقتىڭ تالاپ، ءتارتىبى عانا ەمەس، مازمۇنى مەن سيپاتى دا وزگەرۋى كەرەك. مىسالى، الەمدەگى ەڭ بەدەلدى نوبەل سىيلىعى 50 نە 70 جاسقا تولعانى ءۇشىن ەمەس، جاڭالىق پەن جاڭاشىلدىق ءۇشىن بەرىلەدى. سول سياقتى اباي اتىنداعى مەملەكەتتىك سىيلىقتى مەرەيتوي يەسىنە، ۇمىتكەردىڭ ماتەريالدىق جاعدايىنا جانە باسقاداي سەبەپتەرگە بايلانىستى ۇسىنۋ جالپى دۇرىس ەمەس.

سوندىقتان، مەملەكەتتىك سىيلىق ءتارتىبى مەن ەرەجەسىنە ۇلكەن وزگەرىس ەنگىزەمىز.

2000 جىلداردان بەرى قاراي ەسەپتەسەك، اباي اتىنداعى مەملەكەتتىك سىيلىق 60-قا جۋىق ادامعا بەرىلگەن ەكەن. دەمەك، شىعارماشىلىق سالانىڭ وسىنشاما وكىلىنە مەملەكەت تاراپىنان ۇلكەن قولداۋ كورسەتىلدى دەگەن ءسوز.

ونىڭ ۇستىنە پرەزيدەنت قاسىم-جومارت توقاەۆتىڭ شەشىمىمەن مەملەكەتتىك سىيلىق يەگەرلەرىنە بەرىلەتىن قاراجات ارتتى. دەمەك، بەدەلدى سىيلىققا ۇسىنىلاتىن تۋىندىلار دا وسىعان لايىق بولۋى شارت.

Abai.kz