ء"بىز قىتايدان قاشاتىنداردى قاۋىپسىز باسپانامەن قامتاماسىز ەتىپ، ولارعا پانا بەرۋدى سۇرايمىز. ادامشىلىق كورسەتىپ، دۇرىس جاساڭىزدار" دەدى پومپەو 2 اقپاندا قازاقستاننىڭ سىرتقى ىستەر ءمينيسترى مۇحتار تىلەۋبەردىمەن بىرگە وتكىزگەن ءباسپاسوز ءماسليحاتىندا.
نۇر-سۇلتانعا 1 اقپاندا تۇندە ۇشىپ كەلگەن پومپەو جەكسەنبى كۇنى تۋىستارى شىڭجاڭدا قامالعان ازاماتتارمەن دە كەزدەستى.
قازاقستان شىڭجاڭدا قۋعىن كورگەنىن ايتىپ، ەلگە قاشىپ كەلگەن بىرنەشە ەتنيكالىق قازاققا وسىندا قالۋعا رۇقسات ەتتى، بىراق ولاردىڭ ەشقايسىسىنا بوسقىن مارتەبەسىن بەرمەي، قىتايداعى قىسىم تۋرالى اقپاراتتى مويىنداۋعا ىقىلاس بىلدىرگەن جوق.
قىتاي شىڭجاڭدا لاگەرلەر اشىپ، وعان ۇيعىرلار، قازاقتار جانە باسقا دا مۇسىلمانداردى قاماپ جاتقانى جايلى اقپارات 2017 جىلى تاراي باستاعان. 2018 جىلى جازدا بۇۇ "شىڭجاڭداعى لاگەرلەردە ءبىر ميلليونعا جۋىق ۇيعىر، قازاق جانە باسقا دا مۇسىلمان وتىر" دەپ مالىمدەگەن. قىتاي بيلىگى باسىندا لاگەرلەردىڭ بارىن جوققا شىعارىپ، كەيىن بۇل جەرلەردى "تەرروريزم مەن ەكسترەميزممەن كۇرەسەتىن جانە كاسىپ ۇيرەتەتىن ورتالىق" دەپ سيپاتتاعان.
2018 جىلدان بەرى الماتى مەن نۇر-سۇلتاندا "تۋىسىمىز شىڭجاڭدا قاماۋدا وتىر" دەگەن ادامدار بىرنەشە رەت جيىن وتكىزىپ، قازاقستان بيلىگىنەن كومەك سۇراعان.
Abai.kz
