قازاقستاندىق قولدانۋشىلار دەمالىس كۇندەرى ينتەرنەت جىلدامدىعى ناشارلاپ، Google سەرۆيستەرىنىڭ دۇرىس ىستەمەي قالعانىن حابارلادى. ولاردىڭ كەيبىرى Gmail پوشتا سەرۆيسىنە كىرە الماعانىنا شاعىمدانسا، ءبىرى ىزدەۋ جۇيەسىن پايدالانا الماي قالعانىن ايتتى.
Android قولدانۋشىلارى قوسىمشا جۇكتەپ الاتىن Play Market تە ىستەمەي تۇرعانىن حابارلادى. كەيبىر قولدانۋشىلار VPN قولدانىپ وتىر.
16 اقپاندا پرەزيدەنتتىڭ ءباسپاسوز حاتشىسى بەرىك ءۋالي قاسىم-جومارت توقاەۆتىڭ "اقپاراتتىق رەسۋرستاردىڭ جۇمىسىن قالپىنا كەلتىرۋدى تاپسىرعانىن" حابارلادى. پرەزيدەنت قازىر گەرمانيادا ىسساپارمەن ءجۇر.
قازاقستاندىق قولدانۋشىلار ەلدە Facebook, Youtube, Telegram, WhatsApp سياقتى الەۋمەتتىك جەلىلەرگە كىرۋ قيىنداپ كەتەتىنىن ايتىپ، ءجيى شاعىمدانادى. ەلدە قانداي دا ءبىر نارازىلىق شارالارى كەزىندە، قوعام نازارىن اۋدارعان بيلىكتىڭ مالىمدەمەلەرىنەن سوڭ الەۋمەتتىك جەلىلەردىڭ جۇمىسىندا اقاۋ بولادى.
وتكەن اپتادا جامبىل وبلىسى قورداي اۋدانىنداعى ەتنيكالىق جانجال كەزىندە دە WhatsApp جەلىسىنە كىرۋ قيىنداعان ەدى.
قازاقستان بيلىگى وسىعان دەيىن بىرنەشە رەت «جەلىدەگى، ينتەرنەتتەگى اقاۋلارعا قاتىسىمىز جوق. قولدانۋشىلار سانى وسكەن سايىن تەحنيكالىق اقاۋ ءجيى بولادى» دەپ مالىمدەگەن.
Abai.kz
