بۇگىن ۇلتتىق قوعامدىق سەنىم كەڭەسىنىڭ مۇشەسى، باسپاگەر ءارى قوعام بەلسەندىسى باقىتجان بۇقارباي سەنىم كەڭەسىنەن شىعاتىنىن مالىمدەدى.

باقىتجان مىرزانىڭ ايتۋىنشا، اتالعان سەنىم كەڭەسى ەلىمىزدەگى ساياسي رەفورمالارعا ەشقانداي اسەر ەتە المايتىن ۇيىم.

سونداي-اق، ول جاعىمدى وزگەرىستەر ءۇشىن قولدان كەلگەننىڭ ءبارىن جاساعانىن، بىراق بيلىك ۇلتتىق كەڭەس مۇشەلەرىنىڭ پىكىرىن تىڭدامايتىنىن اتاپ ءوتتى.

-ءبىزدىڭ ۇسىنىستاردى ەسكەرە وتىرىپ، پرەزيدەنت توقاەۆ جىل سوڭىندا ساياسي رەفورمالاردىڭ ءبىرىنشى پاكەتىن جاريا ەتتى. ياعني پارتيا تىركەۋ جۇمىسىن جەڭىلدەتۋ، بەيبىت جيىن ۇيىمداستىرۋ ءۇشىن حابارلاۋ جۇيەسىنە كوشۋ سياقتى وڭ وزگەرىستەردى زاڭعا ەنگىزۋ تۋرالى ناقتى تاپسىرما بەردى,- دەدى ول.

الايدا، باقىتجان بۇقارباي سوڭعى ازىرلەنگەن «بەيبىت جيىندار تۋرالى» زاڭ جوباسى پرەزيدەنتتىڭ تاپسىرماسىنا ساي بولماي شىققانىن جانە ول حالىقتىڭ، ازاماتتاردىڭ مۇددەسىنە قايشى بولىپ وتىرعانىن مالىمدەدى.

سونىمەن قاتار ول:

-حالىقتىڭ مۇددەسىنە قايشى ارەكەتتەر مەن پيعىلداردى زاڭداستىرۋعا ارالاسقىم كەلمەيدى، سول سەبەپتى ۇلتتىق كەڭەستىڭ قۇرامىنان شىعاتىنىمدى مالىمدەيمىن,-دەدى.

ايتا كەتەيىك، قازاقستان پرەزيدەنتى قاسىم-جومارت توقاەۆ ۇلىقتاۋ راسىمىندە ۇلتتىق سەنىم كەڭەسىن قۇرۋ تۋرالى شەشىم قابىلدادى. كەڭەس قۇرامىنا قوعام بەلسەندىلەرى، ساياساتكەرلەر مەن جۋرناليستەر كىردى.

ۇلتتىق كەڭەس قىزمەتىنىڭ نەگىزگى ماقساتى - ساياسي پارتيالاردىڭ، ازاماتتىق قوعام وكىلدەرىنىڭ قاتىسۋىمەن قوعامدا قوردالانعان ماسەلەلەر بويىنشا ۇسىنىستار ازىرلەۋ.

Abai.kz