بۇگىن يندۋستريا جانە ينفراقۇرىلىمدىق دامۋ مينيسترلىگىندە ارمەنيادا تىركەلگەن كولىكتەردىڭ قازاقستاندىق يەلەرىنىڭ مۇددەسىن قورعايتىن باستاماشىل توپ وكىلدەرىمەن كەزدەسۋ ءوتتى.

كەزدەسۋ بارىسىندا يندۋستريا جانە ينفراقۇرىلىمدىق دامۋ ۆيتسە-ءمينيسترى ا.ەرجانوۆ پەن ىشكى ىستەر ءمينيسترىنىڭ ءبىرىنشى ورىنباسارى م.قوجاەۆ ارمەنيا رەسپۋبليكاسىنان اكەلىنگەن كولىكتەردىڭ قازاقستان اۋماعىندا ەركىن ءجۇرۋى ءۇشىن ساقتالۋى ءتيىس ۇلتتىق جانە ەۋرازيالىق زاڭناما نورمالارىن باستاماشىل توپ وكىلدەرىنە جان-جاقتى ءتۇسىندىرىپ بەردى.

يندۋستريا جانە ينفراقۇرىلىمدىق دامۋ ۆيتسە-ءمينيسترىنىڭ تۇسىندىرۋىنشە، ارمەنياعا جەڭىلدەتىلگەن باج سالىعىمەن اكەلىنگەن كولىكتەر سول ەلدىڭ اۋماعىندا عانا ءجۇرۋى ءتيىس. بۇل ارمەنيانىڭ ەۋرازيالىق وداققا كىرۋى بارىسىنداعى نەگىزگى شارتتاردىڭ ءبىرى بولعان. سونداي-اق ول قازاقستان ازاماتتارىنىڭ ارميان بيلىگىنىڭ سالعىرتتىعى سالدارىنان اۆتوموبيلدەردى ارمەنيادا تۇراتىن ازامات رەتىندە تىركەگەندىكتەرىن اتاپ ءوتتى. بۇل ەاەو زاڭناماسىن بۇزۋ بولىپ سانالادى.

ال باستاماشىل توپ وكىلدەرى وزدەرى الىپ كەلگەن كولىكتەردى تەحنيكالىق رەگلامەنتكە سايكەستىگىنە قاراماستان قازاقستاندا تىركەۋ ءۇشىن قاجەتتى تولەمدەردەن بوساتۋ ارقىلى زاڭداستىرۋدى ۇسىندى. سونىمەن قاتار ولار 2020 جىلدىڭ 1 ناۋرىزىنان باستاپ، ارمەنيادان جەكە تۇلعالاردىڭ اۆتوموبيل اكەلۋىنە تىيىم سالۋدى نەمەسە مۇنداي كولىك قۇرالدارىنا كەمىندە 3 ملن تەڭگە ساقتاندىرۋ ەنگىزۋدى ۇسىنىپ وتىر.

ءوز كەزەگىندە وكىلەتتى ورگانداردىڭ وكىلدەرى قولدانىستاعى زاڭناماعا سايكەس اۆتوموبيلدەردى تىركەۋگە كەڭەس بەردى.

كەزدەسۋ سوڭىندا بۇل ماسەلەنى يندۋستريا جانە ينفراقۇرىلىمدىق دامۋ مينيسترلىگى الاڭىندا تالقىلاۋدى جالعاستىرۋ ۇسىنىلدى. سونىمەن قاتار اۆتوموبيل يەلەرىنە زاڭسىز شەرۋ وتكىزۋ ارقىلى قازاقستان زاڭناماسىن بۇزباۋعا كەڭەس بەرىلدى.

Abai.kz