تالدىقورعان قالاسى «قاراتال» شاعىن اۋدانىندا ستۋدەنتتەرگە ارناپ سالىنعان 288 ورىندىق جاتاقحانا بىرەر ايدىڭ ىشىندە پايدالانۋعا بەرىلمەك.

نىسانعا ارنايى بارعان وبلىس اكىمى اماندىق باتالوۆ جاتاقحانا اينالاسىن اباتتاندىرۋ جوباسىن سىنعا الىپ، جاتاقحانانىڭ ىشكى جابدىقتالۋىنا قاتىستى بىرقاتار ەسكەرتپەلەر ايتتى. سول سياقتى قالانىڭ ىرگەلى نىساندارىنىڭ ءبىرى – جابىق ءجۇزۋ باسسەينىنىڭ دە قۇرىلىس جۇمىستارىنىڭ بارىسىن كوردى.

الدىمەن جاتاقحانا عيماراتىنا كەلگەن وبلىس باسشىسى اماندىق باتالوۆقا نىساننىڭ ماڭايىن اباتتاندىرۋدىڭ باس جوسپارى كورسەتىلدى، ورناتىلاتىن ورىندىقتار، جارىق شامدارى، توسەلەتىن پليتكالار تۇرلەرىنىڭ بىرنەشە ۆاريانتتارى ۇسىنىلىپ، پايدالانىلاتىن نۇسقاسى كەلىسىلدى. اباتتاندىرۋ جۇمىستارىن «ساپا قۇرىلىس» مەكەمەسى جۇرگىزۋدە. باس جوسپاردا كورسەتىلگەندەي، مۇندا جاتاقحانا ماڭى عانا ەمەس، وعان ىرگەلەس ورنالاسقان اۋماقتىڭ بارلىعى ارداگەرلەر پاركىنە دەيىن تۇتاس اباتتاندىرىلماق. وندا بالالار ويىن الاڭدارى، ەرەسەكتەردىڭ تىنىعاتىن ورىن، جۇگىرۋ جولى، ۆوركاۋت، سپورت الاڭى سياقتى بارلىق قاجەتتىلىكتەر قاراستىرىلاتىن بولادى. وبلىس اكىمى جوسپارلانىپ وتىرعان بالالار الاڭى جانە باسقا دا شاعىن الاڭداردىڭ بارلىعىنىڭ جەكە-جەكە جوباسىن سۇرادى. وعان ازىرگە قالا اكىمدىگى دايىن بولماي شىقتى.

- كوكتەم بولسا كەلدى. سەندەر ءالى قاي جەرگە قانداي اعاش ەگەتىندەرىڭدى بىلمەيسىڭدەر. جاتاقحانا ماڭايىن اباتتاندىرعاندا ونىڭ باسقا عيماراتتارمەن، تۇرعىن ۇيلەرمەن شەكتەسىن تۇستارىنىڭ ۇيلەسىمىن دە ءالى ويلاستىرعان جوقسىڭدار. وسى جۇمىسپەن كۇندەلىكتى اينالىسىپ جۇرگەن بولساڭدار، ەگەتىن ءار اعاشتى، توسەيتىن ءار پليتكانى جاتقا بىلەتىن ەدىڭدەر. كەلەسى اپتادا بارلىق جوبالاردى ەگجەي-تەگجەيلى تانىستىراتىن بولىڭدار، - دەگەن اماندىق باتالوۆ ءبىرىنشى ورىنباسارى مەن قالا اكىمىنە ەسكەرتۋ بەرەتىنىن ايتتى. سول سياقتى مەردىگەر كومپانيانىڭ وكىلىنە «جۇمىس ىستەپ جاتقان ادامدارىڭ نەگە از؟ ەرتەڭنەن باستاپ وسى اۋماقتا جۇمىس قايناپ جاتاتىن بولسىن. مەن كۇندە وتەمىن وسى تۇستان. باقىلاپ قاراپ وتىرامىن»، - دەپ ەسكەرتتى.

وبلىس باسشىسى عيماراتتىڭ ءىشىن ارالاپ كورىپ، فويەنى بەزەندىرۋ مەن جابدىقتاۋ تۋرالى ۇسىنىستارىن ايتتى. سول سياقتى جاتىن بولمەلەردەگى قوس يارۋستى توسەكتىڭ ساپاسىن سىنعا الىپ، زامان تالابىنا ساي باسقا كەرەۋەتپەن اۋىستىرۋدى تاپسىردى. اسحانانى، وقىرمان زالىن، كينوزال، دەمالىس بولمەلەرىن ارالادى. ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى قۋات بايمىرزاەۆقا وقۋ ورنىنىڭ ينجەنەرلىك جەلىلەرگە جانە باسقا دا تەحنيكالىق جاعىنان جاۋاپتى ماماندارىنىڭ عيماراتتى تىڭعىلىقتى قابىلداپ الۋىن تاپسىردى. «ايتىلعان كەمشىلىكتەرمەن جۇمىس ىستەڭدەر. جاتاقحانانىڭ ماڭايىنداعى جۇمىستاردى اپتا سايىن ءوزىم قاداعالاپ وتىرامىن»، - دەدى اماندىق باتالوۆ قالا اكىمدىگىنە.

اتاپ وتسەك، بۇل نىسان - ەلباسىنىڭ 5 الەۋمەتتىك باستاماسىن جۇزەگە اسىرۋ ماقساتىندا تالدىقورعاندا ارنايى سالىنعان ستۋدەنتتەردىڭ العاشقى  جاتاقحاناسى.

بۇدان سوڭ وبلىس اكىمى جابىق ءجۇزۋ باسسەينىنىڭ قۇرىلىسىن كورۋگە باردى. كۇنىنە 750 ادام قابىلداۋعا قاۋقارلى باسسەين تالدىقورعاننىڭ ەڭ كورنەكتى نىساندارىنىڭ ءبىرى بولماق. وبلىس باسشىسى قىزۋ ءجۇرىپ جاتقان قۇرىلىس جۇمىستارىنىڭ بارىسىمەن تانىسىپ، ىشكى ارلەۋ جۇمىستارىنىڭ جوباسىن بىرلەسىپ قايتا جاساۋ كەرەكتىگىن ايتتى. سول سياقتى ارنايى ينۆەنتارلارمەن، لەد-ەكران، سۋ استى كامەرالارى سياقتى قۇرال-جابدىقتارمەن قامتۋ ءىسىن ەگجەي-تەگجەيلى ويلاستىرۋ كەرەكتىگىن ايتتى. اتاپ وتسەك، قازىر بۇل نىساندا قۇرىلىس جۇمىستارىنىڭ 70 %-ءى اياقتالعان.

- مۇندا سۋ سپورتىنىڭ بارلىق تۇرلەرىمەن اينالىسۋعا جاعداي جاسالادى. وسى نىساندا بولاشاقتا تالدىقورعاننىڭ مىقتى سپورتشىلارىن، چەمپيوندارىن تاربيەلەيمىز، - دەگەن ا. باتالوۆ عيماراتتىڭ سىرتقى كەلبەتىنە، ماڭايىن اباتتاندىرۋ جۇمىستارىنا قاتىستى بىرقاتار تاپسىرمالار بەردى.

Abai.kz