قازاق حالقى - ءوز جەرىندەگى ءاربىر حالىقتى قۇرمەتتەي بىلەدى
قۇرمەتتى قازاق حالقى!
كوكتەمنىڭ ءبىرىنشى كۇنى مەن ءۇشىن وتە ماڭىزدى كۇن! العىس ايتۋ كۇنى! وسىعان وراي، قازاق حالقىنا كورەي حالقىنىڭ اتىنان شىن جۇرەكتەن ايتار العىسىم شەكسىز.
ءبىزدىڭ اتا-بابالارىمىز 1937 جىلى دەپورتاتسياعا ۇشىراپ، قازاق جەرىنە ەرىكسىز كەلىپ تۇسكەندە، قازاقتار ولارمەن سوڭعى نانىمەن ءبولىسىپ، اجالدان قۇتقارىپ، كومەك بەرگەنى ءۇشىن كورەي حالقىنان العىس بىلدىرەمىن. سول كەزدە قازاق حالقى اتا-بابالارىمىزعا قول ۇشىن بەرمەگەندە، مەن دە بۇل دۇنيەگە كەلمەس ەدىم جانە وسى العىسىمدى ءدال قازىر جازىپ وتىرماس ەدىم. قازاق جەرى كورەيلەر ءۇشىن كيەلى ءارى قاسيەتتى جەر بولىپ تابىلادى.
مەن وزبەكستاندا تۋعانمىن. مەنىڭ وتانىم، تۋعان جەرىم - وزبەكستان. مەن قازاقستانعا اتا-انامنىڭ شاقىرۋىمەن كەلىپ، قازاق ءتىلىن بىلۋگە دەگەن قىزىعۋشىلىعىم ارتىپ، بار ىنتاممەن وقىپ ۇيرەنە باستادىم. ماعان تەك قانا ءتىل ەمەس، جالپى قازاق حالقىنىڭ ءوزى، سالت-ءداستۇرى ۇناي باستادى، ماقالدارىن تۇسىنە باستادىم. سودان وزىمە: "نەگە مەن قازاق ءتىلىن دامىتۋ ءۇشىن وسىنشا جانىمدى بەرىپ جۇمىس جاساپ جاتىرمىن؟"- دەپ سۇراق قويدىم. سول سۇراعىما ءوزىم جاۋاپ تاپقان سياقتىمىن.
مەنىڭ ويىمشا، اللا تاعالا مەنى قازاقستانعا اتا-بابالارىمنىڭ اتىنان العىس ايتۋ ءۇشىن جىبەرگەن سياقتى. سول قيىن كەزدە مەنىڭ اتا-باباما كومەك بەرگەن قازاق حالقىنا دەگەن قۇرمەتىمدى ارقاشاندا العا قويامىن.
قازاق حالقىنىڭ ەڭ جاقسى قاسيەتتەرىنىڭ ءبىرى بۇل وسى جەردە تۇرىپ جاتقان ءاربىر حالىقتى قۇرمەتتەي بىلەدى. مىسالى، بىزدەر،كورەي حالقى تۋرالى ۇنەمى “ەڭبەككور “دەپ اتايدى. بۇل ءبىزدى جوعارى باعالاي بىلگەنى دەپ ەسەپتەپ، ءارى قاراي قازاق جەرى ءۇشىن، ونىڭ جان-جاقتى دامۋىنا جان اياماي، ەڭبەك ەتۋگە دايىنمىن.
سوندىقتان ءوز باسىم قازىر قازاق ءتىلىن دامىتۋدا جۇمىس ىستەي باستادىم. ال مەنىڭ ماقساتىم جانە ارمانىم قازاقستانداعى بارلىق ادامداردىڭ قازاقشا ەركىن سويلەي ءبىلۋى.
ۆلاديسلاۆ تەننىڭ الەۋمەتتىك جەلىدەگى جازباسى
Abai.kz
