وتكەن ايدا جامبىل وبلىسىنىڭ قورداي اۋدانىندا بولعان شەتىن وقيعا قازاق قوعامىن قاپ ەتكىزگەنى بەلگىلى. اقپاننىڭ باسىنداعى بۇل وقيعاعا كۇنى بۇگىنگە دەيىن ءتىلى جەتىپ، ءسوزى تابىلعاننىڭ ءبارى وزىنشە باعا بەرۋگە تىرىستى. ۇكىمەتتىك كوميسسيا قۇرىلدى. جەرگىلىكتى باسشىلىق اۋىستى. پرەزيدەنت توقاەۆتىڭ ءوزى كەلىپ، ءىستىڭ ءمان-جايىمەن تانىسىپ كەتتى. كىنالىلەر مەن سەبەپ-سالدار انىقتالدى. ماتەريالدىق شىعىن تولىقتاي وتەلەتىن بولدى. بيۋدجەتتەن 1,7 ميلليارد تەڭگە بولىنەتىنى حابارلاندى. ەكى جاقتىڭ اقساقالدارى ەل-جۇرتتى سابىرعا شاقىرىپ، قول الىستى، كەۋدە قاعىستى. بۇل تۋرالى باق-تا ەگجەي-تەگجەيلى جازىلدى. قايتالاپ جاتپايىق.

وسىدان سوڭ، «جابىرلەنۋشى» رولىندەگى ازاماتتار ۇكىمەتكە ءدان ريزا بولىپ، راحمەت ايتار، بيلىكتىڭ «بىرلىگى جاراسقان كوپۇلتتى مەملەكەت» ۇرانىنا شىنايى ۇلەس قوسار دەپ ۇمىتتەنگەن ەدىك. الايدا الەۋمەتتىك جەلىگە ان حۋساي داۋروۆ دەيتىن ادامنىڭ قىتاي بيلىگىنە قايرىلا سويلەپ، قارجىلاي كومەك سۇراعان ءۇشبۋ حاتى تاراپ كەتتى.

الەۋمەتتىك جەلىدەگى الگى اقپاردا حاتتىڭ اۆتورى - حۋساي داۋروۆ دەپ كورسەتىلىپتى. بۇل ادام بىلدەي قازاقستان حالقى اسسامبلەياسى، دۇنگەن قاۋىمداستىعىنىڭ باسشىسى ەكەن. ءدال وسى ادام قازاقستان ازاماتى بولا تۇرا، زار جىلاپ شەتەلدەن، قىتايدان قارجىلاي كومەك سۇراپتى. انىعىن ايتساق، حۋساي داۋروۆتىڭ قىتايدان كومەك سۇراپ جازعان ءۇشبۋ حاتى الەۋمەتتىك جەلىلەرگە تاراپ كەتتى.

وسىدان سوڭ، ءبىز قازاقستاننىڭ باس پروكۋراتۋراسىنا، ۇلتتىق قاۋىپسىزدىك كوميتەتىنە، «نۇر وتان» پارتياسىنا قاراتا ماقالا جازدىق. جۋرناليست قۋانىش قاپپاستىڭ «داۋدىڭ باسى داۋروۆتىڭ حاتى بولىپ تۇر...» اتتى ماقالاسىن سايتىمىزدا 10 مىڭعا جۋىق ادام وقىپ، پىكىر جازدى.

وندا الگى ايدىك بولعان حاتتىڭ اۆتورى شىن مانىندە قازاقستان ازاماتى حۋساي داۋروۆ پا، الدە بۇل ارانداتۋشىلىقتان تۋعان ارەكەت پە، دەدىك. ەگەر داۋروۆ شىندا الگى حاتتى جازعان بولسا، قازاقستان ازاماتىنىڭ بوتەن مەملەكەتتىڭ بيلىگىنەن قارجىلاي كومەك سۇراۋى قانشالىق زاڭدى، دەدىك. انىق-قانىعىن قۇزىرلى ورگاندارى انىقتاۋى كەرەك، دەدىك.

«نۇر وتاننىڭ» جاۋاپ حاتى

ايتىلعان ءسوز اتالعان مەجەگە جەتتى. رەداكتسيامىزعا «نۇر وتان» پارتياسى رەسپۋبليكالىق قوعامدىق قابىلداۋ بولىمىنەن جاۋاپ حات كەلىپ ءتۇستى.

«نۇر وتان» پارتياسى دۇنگەن قاۋىمداستىعىنىڭ باسشىسى ان حۋساي داۋروۆتىڭ ءىس-ارەكەتى تۋرالى جازىلعان جۋرناليست قۋانىش قاپپاستىڭ ماقالاسىن باس پروكۋراتۋرا مەن ۇلتتىق قاۋىپسىزدىك كوميتەتىنە جولداپ، اتالعان مالەسەنى قاراپ، ناتيجەسىن حابارلاۋدى سۇراپتى.

باس پروكۋراتۋرانىڭ حاتى

ارتىنشا قر باس پروكۋراتۋراسى، قوعامدىق مۇددەلەردى قورعاۋ قىزمەتىنىڭ باسشىسى ساپاربەك نۇرپەيىسوۆتىڭ حاتى رەداكتسيامىزعا كەلدى.

وندا «قاراۋ ناتيجەلەرى تۋرالى ءوتىنىش يەسىنە (قۋانىش قاپپاسقا) جانە «نۇر وتان» پارتياسىنىڭ رەسپۋبليكالىق قوعامدىق قابىلداۋ بولىمىنە زاڭمەن بەلگىلەنگەن مەرزىمدە حابارلاۋدى سۇرايمىز»، دەپ جازىلعان.

ءتۇيىن. جاڭاعى جىلاپ-سىقتاپ، كومەك سۇراعان حاتتى حۋساي داۋروۆ جازدى ما؟ بىرەۋدى ناقاق ايىپتاپ، كۇيە جاعۋ ماقساتىمىز ەمەس. الەۋمەتتىك جەلىدەگى ءارتۇرلى اڭگىمەنىڭ انىق-قانىعىن قۇزىرلى ورگاندار انىقتاۋى كەرەك.  نە دە بولسا، قىتايعا قاراتا جازعان بۇل جازبا ەل تىنىشتىعىنا مۇددەلى ءاربىر ازاماتتىڭ كوڭىلىنە ەكىۇداي وي سالادى.

Abai.kz