مۇرات ماسانوۆتىڭ جيەن اعاسى باقتيار ابدىشەۆتىڭ ازاتتىققا ايتۋىنشا، قازىر اۋلەت جانازاعا دايىندالىپ جاتىر.

- وسىعان دەيىن اكەسىنەن قان الىنعان. ەكسپەرتيزا قورىتىندىسى شىقتى، "بىزگە اكەسى مەن بالانىڭ قانى سايكەس كەلدى" دەدى. قۇجاتتارى بار، بىراق ءوزىم ءالى كورمەدىم. ارينە، سەنگىم كەلمەيدى، بىراق سولاي بولىپ تۇر. 5 ناۋرىزدا جەرلەيمىز، - دەيدى ول ازاتتىققا.

مۇرات ماسانوۆتىڭ جەزدەسى باۋىرجان نۇرعالي دە بۇل اقپاراتتى راستادى.

- جولعا شىعىپ بارا جاتقان جەرىمنەن تۋىستارىمنان سونداي اقپاراتتى ەستىدىم. ەندى كەرى قايتىپ بارا جاتىرمىن، - دەدى ول.

بۇل ماسەلەگە قاتىستى جامبىل وبلىستىق پوليتسيا دەپارتامەنتى مەن قورداي اۋداندىق پوليتسيا باسقارماسىنان اقپارات الۋ مۇمكىن بولمادى. ەكى ورگان دا رەسمي مالىمدەمە تاراتقان جوق.

وسىعان دەيىن مۇراتتىڭ اپكەسى اقمارال ءابدىراحمان ءىنىسىنىڭ جانجال بولعان كۇنى كەشكە ءماسانچيدىڭ جانىنداعى قاراساي اۋىلىنداعى تۋىستارىنا بارام دەپ ۇيدەن شىعىپ كەتىپ، قايتىپ ورالماعانىن ايتىپ ەدى. ونىڭ سوزىنشە، باۋىرىنىڭ ورتەنگەن كولىگى 8 اقپاندا ماسانچي اۋىلىنىڭ ماڭىنان تابىلعان. كەيىن مۇرات ماسانوۆتىڭ تۋىسقاندارى پروكۋراتۋرا مەن پوليتسياعا ارىز جازعان.

7 اقپان كەشكە جامبىل وبلىسى قورداي اۋدانىندا قازاقتار مەن دۇنگەندەر جانجالداسىپ، رەسمي دەرەك بويىنشا، 10 ادام قازا تاۋىپ، 180-نەن اسا ادام زارداپ شەككەن. كەيىن جانجال بولعان ماسانچي اۋىلىندا قيراعان عيماراتتان تاعى ءبىر ادامنىڭ مۇردەسى تابىلدى.

قوردايداعى جانجال كەزىندە قىرعىزستانمەن شەكاراعا جاقىن ورنالاسقان، نەگىزىنەن ەتنيكالىق دۇنگەندەر تۇراتىن ماسانچي، سورتوبە، اۋقاتتى اۋىلدارىندا، رەسمي مالىمەت بويىنشا، 20 ساۋدا ورنى مەن 39 ءۇي ءبۇلىنىپ، 47 كولىك ورتەندى. ۇكىمەت قاقتىعىستا قيراعان ۇيلەر مەن ساۋدا ورىندارىن قالپىنا كەلتىرۋگە كومەكتەسەتىنىن مالىمدەگەن.

بيلىك جانجال قارت ەر ادامنىڭ جارالانۋىمەن اياقتالعان جول ۇستىندەگى كيكىلجىڭنەن شىققان دەپ مالىمدەدى. كيكىلجىڭنەن سوڭ قازاقتار (كوبى – قاراكەمەر اۋىلىنىڭ تۇرعىنى) جينالىپ، دۇنگەندەر تۇراتىن اۋىلدارعا بارعان.

قازاقستان ۇكىمەتى جانجالعا بايلانىستى 90 قىلمىستىق ءىس قوزعالعانىن مالىمدەدى. قوردايداعى جانجالدان سوڭ جامبىل وبلىسىنىڭ اكىمى اسقار مىرزاحمەتوۆ باستاعان بىرنەشە شەنەۋنىك جانە پوليتسيا دەپارتامەنتىنىڭ باسشىسى قىزمەتتەن كەتتى. ونىڭ ورنىنا سول كەزدە پرەمەر-ءمينيستردىڭ ورىنباسارى بولعان بەردىبەك ساپارباەۆ تاعايىندالدى.

Abai.kz