2020 جىلدىڭ ەكى ايى ىشىندە جالپى ۇزىندىعى 682 شاقىرىمدى قۇرايتىن 4 اقىلى جول ۋچاسكەسىنەن تۇسكەن قاراجات 643,1 ملن تەڭگەنى قۇرادى. 

قازاقستاندىقتار رەسپۋبليكالىق ماڭىزى بار «نۇر-سۇلتان – تەمىرتاۋ» تاسجولىمەن ءجۇرىپ وتكەنى ءۇشىن 215,5 ملن تەڭگە تولەسە، «نۇر-سۇلتان – شۋچينسك» تاسجولىنان تۇسكەن قاراجات مولشەرى 167 ملن تەڭگەنى قۇرادى. «الماتى-قاپشاعاي» جولىنان 140,1 ملن تەڭگە، «الماتى – قورعاس» جولىنان 120 ملن تەڭگە جينالعان. 

ايتا كەتۋ كەرەك، وتكەن جىلى اقىلى جول ۋچاسكەلەرىنەن جينالعان قاراجات مولشەرى 5,4 ملرد تەڭگەنى قۇرادى. ونىڭ 3,8 ملرد تەڭگەسى – اقىلى جولداردى كۇتىپ ۇستاۋ شارالارىنا، 1,6 ملرد تەڭگەسى – تولەم الۋ جۇيەسىنە قىزمەت كورسەتۋ شارالارىنا جۇمسالعان بولاتىن. 

ەسكە سالايىق، 2019 جىلدىڭ جەلتوقسانىندا ينۆەستيتسيالىق كونكۋرستىڭ قورىتىندىلارى بويىنشا جولداردىڭ 11 مىڭ شاقىرىمىندا تولەم الۋ جۇيەسىن ورناتۋ جانە ونى كۇتىپ ۇستاۋ تۋرالى قۇجاتقا قول قويىلدى. كەلىسىمگە سايكەس بيىل رەكونسترۋكتسيادان وتكەن 5,7 مىڭ شاقىرىمدىق جولداردىڭ ۋچاسكەلەرىندە تولەم الۋ جۇيەسى ورناتىلادى دەپ جوسپارلانۋدا. جولداردىڭ قالعان 5,3 مىڭ شاقىرىمى 2024 جىلعا دەيىن رەكونسترۋكتسيالاۋ شارالارىنىڭ اياقتالۋ مەرزىمىنە بايلانىستى اقىلى بولماق. وسىلايشا، جۇيە اقىلى جولداردىڭ كۇتىمىنە جىل سايىن بيۋدجەت قاراجاتىنىڭ ءبولىنۋىن بولدىرمايدى. 

Abai.kz