وتاندىق بالالار كيىمىنىڭ Mimioriki برەندى جانە رەسەي مەن تمد ەلدەرىندەگى Disney كومپانياسى بالالارعا ارنالعان كيىم-كەشەكتىڭ جاڭا توپتاماسىنىڭ ساتىلىمىنا مۇمكىندىك بەرەتىن ليتسەنزيالىق كەلىسىمگە قول قويدى. بۇل قازاقستاننىڭ جەڭىل ونەركاسىبى ءۇشىن ايرىقشا جاڭالىق بولىپ وتىر. 

Disney كومپانياسى رەسەي نارىعىنداعى №1 ليتسەنزيات بولا وتىرىپ، ءىرى حالىقارالىق كومپانيالارمەن، رەسەيلىك وندىرۋشىلەرمەن جانە ديستريبيۋتورلارمەن بەلسەندى تۇردە سەرىكتەسە جۇمىس جۇرگىزەدى. قازىرگى تاڭدا كومپانيانىڭ 300-گە تارتا سەرىكتەس-ليتسەنزياتى بار. ولاردىڭ قاتارىندا نارىقتا مويىندالعان كوشباسشىلار دا، جاڭادان وركەندەپ كەلە جاتقان جاس كومپانيالار دا جەتكىلىكتى. وتاندىق Mimioriki برەندى – رەسەي مەن تمد ەلدەرىندەگى Disney كومپانياسىنىڭ ەڭ العاشقى ليتسەنزياتى. 

كەلىسىم شارتىنا سايكەس، قازاقستاندىق برەند كيىم-كەشەك ديزاينىندا «مۇزدى ولكە»، «ارىستان پاتشا»، «اڭدار ءپوليسى» سەكىلدى Disney فيلمدەرىنىڭ كوپشىلىك سۇيەتىن كەيىپكەرلەرىنىڭ، Disney-ءدىڭ ميككي ماۋس جانە ۆينني قونجىق سەكىلدى كلاسسيكالىق كەيىپكەرلەرىنىڭ، سونىمەن قاتار MARVEL كينوالەمىندەگى ورمەكشى-ادام، تەمىر ادام، حالك پەن كاپيتان امەريكانىڭ، «جۇلدىزدى شايقاستار» داستانىنداعى كەيىپكەرلەردىڭ سۋرەتتەرىن پايدالانا الادى. Mimioriki ليتسەنزيالىق جەلىسىندە فۋتبولكالار، جەمپىرلەر، سۆيتشوتتار، شالبارلار، كويلەكتەر جانە تاعى باسقا كوپتەگەن زاتتار بار. 

«Mimioriki سەكىلدى نارىقتىڭ ءىرى ويىنشىسىمەن سەرىكتەستىك قازاقستان تۇتىنۋشىلارىنا جەتۋ جولىندا رەسەي مەن تمد-داعى Disney كومپانياسى ءۇشىن ماڭىزدى كەزەڭ بولىپ وتىر. ەل ىشىنەن ورىن تاپقان بەيىلدى اۋديتورياسى مەن تولىققاندى وزىندىك وندىرىستىك تسيكلى بار ايرىقشا برەند تۇتىنۋشىلاردىڭ تالاپ-تىلەگىنە ساي كەلەرى ءسوزسىز. ءبىز بالالار مەن ولاردىڭ اتا-انالارىن قۋانتاتىن Mimioriki برەندىمەن بىرگە جاڭا كوللەكتسيالاردى قۇرۋ مۇمكىندىگىنىڭ پايدا بولعانىنا قۋانىشتىمىز»، - دەيدى رەسەي مەن تمد-داعى Disney كومپانياسىنىڭ ليتسەنزيالاۋ جانە بولشەك ساۋدامەن جۇمىس دەپارتامەنتىنىڭ ديرەكتورى سەرگەي پيچۋگين. 

Mimioriki كومپانياسى The Walt Disney Company ارنايى ازىرلەگەن حالىقارالىق ILS ەڭبەك ستاندارتىنىڭ سايكەستىگى بويىنشا الەۋمەتتىك اۋديتتەن ءساتتى ءوتتى. بۇل پروتسەدۋرا كەلىسىمگە قول قويۋدا مىندەتتى بولىپ سانالادى. 

«بۇل ءبىز ءۇشىن زور ماقتانىش ءارى اۋقىمدى سىن بولماق! ءبىر جاعىنان Disney-ءدىڭ جاھاندىق ۇلكەن تاريحىندا ءىزىمىز بولاتىنىنا، سۇيىكتى كەيىپكەرلەر سۋرەتتەلگەن جانە ءبىزدىڭ اۋديتورياعا قازاق جانە ورىس تىلىندەگى ۇرانسوزدەر جازىلعان كيىم-كەشەكپەن بالالارعا شاتتىق سىيلايتىنىمىزعا قۋانىشتىمىز. ەكىنشى جاعىنان بۇل قادام ءبىزدىڭ كومپانيانىڭ ءار مامانى ءۇشىن وراسان زور ءوسىم بولارى داۋسىز. سەبەبى Disney ستاندارتتارىنىڭ تالابى تىم جوعارى»، - دەدى Mimioriki كومپانياسىنىڭ باس ديرەكتورى يننا اپەنكو. 

كەلىسىمگە كەلە وتىرىپ Mimioriki بالالار كيىم-كەشەگى ءوندىرىسىن 30% ارتتىرىپ، Disney كەيىپكەرلەرى سۋرەتتەلگەن 100 مىڭعا تارتا ءونىم شىعارۋدى كوزدەيدى. Disney كلاسسيكاسىنداعى العاشقى كوللەكتسيالار – تەڭدەسسىز ميككي مەن مينني 2020 جىلدىڭ 1 ساۋىرىندە ساتىلىمعا شىعادى. بۇكىل جاڭا ءونىم قازاقستان اۋماعىندا ساتىلادى. قازىرگى تاڭدا Mimioriki-ءدىڭ قازاقستاندا فرانشيزا بويىنشا 4 جەكە جانە 11 اشىق دۇكەنى بار. ءار ماۋسىمدا 9-10 كوللەكتسيا نەمەسە 450 بىرەگەي مودەل شىعارادى. 

Disney ليتسەنزيالىق كيىمى Mimioriki برەندىنىڭ بارلىق فيرمالىق دۇكەندەرىندە، برەندتىڭ سەرىكتەس دۇكەندەرىندە، مامانداندىرىلعان بالالار بولشەك ساۋداسى مەن ونلاين ماركەت-پلەيستاردا ساۋداعا قويىلادى. 

Abai.kz