اقپاراتقا قاراعاندا، «اشىق رەسەي» ۇيىمى، «وزگەرىستەر پارتياسى» جانە «ازاماتتىق قوعام» قوزعالىسى 21-22 ناۋرىزدا ماسكەۋدىڭ ساحاروۆ داڭعىلىندا ميتينگ وتكىزۋ بويىنشا ماسكەۋ مەرياسىنا ءوتىنىش جازدى. ولار ميتينگكە 50 مىڭ ادام قاتىساتىنىن ايتىپ وتىر.
10 ناۋرىزدا مەملەكەتتىك دۋما كونستيتۋتسياعا ەنگىزىلگەن جاڭا وزگەرىستەردى ماقۇلدادى. وعان سايكەس، ۆلاديمير ءپۋتيننىڭ وسىعان دەيىنگى پرەزيدەنتتىك مەرزىمدەرى جوققا شىعارىلىپ، ول قايتادان 2024 جىلى وتەتىن سايلاۋعا قاتىسۋعا مۇمكىندىك الا الادى.
داۋىس بەرۋ الدىندا پۋتين مۇنداي ۇسىنىسقا «كونستيتۋتسيالىق سوت ماقۇلداعان جاعدايدا كەلىسەتىنىن» ايتقان.
«مۇنداي ۆاريانت بولۋى مۇمكىن. بىراق كونستيتۋتسيالىق سوت مۇنداي وزگەرتۋ باس زاڭنىڭ قاعيدالارىنا قارسى كەلمەيدى دەپ تاپسا عانا ىسكە اسىرىلۋى كەرەك»، - دەگەن پۋتين.
جىل باسىندا پۋتين فەدەرالدىق وتىرىستا جاساعان ۇندەۋىندە باس زاڭعا وزگەرىستەر ەنگىزۋ ارقىلى پارلامەنتتىڭ قۇقىقتارىن كوبەيتۋدى سۇراعان.
67 جاستاعى ءپۋتيننىڭ بيلىك باسىنا كەلگەنىنە 20 جىل بولدى.
Abai.kz
