بيىل ناۋرىز مەرەكەسى تويلانبايتىن بولدى. ءوزارا جاقىن تۋىستار اراسىندا اتاپ وتۋگە تىيىم سالىنبايدى. ال بۇرىنعىداي جالپىحالىقتىق ماسششتابتاعى اۋقىمدى ءىس-شارالارعا رۇقسات جوق. بۇل تۋرالى بۇگىن قر ۆيتسە-پرەمەر ءمينيسترى ەرالى توعجانوۆ مالىمدەدى.

"بۇل ءداستۇر. ۇلكەن مەيرام. الايدا ازاماتتاردىڭ قاۋىپسىزدىگى ماڭىزدى.ءبىز ءنوپىر حالىق جينالاتىن ورىنداردا ناۋرىزدى تويلاۋعا تىيىم سالامىز.

بىراق، ءبىر-بىرلەرىنىڭ ۇيلەرىنە بارۋدى ەشكىم باقىلاپ ۇستاپ وتىرا المايدى. بۇل ەندى ازاماتتاردىڭ ءوز اقىل-ساناسىنا بايلانىستى. ولار تەك وزدەرىنىڭ عانا ەمەس، قوعامنىڭ، ءوز وتباسىنىڭ قاۋىپسىزدىگىن ويلاۋى كەرەك.

مەنىڭشە، تۋىسقاندار ءبىر-بىرلەرىن قۇتتىقتاعاندا تۇرعان ەشتەڭە جوق دەپ ەسەپتەيمىن. الايدا 100-500 ادام جينالاتىن ورىنداردا ناۋرىز تويلاۋعا تىيىم سالىنادى", دەدى ۆيتسە-پرەمەر توعجانوۆ.

قازىر ورتالىق كوممۋنيكاتسيالار قىزمەتىندە ۇكىمەت باسشىسىنىڭ ورىنباسارى ەرالى توعجانوۆ، دەنساۋلىق ساقتاۋ ءمينيسترى ەلجان ءبىرتانوۆ، مادەنيەت جانە سپورت ءمينيسترى اقتوتى رايىمقۇلوۆا جانە باسقا دا جاۋاپتى تۇلعالاردىڭ قاتىسۋىمەن بريفينگ ءوتىپ جاتىر.

وندا ۆيتسە-پرەمەر ەرالى توعجانوۆ 13 ناۋرىزدان باستاپ ەلدە بىرقاتار شەكتەۋ ەنگىزىلەتىنىن ايتتى.

بۇقارالىق سيپاتتاعى ءىس-شارالارعا تىيىم سالىنادى

"10 ناۋرىزدان باستاپ مەرەكەلىك، سپورتتىق، مادەني كوپشىلىك ءىس-شارالار، سەمينارلار، كورمەلەر وتكىزۋگە تىيىم سالىنادى.

ەكىنشىدەن، دەنساۋلىق ساقتاۋ، ءبىلىم بەرۋ وبەكتىلەرىندە جانە قوعامدىق كوپشىلىك ورىنداردا، حالىقتىق قامتاماسىز ەتۋ ورتالىقتارى، كوممۋنالدىق شارۋاشىلىق، تاماق ونەركاسىبى، ساۋدا-بازارلاردا، قوعامدىق تاماقتانۋ، ۆوكزالدار، اۋەجايلار، قوناق ۇيلەردە كۇشەيتىلگەن سانيتارلىق دەزينفەكتسيالىق رەجيمدى ورناتامىز.

ۇشىنشىدەن، قارتتار مەن مۇمكىندىگى شەكتەۋلى ادامدارعا ارنالعان الەۋمەتتىك وبەكتىلەرگە، الەۋمەتتىك وڭالتۋ ورتالىقتارىنا، مۇگەدەك بالالارعا ارنالعان وقۋ ورتالىقتارىنا بارۋعا تىيىم سالىنادى. كانيكۋل كەزىندە وقۋشىلاردىڭ وڭىردەن تىس جەرلەرگە ەكسكۋرسيا جاساۋىنا تىيىم سالىنادى. قوعامدىق كولىكتەر جۋىلادى، دەزينفەكتسيالانادى",  دەدى ۆيتسە-پرەمەر.

وقۋشىلار دەمالىسقا شىعادى، ستۋدەنتتەر قاشىقتىقتان وقيدى

سونداي-اق، مەكتەپ وقۋشىلارى 16 ناۋرىزدان باستاپ دەمالىسقا شىعاتىن بولدى.

"ورتا ءبىلىم بەرۋ ۇيىمدارىن كانيكۋلعا 2020 جىلعى 16 ناۋرىزدان باستاپ 5 ساۋىرگە شىعۋىن قامتاماسىز ەتەمىز. 16 ناۋرىزدان باستاپ، كوللەدجدەر مەن جوو-لار قاشىقتىقتان وقىتۋعا كوشەدى. ونىڭ ىشىندە ءبىلىمدى باعالاۋدىڭ بارلىق تۇرلەرىن قاشىقتىقتان جۇرگىزۋگە اۋىستىرىلادى", دەدى ۆيتسە-پرەمەر.

كينوتەاترلار جۇمىسىن توقتاتادى

كوروناۆيرۋستىڭ تارالۋ قاۋپىنە بايلانىستى ويىن-ساۋىق ورتالىقتارىنداعى كينوتەاترلار جۇمىسىن توقتاتادى.

"ساۋدا ورتالىقتارى، سونىڭ ىشىندە بازارلار جۇمىس ىستەيتىن بولادى. مەملەكەت حالىقتى ازىق-تۇلىكپەن قامتاماسىز ەتۋى كەرەك. ويىن-ساۋىق ورتالىقتارىنداعى كينوتەاترلار جۇمىسىن توقتاتاتىن بولادى. بۇل وڭاي ماسەلە بولعان جوق. فيلم از دەگەندە ءبىر ساعات كورسەتىلەتىنىن بىلەسىزدەر. عيمارات ىشىندە كوپتەگەن ادامنىڭ ءبىر ۋاقىتتا ۇزاق بولۋى كوپتەگەن سۇراق تۋىنداتتى، سول سەبەپتى وسىنداي شەشىم قابىلدادىق",  دەدى ەرالى توعجانوۆ.

توي جاساۋعا بولمايدى

ەرالى توعجانوۆ ەلدە ەنگىزىلىپ جاتقان شارالارعا قاتىستى ءسوز ەتكەندە قازاقتىڭ تويى تۋرالى ايتتى.

"قازىر بۇل - ءجيى تالقىلانىپ جۇرگەن ماسەلەنىڭ ءبىرى. توي وتكىزۋشىلەر جاقسىلاپ ويلانۋى كەرەك. ويتكەنى بۇل ادام كوپ جيانالاتىن جەر. توي ءار وتباسى ءۇشىن ماڭىزدى ەكەنى بەلگىلى. شاقىرعان سوڭ، ادامدار تويعا بارعىسى كەلەدى. الايدا توي جاسايتىن ادام ءوز قاۋىپسىزدىگىمەن قوسا، تۋعان-تۋىستارىن، جاقىندارىن دا ويلاسىن. قازاقستان ازاماتتارىن جيىن-تويلارعا بايلانىستى جاقسىلاپ ويلانۋدى تاعى دا سۇرايمىز", دەدى ۆيتسە-پرەمەر.

ەسكە سالا كەتەيىك، كەشە، دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحان گەبرەيەسۋس كوروناۆيرۋستىق ينفەكتسيانى پاندەميا دەپ جاريالاعان ەدى.

Abai.kz