10 ناۋرىزدا بريتان سوتى قازاقستاننىڭ بۇرىنعى پرەزيدەنتىنىڭ ۇلكەن قىزى ءارى پارلامەنت سەناتىنىڭ سپيكەرى داريعا نازارباەۆا مەن ونىڭ ۇلى ءنۇرالى اليەۆتى لوندونداعى قۇنى 100 ميلليون دوللاردان اساتىن، كۇدىككە ىلىنگەن ءۇش جىلجىمايتىن مۇلىكتىڭ يەلەرى دەپ اتاعان ەدى. بريتان باسىلىمدارىنىڭ جازۋىنشا، نازارباەۆ وتباسى "قايدان الىنعانى بەلگىسىز" مۇلىكتەردى بۇعاتتاعان بيلىك شەشىمىن سوتقا بەرگەن.
"جەكەلەگەن سوت پروتسەستەرىنە بايلانىستى تۇسىنىكتەمە بەرۋ ءۇشىن سوتتىڭ اياقتالۋىن كۇتۋ كەرەك. بۇل پروتسەسس بويىنشا بارلىق ماتەريالدى زەرتتەپ، تەك سودان كەيىن عانا كاسىبي زاڭگەر پىكىرىن ايتا الادى. سونىڭ وزىندە بۇل زاڭگەردىڭ جەكە پىكىرى بولماق. مەملەكەتتىك ورگاننىڭ ۇستانىمى بولۋى ءۇشىن وزگە دە جايتتار انىقتالۋى كەرەك. ارنايى رەسمي ورگانعا ساۋال جىبەرىپ، بۇل مەملەكەتتىك ورگاننىڭ قۇزىرىندا بولۋى كەرەك" دەدى مارات بەكەتاەۆ.
بەكەتاەۆ اقپارات قۇرالدارىن "لاۋازىمدى تۇلعالاردىڭ وكىلەتىنە سايكەس سۇراق قويۋعا" شاقىردى.
"[ادىلەت مينيسترلىگى اكتيۆتەردىڭ زاڭدىلىعىن انىقتاۋعا تىرىسا ما؟] بۇل سۇراق ادىلەت مينيسترلىگىنىڭ قۇزىرىندا ما؟ بۇل سۇراققا قاتىستى ءدال قازىر تۇسىنىكتەمە بەرۋگە قۇقىعىم بار ما؟ سوت پروتسەسى اياقتالعان جوق جانە ەشقانداي ماتەريال مەن قۇجات تا جوق، سوندىقتان بۇل سۇراققا جاۋاپ بەرمەيمىن. سول سەبەپتى سىزدەردى جۋرناليستىك ەتيكانى ساقتاپ، ناقتى لاۋازىمدى تۇلعالاردىڭ وكىلەتىنە ساي سۇراق قويۋلارىڭىزدى سۇرايمىن" دەدى بەكەتاەۆ.
BBC سايتىنىڭ جازۋىنشا، ەگەر نازارباەۆا، اليەۆ پەن ولاردىڭ وفشورلىق كومپانيالارى كۇدىككە ىلىنگەن داۋلى ۇيلەردىڭ زاڭدى جولمەن كەلگەن اقشاعا ساتىپ الىنعانىن سوتتا دالەلدەي السا، وندا "قايدان الىنعانى بەلگىسىز بايلىق" رەتىندە بۇعاتتاۋعا بەرىلگەن وردەردىڭ كۇشى جويىلادى. ال ەگەر ولار دالەلدەي الماسا، وندا بيلىك الگى ۇيلەردى تاركىلەپ، اۋكتسيون ارقىلى ساتۋدى تالاپ ەتەتىن بولادى. بۇل ءىس بويىنشا قىلمىستىق جاۋاپكەرشىلىك قاراستىرىلماعان، "مۇلىك يەلەرىنە ەشقانداي ايىپ تاعىلمايدى، بۇل داۋ ولاردىڭ كىنالى يا كىناسىزدىگى جايلى ەمەس" دەپ جازادى بريتان باسىلىمى.
ۇلىبريتانيا بيلىگى بۇرىنعى سوۆەت وداعى قۇرامىندا بولعان ەلدەردەن شىققانداردىڭ كۇماندى اقشانى زاڭداستىرۋىنا قارسى كۇرەستى 2018 جىلى باستاعان. بريتان سوتى وسى كەزگە دەيىن قۇنى ونداعان ميلليون فۋنت ستەرلينگ تۇراتىن مۇلىكتى بۇعاتتاعان.
Abai.kz
