سونىمەن قر دەنساۋلىق ساقتاۋ مينيسترلىگىنىڭ باسشىسى ەلجان ءبىرتانوۆ COVID-19 كوروناۆيرۋسىن جۇقتىرعان ءۇش قازاقستاندىقتىڭ گەرمانيا مەن ميلاننان ۇشىپ كەلگەندەرىن مالىمدەدى. ءيا، بولارى بولدى! بۇكىل حالىق الاڭداي كۇتىپ وتىرعان قورقىنىشتى جاعداي ەل تابالدىرىعىنان اتتادى. رەسمي مالىمەتتەن بار بىلەتىنىمىز – بىرەۋى 1974 جىلى تۋعان ەر ادام، ەكىنشىسى 1984 جىلى تۋعان ايەل ادام. ءۇشىنشىسى ميلاننان نۇر-سۇلتانعا ۇشىپ كەلگەن ايەل ادام.

ال، بۇل ادامداردىڭ ناقتى اتى-ءجونى كىمدەر؟ قايدا تۇرادى؟ قايدا جۇمىس ىستەيدى؟ بۇل ساۋالدارعا مينيستر مىرزا ەتيكالىق سەبەپتەرگە بايلانىستى باسقاداي اقپارات بەرە المايتىنىن سىلتاۋراتادى.

جوق، بۇل ەتيكانىڭ ەمەس، حالىق دەنساۋلىعىنىڭ ماسەلەسى!

«قازىرگى ۋاقىتتا ولارمەن بايلانىسقا تۇسكەن ادامداردى انىقتاۋ ءۇشىن ەپيدەميولوگيالىق شارالار جۇرگىزىلىپ جاتىر. بۇل ادامداردىڭ بارلىعى ەكى اپتا بويى كارانتينگە جاتقىزىلىپ، مەديتسينا ماماندارىنىڭ باقىلاۋىنا الىنادى»، دەيسىز. ال، (ۇشاقتاعىلاردان باسقا) الماتىلىقتار ولاردىڭ كىم ەكەنىن بىلمەسە، ءتۇرىن تانىماسا، ولارمەن بايلانىسقا تۇسكەن-تۇسپەگەندەرىن قايدان بىلەدى؟

9 ناۋرىزدان بەرى ءبىر اپتاداي ۋاقىت ءوتتى. از مەرزىم ەمەس! وسى ارالىقتا ولاردىڭ قانداي ورتادا بولىپ، قانشاما ادامدارمەن جۇزدەسكەنىن، تىلدەسكەنىن قالاي انىقتاماقسىزدار؟

سوندىقتان، شۇعىل تۇردە كوروناۆيرۋس يەلەرىنىڭ اتى-جوندەرىن، جۇمىس ورىندارىن، فوتوسۋرەتتەرىن جاريالاۋدى تالاپ ەتەمىز! ءبىز ولاردىڭ وسىنداي كەزدەيسوق اۋىر جاعدايعا ۇشىراعانىن تۇسىنۋگە تىرىسامىز. ولاردىڭ دا الماتىلىقتاردىڭ الاڭداۋشىلىعىن دۇرىس ءتۇسىنۋىن سۇرايمىز! «اۋرۋىن جاسىرعان (جۇمسارتىپ ايتايىن) جاقسى ەمەس» ەكەنىن اتالارىمىز ەسكەرتىپ كەتكەن.

وزدەرىڭىز بىلەسىزدەر، قازىرگى ۋاقىتتا كوروناۆيرۋسپەن اۋىرعان ناۋقاستار تۋرالى بۇكىل الەمدە مالىمەتتەر اشىق جازىلۋدا. مىسالى، فرانتسيانىڭ مادەنيەت ءمينيسترى فرانك ريستەر كوروناۆيرۋسىن جۇقتىرىپ العانىن ەشكىمنەن جاسىرعان جوق. سول سەبەپتى، ساقتىق شارالارى كۇشەيتىلىپ، فرانتسيا ۇكىمەتىنىڭ مۇشەلەرى جينالىستاردا ءبىر-بىرىمەن قول بەرىپ امانداسپايتىن بولدى. سونداي-اق، وسى سىرقاتقا شالدىققان يران پارلامەنتىنىڭ دەپۋتاتتارى مۋجتابا زالنۋر، ماحمۋد سادەگي، يتالياندىق "سامپدوريا" فك شابۋلشىسى مانولو گاببياديني، «يۋۆەنتۋس» قورعاۋشىسى دانيەلە رۋگاني سياقتى ت.ب. جۇزدەگەن تانىمال ادامداردىڭ ەسىمدەرى باق پەن الەۋمەتتىك جەلىلەردە اشىق جاريالانىپ وتىر.

ەندەشە، تەك جوعارىداعى ەكى ادامنىڭ عانا ەمەس، ۇشاقتا بىرگە بولعان بارلىق جولاۋشىلاردىڭ دا اتى-جوندەرى تولىق جاريالانسا، ارتىق بولمايدى.

جارىق دۇنيەدە ادامزات بالاسىنىڭ دەنساۋلىعىنان قىمبات ەشتەڭە جوق! بۇل تالابىمىز – اتى وشكىر ىندەتتىڭ ەلىمىزدە كەڭ جايىلماۋىنىڭ بىردەن-ءبىر كەپىلى!

قايىم-مۇنار تابەەۆ،

Abai.kz