مۇنشا قۇنىعىپ كەتكەنىمىزدى بىلمەپپىن...
جۋىردا جاقىن قۇربىمنىڭ كولىگىنىڭ ءنومىرىن ۇرىلار شەشىپ الىپ كەتكەن ەكەن. قايتارىپ الۋدىڭ جولى كورسەتىلگەن ءبىر جاپىراق قاعاز قالدىرعان. تىكەلەي اقشا تالاپ ەتپەگەن، بىراق «كۋپي/پروداي» ءموبيلدى قوسىمشاسىن كوشىرىپ ال دەپ، ءارى قارايعى جولىن جازعان. «پيشي!!!» دەپ قولتاڭبا دا قالدىرىپتى. قۇربىم بىردەن قۇقىق قورعاۋ ماماندارىنا حابارلاسادى، الايدا، ءمان-جايدى ەستىگەندەگى ولاردىڭ رەاكتسياسى: «ءبىز وندا بارعانمەن نە بىتىرەمىز، نومىرگە حابارلاسىپ ساتىپ العانىڭىز دۇرىس قوي»، بولادى.
قىزىق مۇنىمەن تاۋسىلمايدى.قۇربىم سوڭىنا دەيىن تەرگەۋشى جىبەرىڭىز دەپ تۇرىپ الادى. ۋچاسكەلىك پوليتسەي كەلەدى، بىراق «مىناۋ پوتەريا ەمەس، پروپاجا عوي، بۇل مەنىڭ باعىتىما جاتپايدى، سىزدەرگە باسقا ءبولىم، سوگ (سلەدستۆەننو-وپەراتيۆنايا گرۋپپا) كەلۋى كەرەك، قازىر حابار بەرەمىن» دەپ كەتەدى. ىزىنشە ءتورت ادامنان تۇراتىن ارنايى توپ كەلەدى. الايدا، ولار حابارلاما جازىلعان جاپىراق قاعازدى سالاتىن فايل ىزدەپ ءجۇرىپ الادى. قۇربىم «ساۋساق ىزدەرىن المايسىزدار ما، كامەرالاردى تەكسەرەيىك، «سەرگەك» كوپ بۇل ارادا» دەسە، «جوق، «سەرگەك» ءبىزدىڭ قۇزىرىمىزعا كىرمەيدى»، دەيدى. پودەزدىڭ ماڭدايشاسىندا كامەرا بار، سونى قارايىق دەپ قىز تاعى ءوزى ۇسىنىس تاستايدى. كامەرادان بىرەۋدىڭ نومەردى شەشىپ الىپ جاتقانى كورىنەدى، الايدا ءۇي اينالىپ كەتكەننەن كەيىن ءىز جوق. الگى توپ وسىمەن جۇمىستى ءتامامدايدى دا ەرتەڭ شاعىم ءتۇسىرىڭىز دەپ كەتە بارادى.
تەرگەۋشىلەردەن قايىر بولماعان سوڭ قۇربىم ءسىڭلىسى ەكەۋى كورشى ءۇيدىڭ پودەزدەرىندەگى كامەرادان قاراپ كورمەككە تاعى شىعادى. ول كامەرانى «كۇزەتىپ» وتىرعان اعانىڭ اقشا تالاپ ەتكەنى جەكە اڭگىمە. سودان حوش، سۇراعان تەڭگەسىن بەرەدى دە، كامەرا جازباسىنا قاراسا، ءبارى اپ-انىق! ءۇي اينالىپ كەتكەن ۇرىنىڭ ءسال ارىرەك بارىپ الدەنەنى ءۇيىندى قارعا كومىپ جاتقانى ايناداي! قىزدار ۆيدەوداعى ومبى قاردى شامالاپ بارىپ قازا باستايدى. بىرازعا دەيىن تابا المايدى. سودان قاسىنداعى ءسىڭلىسى تۇرىپ:
- ەگەر مەن ۇرىنىڭ ورنىندا بولسام، حابارلاسقان ادامعا ءوزىم اكەلىپ بەرمەسىم انىق. سوندىقتان، بەلگىلى ءبىر زاتتى وريەنتير رەتىندە الار ەدىم. مىنا باعاننىڭ تۇبىنە قاراي قازىپ كورسەك شە، دەيدى عوي.
قازادى. تابادى. نومىرلەرى سول باعاننىڭ تۇبىندە جاتىر. ەرتەگى مە؟ جوق، بۇل – قازاقستان!
ەندى مەندە سۇراق:
جول ەرەجەسىنە كەلگەندە «سەرگەكتەن» ساق قۇدىرەت جوق. ال نەگە سول قۇدىرەتتى مىناداي جاعدايدا پايدالانۋعا رۇقسات جوق؟ تەرگەۋشىلەردە ءىستى تەكسەرۋگە نەگە قۇلىق بولمادى؟ رەسەيلىك «كۋپي/پروداي» ءموبيلدى قوسىمشاسىن ەستىگەن/كورگەندەرىڭىز بار ما؟ كسك نەگە پارا سۇرايدى؟ مۇنداي جاعدايعا تاپ بولعاندار بار ما؟ كولىگى بارلاردان كەڭەس كەرەك.
جالپى، اۋىزباستىرىقسىز شارۋا شەشىلمەيتىنىن بىلەم عوي، تەك مۇنشا قۇنىعىپ كەتكەنىمىزدى بىلمەپپىن...
ايسۇلۋ مامانقىزىنىڭ الەۋمەتتىك جەلىدەگى جازباسى
Abai.kz
