ەلىمىزدىڭ مەشىتتەرىندە ناماز وقۋ ۋاقىتشا توقتاتىلدى. بۇل تۋرالى قازاقستان مۇسىلماندارىنىڭ ءدىني باسقارماسى توتەنشە جاعداي جاريالانعان كەزدە مەشىتتە جۇما جانە بەس ۋاقىت ناماز وقۋعا قاتىستى ءپاتۋا شىعاردى. بۇل تۋرالى قمدب رەسمي سايتىندا جاريالاندى.

بسم  الله الرحمن الرحيم

اسا قامقور، ەرەكشە مەيىرىمدى اللانىڭ اتىمەن باستايمىن.

بارشا ماداق الەمدەردىڭ راببىسى اللاعا ءتان. ادامزاتتىڭ اسىلى مۇحاممەدكە ونىڭ وتباسى مەن بارشا ساحابالارىنا سالاۋات پەن سالەم بولعاي!

بۇگىندە COVID-19 كوروناۆيرۋس جۇقپالى دەرتى الەم جۇرتشىلىعىن الاڭداتىپ وتىر. دۇنيەجۇزىلىك دەنساۋلىق ساقتاۋ ۇيىمىنىڭ الەمدى شارپىعان جۇقپالى دەرتتى پاندەميا دەپ جاريالاۋىنا بايلانىستى قازاقستان رەسپۋبليكاسىنىڭ بارلىق اۋماعىندا 2020 جىلدىڭ 16  ناۋرىزىنان باستاپ 30 تاۋلىككە توتەنشە جاعداي ەنگىزىلدى.

اللا تاعالا ادامزات بالاسىنا:

وَلَا تُلْقُوا بِأَيْدِيكُمْ إِلَى التَّهْلُكَةِ

«ءوز-وزدەرىڭدى قاۋىپ-قاتەرگە تىكپەڭدەر», – دەپ ەسكەرتۋ جاساعان («باقارا» سۇرەسى، 195-ايات). ءومىر – اللا تاعالانىڭ بەرگەن اماناتى.

پايعامبارىمىز (وعان اللانىڭ سالاۋاتى مەن سالەمى بولسىن) جۇقپالى اۋرۋعا بايلانىستى: «ناۋقاس كىسى دەنى ساۋ ادامعا جاقىنداماۋى ءتيىس», – دەگەن (بۋحاري، مۋسليم).

مۇنىمەن قوسا شاريعاتتا «وزىنە دە، وزگەگە دە زيان كەلتىرۋگە بولمايدى» دەگەن قاعيدا بار.

يسلام ءدىنى كەيبىر عيباداتتاردى قاۋىپتى جاعدايلاردا ۋاقىتشا توقتاتۋعا رۇقسات بەرەدى. مىسالى، ادامنىڭ ومىرىنە، دەنساۋلىعىنا، مال-مۇلكىنە، بالا-شاعاسى مەن وتباسى مۇشەلەرىنە الدەبىر زالال تيەتىن بولسا، شاريعاتىمىز ونىڭ مەشىتكە كەلىپ، بەس ۋاقىت نامازدى جاماعاتپەن وقۋىن، ءتىپتى جۇما نامازعا قاتىسۋىن مىندەتتەمەيدى.

وسى رەتتە قازاقستان مۇسىلماندارى ءدىني باسقارماسىنىڭ عۇلامالار كەڭەسى ەلىمىزدە جاريالانعان توتەنشە جاعدايدى ەسكەرە كەلە، كوروناۆيرۋستىڭ جاماعات اراسىندا تارالۋىنىڭ الدىن الۋ شاراسىنا قاتىستى تومەندەگىنى مالىمدەيدى:

بىرىنشىدەن، مەملەكەت تاراپىنان ەلدە توتەنشە جاعداي جاريالانۋىنا جانە ىندەتتىڭ تارالۋ قاۋپى جوعارى بولۋىنا بايلانىستى مەشىتتەردە جۇما نامازى ۋاقىتشا وقىلمايدى. اركىم ءوز ۇيىندە جۇما نامازدىڭ ورنىنا بەسىن نامازىن وتەيدى.

ەكىنشىدەن، مەشىتتەر جابىلمايدى، بەس ۋاقىت نامازعا ازان شاقىرىلادى، الايدا بەس ۋاقىت ناماز مەشىتتە جاماعاتپەن وقىلمايدى.

ۇشىنشىدەن، مەشىت جانىنداعى اسحانالاردا وتەتىن قۇدايى اس، ساداقالار (جەتىسى، قىرقى، جىلى ت.ب. ءداستۇرلى كادەلەر) ۋاقىتشا توقتاتىلادى.

تورتىنشىدەن، جانازا نامازىن تەك جاقىن تۋىستارىمەن، ياعني از توپپەن وتكىزگەن دۇرىس.

قازاقستان مۇسىلماندارى ءدىني باسقارماسى مۇسىلمان قاۋىمىن سابىر ساقتاۋعا، ورىنسىز ۇرەيلەنبەۋگە، حالىقتى دۇرلىكتىرمەۋگە جانە اللا تاعالاعا دۇعا ەتۋگە شاقىرادى.

16 ناۋرىز 2020 جىل

نۇر-سۇلتان قالاسى

Abai.kz