الماتى وبلىسىندا كورونوۆيرۋس جۇقتىرعاندار جوق. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى ىسقاق ەربوزىمۇلى «Jetisy Media» اقپاراتتىق الاڭىندا وتكەن ءباسپاسوز ماجىلىسىندە ايتتى. وڭىردە 3 ادامدا كۆي كۇدىگى بار دەپ تانىلىپ،  جەدەل اۋرۋحاناعا جاتقىزىلعان. جۇرگىزىلگەن مەديتسينالىق زەرتتەۋدىڭ قورىتىندىسىنان «اتى جامان» ۆيرۋس انىقتالمادى. تەكسەرۋ ناتيجەسى تەرىس. قازىر وسى ازاماتتارمەن بايلانىستا بولعاندار دا قاتاڭ باقىلاۋعا الىندى. 

جالپى، جىل باسىنان الماتى وبلىسىنا شەتەلدەن 3 مىڭنان اسا ازامات كەلگەن. بارلىعىنا ءتيىستى مەديتسينالىق تەكسەرۋلەر جۇرگىزىلىپ، 14 كۇنگە كارانتينگە جاتقىزىلعان. قازىر جاعدايلارى جاقسى. ايتا كەتۋ كەرەك، وڭىردە 40-قا جۋىق ينفەكتسيونيست، 140-تان اسا انەستيزيولوگ-رەانيماتولوگ، 8 نەفرولوگ، 12 ترانسفۋزيولوگ، 100-گە جۋىق نەۆرولوگ جانە 450-گە جۋىق تەراپەۆت كۇشەيتىلگەن رەجيمدە جۇمىس ىستەپ جاتىر. وبلىستا كوروناۆيرۋستى تەكسەرۋ، ەمدەۋ، كارانتينگە جاتقىزۋ بويىنشا 1000-عا تارتا توسەك-ورىن بار.

جيىندا تۇرعىندار كوكەيىندە جۇرگەن ساۋالدارعا دا تۇشىمدى جاۋاپ بەرىلدى. مەديتسينالىق بەتپەردەلەردىڭ جەتىسپەۋشىلىگى دە الداعى كۇندەرى ءوز شەشىمىن تاپپاق. ماسەلەن، ىلە اۋدانىنداعى بەتپەردە شىعاراتىن «Dolce-Pharm» زاۋىتى ءونىم كولەمىن ارتتىرماق. تالدىقورعانداعى «اجار» فابريكاسى دا اتالمىش قورعانىش قۇرالىن تىگۋدى قولعا الىپ وتىر. 

 بۇگىندە وڭىردە ويىن-ساۋىق ورىندارى جابىلدى. بارلىق مەكەمەلەرگە قول جۋ قۇرالدارى قويىلادى. قوعامدىق كولىكتەردى كۇنىنە ەكى رەت زالالسىزداندىرۋ جۇمىستارى جۇرگىزىلىپ جاتىر. سونىمەن قاتار، نىسانداردى ديزينفەكتسيالاۋ شارالارى جۇرگىزىلۋدە. 

  «ساقتانعاندى قۇداي ساقتايدى»-, دەمەكشى، ماماندار حالىق تا ساقتىق شارالارىن قولدانۋعا كەڭەس بەرەدى. 

ايمان اسىل 

Abai.kz