قر باس پروكۋرورىنىڭ ورىنباسارى بولات دەمباەۆ كارانتينگە بايلانىستى ۇندەۋ جاسادى.

دەمباەۆتىڭ ايتۋىنشا، كارانتينگە بايلانىستى بىرقاتار شارا مەن ۋاقىتشا شەكتەۋ ەنگىزىلگەدى.

-كوروناۆيرۋس پاندەمياسىنا بايلانىستى قازاقستان رەسپۋبليكاسىنىڭ پرەزيدەنتى ەلدىڭ بۇكىل اۋماعىندا 2020 جىلدىڭ 16 ناۋرىزىنان 15 ساۋىرىنە دەيىن توتەنشە جاعداي ەنگىزۋ تۋرالى جارلىققا قول قويدى. نۇر-سۇلتان جانە الماتى قالالارىندا 2020 جىلعى  19 ناۋرىزدان باستاپ كارانتين رەجيمى ەنگىزىلدى. بىرقاتار شارالار مەن ۋاقىتشا شەكتەۋلەر بەلگىلەندى. ولاردى ورىنداماۋ اكىمشىلىك جاۋاپتىلىققا اكەپ سوقتىرادى (اقبتك-ءنىڭ 476-بابى - 10 اەك ايىپپۇل نەمەسە 15 تاۋلىككە دەيىن قاماققا الۋ), - دەدى بولات دەمباەۆ.

توتەنشە جاعداي كەزىندە بيلىك وكىلىنىڭ زاڭدى تالابىنا باعىنباعانى ءۇشىن قىلمىستىق جاۋاپتىلىق كوزدەلگەن (قىلمىستى كودەكستىڭ 379-بابى - 2 مىڭ اەك ايىپپۇلدان 2 جىلعا باس بوستاندىعىنان ايىرۋعا دەيىن).

-حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكستىڭ 90-بابىنا سايكەس ازاماتتار مەديتسينالىق ۇيىمداردىڭ تالاپ ەتۋى بويىنشا تەكسەرۋدەن جانە ەمدەلۋدەن وتۋگە مىندەتتى. باس مەملەكەتتىك سانيتارلىق دارىگەردىڭ 2020 جىلعى 16 ناۋرىزداعى قاۋلىسىمەن ستاتسيونارلىق جانە ءۇي كارانتينى ەنگىزىلدى. ولاردى ىسكە اسىرۋ ماقساتىندا ۋاكىلەتتى ورگاندار ەپيدەميولوگيالىق جاعدايى قولايسىز ەلدەردەن كەلگەن ادامداردى انىقتاۋ، وقشاۋلاۋ جانە ەمدەۋ بويىنشا شارالاردى قامتاماسىز ەتىپ جاتىر, - دەيدى باس پروكۋروردىڭ ورىنباسارى.

شەكتەۋ ءىس-شارالارى، ونىڭ ىشىندە كارانتين تۇرعىنداردىڭ جانە مەنشىك نىسانىنا قاراماستان زاڭدى تۇلعالاردىڭ ورىنداۋى ءۇشىن مىندەتتى. الايدا كارانتيننەن جالتارۋ، شەتەلگە شىعۋ تۋرالى مالىمەتتەردى جانە بايلانىستا بولعان ادامدار تۋرالى اقپاراتتى جاسىرۋ فاكتىلەرى بار.

-حالىقتىڭ قاۋىپسىزدىگىن قامتاماسىز ەتۋ ماقساتىندا ازاماتتاردان وتكىزىلەتىن ءىس-شارالارعا تۇسىنىستىكپەن قاراۋدى، دەنساۋلىق ساقتاۋ مينيسترلىگى مەن ءىىم قىزمەتكەرلەرىنىڭ زاڭدى تالاپتارىن ساقتاۋدى، ولارعا ينفەكتسيانى انىقتاۋ مەن الدىن الۋعا كومەك كورسەتۋدى سۇرايمىز. پوليتسيانىڭ وسىنداي تالاپتارىنا باعىنباعانى ءۇشىن اكىمشىلىك جاۋاپتىلىق كوزدەلگەنىن اتاپ وتەمىز (اقبتك-ءنىڭ 667-بابى - 40 اەك-كە دەيىن ايىپپۇل نەمەسە 10 تاۋلىككە دەيىن قاماققا الۋ). سونداي-اق، سانيتاريالىق-ەپيدەميولوگيالىق قاداعالاۋ ورگاندارىنىڭ نۇسقامالارىن ورىنداماعانى (اقبتك-ءنىڭ 462-بابىنىڭ 3-بولىگى - 500 اەك-كە دەيىن ايىپپۇل) جانە سانيتاريالىق ەرەجەلەر مەن گيگيەنالىق نورمالاردى بۇزعانى ءۇشىن (اقبتك-ءتىڭ 425-بابى - 5 ميلليون تەڭگەگە دەيىن ايىپپۇل) اكىمشىلىك جاۋاپتىلىق بەلگىلەنگەن, - دەدى بولات دەمباەۆ.

بۇل رەتتە كاسىپكەرلىك سۋبەكتىلەرىنە قاتىستى قىزمەتىن توقتاتا تۇرۋ تۇرىندەگى جازا قولدانىلۋى مۇمكىن. ەگەر مۇنداي ارەكەتتەر ابايسىزدا ادامداردى جاپپاي جۇقتىرۋعا نەمەسە ادام ولىمىنە اكەپ سوقسا، وندا قىلمىستىق جاۋاپتىلىق تۋىندايدى (قك-ءنىڭ 304-بابى - 2 مىڭ اەك ايىپپۇلدان 10 جىلعا باس بوستاندىعىنان ايىرۋعا دەيىن).

-سونىمەن قاتار، شىندىققا سايكەس كەلمەيتىن مالىمەتتەردى تاراتپاۋعا جانە ارانداتۋشىلىققا بەرىلمەۋگە شاقىرامىز. اعىمداعى جاعداي تۋرالى شىنايى اقپارات ۋاكىلەتتى مەملەكەتتىك ورگانداردىڭ رەسمي ينتەرنەت-رەسۋرستارىندا ورنالاستىرىلادى, - دەدى دەمباەۆ.

Abai.kz