ەلىمىزدە كوروناۆيرۋستىق ينفەكتسيانىڭ تارالۋىنا قارسى كۇرەسكە ەكس - پرەزيدەنت ن.نازارباەۆ "ەلباسى قورىنان" 200 ميلليون تەڭگە بولەدى.

«بۇگىندە قازاقستاندا ەپيدەمياعا قارسى ءىس-شارالار تولىق كولەمدە جۇزەگە اسىپ جاتىر. بۇل ارەكەتتەر قازىرگى احۋالعا ساي جانە دەر كەزىندە قولعا الىندى. مەملەكەت تەڭدەسسىز شارالاردى قابىلداپ وتىر. قاۋىپتى ىندەتپەن كۇرەستە وتاندىق بيزنەس تە قولدان كەلگەنشە كومەكتەسۋدە. مەن بۇل باستامانى قولداپ، الەۋمەتتىك جاۋاپكەرشىلىك تانىتۋعا جانە ءبىزدىڭ قوعامنىڭ بىرلىگىن كورسەتۋگە شاقىرامىن. ءبىز بارلىق سىناقتان سۇرىنبەي وتەمىز. ءبىز بىرگەمىز!»، - دەلىنگەن نازارباەۆتىڭ تاپسىرماسىندا.

بولىنگەن قاراجات نۇر-سۇلتان مەن الماتى قالالارى اكىمدىكتەرى اراسىندا تەڭدەي ۇلەستىرىلەدى.

قارجىلىق كومەك پاندەمياعا قارسى كۇرەسكە جۇمىلعان مەديتسينا قىزمەتكەرلەرىنە سىياقى بەرۋگە، قوسىمشا مەديتسينالىق بەتپەردەلەر مەن دەزينفەكتسيالاۋ قۇرالدارىن ساتىپ الۋعا  جۇمسالادى. سونداي-اق، قاراجاتتىڭ ءبىر بولىگى ەلورداداعى بالالار ۇيلەرى مەن مامانداندىرىلعان اۋرۋحانالاردى ازىق-تۇلىكپەن قامتاماسىز ەتۋگە باعىتتالادى.

سونىمەن بىرگە، قور باسشىلىعى نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسىنا 50 مىڭ مەديتسينالىق بەتپەردە تاپسىردى.

Abai.kz