الماتى وبلىسىندا بارلىق ازىق-تۇلىك دۇكەندەرى شتاتتىق رەجيمدە جۇمىس ىستەيتىن بولادى. ءبىرىنشى كەزەكتەگى قاجەت ازىق-تۇلىكتەر تولىق كولەمدە جەتكىلىكتى. تاۋارلار مەن ءدارى-دارمەك جەتىسپەۋشىلىگى جوق.

ءوڭىر باسشىسى اماندىق باتالوۆ جەتىسۋلىقتاردى ءوز دەنساۋلىعىنا ەرەكشە نازار اۋدارىپ، سانيتارلىق دارىگەرلەردىڭ بارلىق ۇسىنىستارىن تولىق ساقتاۋعا شاقىراتىن ۇندەۋ جولدادى. 

ءبىز بيلىكتىڭ ۇندەۋىنە قۇلاق اسپاي، قاۋىپسىزدىك شارالارىنا جەڭىل-جەلپى قاراعان بىرقاتار ەۋروپا ەلدەرى (يتاليا سياقتى) تۇرعىندارىنىڭ قاتەلىكتەرىن قايتالاماۋىمىز كەرەك. ونىڭ ارتى نەگە اكەلىپ سوققانىن وزدەرىڭىز بىلەسىزدەر، - دەپ اتاپ ءوتتى اماندىق عابباسۇلى. 

ول ءوز سوزىندە قازىر بۇكىل الەم، سونىڭ ىشىندە ءبىزدىڭ ەلىمىز دە كوروناۆيرۋستىڭ  تارالۋىنا بايلانىستى تۋىنداعان جاھاندىق قاۋىپ-قاتەرمەن بەتپە-بەت كەلىپ وتىرعانىن اتاپ ءوتتى. مەملەكەت باسشىسى قاسىم-جومارت كەمەلۇلى توقاەۆ ەلدە توتەنشە جاعداي ەنگىزۋ تۋرالى جارلىق شىعارىپ، ۆيرۋستىڭ كەڭ تارالۋىنا جول بەرمەۋ ءۇشىن بارلىق قاجەتتى شارالاردى قابىلداۋدى تاپسىرعانىن دا تىلگە تيەك ەتتى. 

 ايتا كەتۋ كەرەك، الماتى قالاسىندا وتانداستارىمىزدىڭ اراسىندا ينفەكتسيا جۇقتىرعان وقيعالار تىركەلدى. وسىعان بايلانىستى مەملەكەت باسشىلىعى ەرتەڭ تۇنگى ساعات 00-دەن باستاپ الماتى قالاسىندا كارانتين ەنگىزۋ تۋرالى شەشىم قابىلدادى. قالاعا  كىرەبەرىستە بلوكپوستتار قويىلىپ، كىرۋ جولدار جابىلادى.  بىرقاتار كاسىپورىندار مەن ۇيىمداردىڭ جۇمىسى توقتاتىلادى، ساۋدا-ويىن-ساۋىق ورتالىقتارى، بازارلار مەن مەيرامحانالار جابىلادى. سوندىقتان بۇل ماسەلە، الماتى قالاسىنىڭ اكىمدىگىمەن بىرگە قاراستىرىلىپ جاتىر. 

سىزدەردىڭ كوپشىلىكتەرىڭىز الماتى قالاسىنداعى مەكەمە-كاسىپورىنداردا جۇمىس ىستەيسىزدەر، قالاعا قانداي دا ءبىر شارۋالارىڭىزبەن، بازارعا، دۇكەنگە باراسىزدار. وسىعان بايلانىستى تۇسىنىستىكپەن قاراپ، كارانتين كەزىندە قالاعا بارۋدى قويا تۇرۋلارىڭىزدى سۇرايمىن. قۇرمەتتى جەرلەستەر، قابىلدانىپ جاتقان بارلىق شارالار ءسىز بەن ءبىزدىڭ قاۋىپسىزدىگىمىزدى، قوعام تۇراقتىلىعىن قامتاماسىز ەتۋگە باعىتتالعان. ەڭ ءبىرىنشى كەزەكتە ءوزىمىزدىڭ جانە جاقىندارىمىزدىڭ دەنساۋلىعىنا جاۋاپكەرشىلىكپەن قاراي بىلەيىك!، - دەپ مالىمدەدى ءوڭىر باسشىسى. 

سونىمەن قاتار، وبلىس تۇرعىندارىن ەلدەگى جاعدايدىڭ سالماقتى ەكەنىن ءتۇسىنىپ، ۆيرۋستىڭ تارالۋىنا جول بەرمەۋگە شاقىردى. 

ايمان اسىل

Abai.kz