قر اقپارات جانە قوعامدىق دامۋ ءمينيسترى داۋرەن اباەۆ ەل اۋزىنداعى بيلىك ءترانزيتى تۋرالى قاۋەسەتكە تۇسىنىكتەمە بەردى.

"2019 جىلدىڭ 19 ناۋرىزى شىنىندا تاريحي كۇن. بۇل كۇن ەلدى وزگەرتتى. تاريحىمىزدىڭ جاڭا پاراقشاسى اشىلدى. ارينە، بۇل ەشكىم كۇتپەگەن شەشىم بولدى. مەنىڭشە، ەلباسىنىڭ بۇل شەشىمىنىڭ كەمەڭگەرلىگى مەن تەرەڭدىگىن ءبىز كەيىن تۇسىنەمىز. بۇعان تاريحي باعانى ءبىزدىڭ بالالارىمىز، بالكىم نەمەرەلەرىمىز بەرەر", - دەدى داۋرەن اسكەربەكۇلى "حابار" ارناسىندا.

مينيستر ءوز سوزىندە، وسى ءبىر جىلدىقتىڭ قارساڭىندا ەل ىشىنە تاراعان ءتۇرلى قاۋەسەتتەر، اسىرەسە "پرەزيدەنت قىزمەتىنەن كەتەدى ەكەن" دەگەن گۋ-گۋ اڭگىمەگە دە پىكىر ءبىلدىردى.

"شىنىن ايتقاندا، مۇنداي، اس ۇيدەگى اڭگىمەلەرگە پىكىر ءبىلدىرۋدىڭ ءوزى ۇيات. بىراق، وكىنىشكە وراي، بۇل تاقىرىپ قوعامدى قىزۋ تالقىلانىپ جاتىر. بۇل تۋرالى كوپ جۇرت ايتىپ ءجۇر. ءتىپتى، سالماقتى ساراپشىلار مەن جۋرناليستەردەن باستاپ، ەم قابىلداپ جۇرگەن ناركومانعا دەيىن...مەن تەك، قازىرگى بىزدەگى شىنايى، نەگىزگى پروبلەمالارعا ءمان بەرۋ كەرەكتىگىن ايتقىم كەلەدى. بۇل ارقىلى ءبىزدى نەگىزگى ماسەلەلەردەن الاڭداتقىسى كەلەدى. بارلىق جالعان اقپاراتتارعا، ارينە، قۇزىرلى ورگاندار وزدەرىنىڭ قۇقىقتىق باعاسىن بەرەدى. ال قازىر نەگىزگى ماسەلەلەرگە دەن قويۋىمىز كەرەك. بىزدە زاڭدى سايلانعان پرەزيدەنت بار. ول حالىقتىڭ قولداۋىنا يە", - دەدى مينيستر اباەۆ.

Abai.kz