ۇلىستىڭ ۇلى كۇنى قارساڭىندا دۇنيەجۇزى قازاقتارىنىڭ قاۋىمداستىعى مەن «وتانداستار قورى» الىس-جاقىن شەتەلدەگى قانداستاردىڭ باسىن قوسقان «ONLINE-NAURYZ» مەرەكەلىك ءىس-شاراسىن ۇيىمداستىردى. 

ونلاين رەجيمدە وتكەن شاراعا الەمنىڭ تۇكپىر-تۇكپىرىندەگى اقش (بوستون، چيكاگو), يران، گەرمانيا، شۆەتسيا، دانيا، مونعوليا، رەسەي، تۇركيا مەملەكەتىندەگى قازاقتار بەلسەندى قاتىسىپ، اتامەكەنىنە ىستىق ساعىنىشىن جەتكىزدى. دارحان كوڭىلدى قانداستارىمىز ءبىر-ءبىرىن قۇتتىقتاپ، بارشا قازاق حالقىنا ىستىق لەبىزىن ءبىلدىردى. 

ءوز كەزەگىندە «وتانداستار قورىنىڭ» ۆيتسە-پرەزيدەنتى ماعاۋيا سارباسوۆ بارلىق قاتىسۋشىلاردى ۇلىق مەيرام ناۋرىزبەن قۇتتىقتادى. وتكەن جىلى تابىستى ەڭسەرىلگەن جوبالاردى قورىتىندىلاپ، بيىلعى جىلدىڭ جوسپارىمەن ءبولىستى. 

قازىرگى ۋاقىتتا الەمدى دۇرلىكتىرگەن جۇقپالى كوروناۆيرۋس دەرتىنە قاراماستان، دۇنيەجۇزىندەگى قانداس باۋىرلار تىلەگى ءبىر ارناعا توعىستى. تۋعان جەر توپىراعى مەن جۋسان ءيىسىن اڭساعان ءار قازاق جۇرەگىندەگى ساعىنىش الاۋى ماڭگىلىك وشپەيدى. قازاق حالقىنىڭ ورتاق وتانى – قازاقستان رەسپۋبليكاسى. 

زاماناۋي ونلاين فورماتتا وتكەن باسقوسۋ الىستى جاقىنداتىپ، اعايىندى ءبىر-بىرىمەن تابىستىرىدى. بارلىق قاتىسۋشىلاردىڭ ريزاشىلىعىنا بولەنگەن شارانى كەلەشەكتە دە وتكىزۋ جوسپارلانىپ وتىر.

 «ONLINE-NAURYZ» مەرەكەسىنىڭ تىكەلەي ەفيرىنىڭ ءتۇسىرىلىمىن تاماشالاۋ ءۇشىن كەلەسى سىلتەمەگە ءوتۋ كەرەك:

Abai.kz