«ءتاجدى» تاجال الەمدى جايلادى. رەسمي اقپاراتتارعا سۇيەنسەك، 155-تەن استام ەلدە پاندەميا بەلەڭ الىپ وتىر. اراسىندا قازاقستان دا بار.

الەمدە جانە ەلدە قالىپتاسقان جاعدايعا بايلانىستى ەلباسى حالىققا
ۇندەۋ جولدادى. نۇرسۇلتان نازارباەۆ الدا ەكونوميكالىق داعدارىستىڭ كۇتىپ تۇرعانىن مالىمدەپ، حالىقتى ۇنەمشىل بولۋعا شاقىردى.

ەلباسىنىڭ ۇندەۋى الماتى وبلىسىنىڭ تۇرعىندارىن دا بەي-جاي
قالدىرمادى. ۇندەۋ حالىقتان قولداۋ تاۋىپ، ءوڭىر بەلسەندىلەرى ءوز ويلارىن
ءبىلدىرىپ جاتىر. ماسەلەن، الاكول اۋداندىق انالار كەڭەسىنىڭ ءتورايىمى
ۇلجالعاس دۇيسەباەۆا بۇل قيىندىقتى دا ەل بولىپ، ەڭسەرىپ، دامۋدىڭ جاڭا
كەزەڭىنە اياق باسامىز دەپ سەنىم ءبىلدىردى.

«ەل تاريحىنىڭ تارامدى تامىرىنا ءۇڭىلىپ، بۇرىنعى مەن بۇگىنىمىزدى
سارالايتىن بولساق، ءححى عاسىرداعى تاۋەلسىز قازاقستان بولۋ ءۇشىن ۇلتىمىز
كوپتەگەن قيىن-قىستاۋ كەزەڭدەردى، الاساپىران مەن الماعايىپ زامانداردى
باسىنان وتكەردى. مىڭ ءولىپ، مىڭ تىرىلگەن جۇرتىمىزدىڭ ءتاستۇيىن
ىمىراشىلدىعى مەن بەرەكە قۇمارلىعىنىڭ ارقاسىندا امان قالىپ، كەز-
كەلگەن ەل شىداس بەرە بەرمەيتىن سىناقتاردى ەڭسەردى. ەل باسىنان كۇن تۋعان زاماتتاردا ءبىر جەڭنەن قول، ءبىر جاعادان باس شىعارعان قازاقتىڭ بۇگىنگى تاڭى ارايلى، شۋاقتى بولىپ وتىرعانى حاق. وسى رەتتە «ءتاج ۆيرۋسىنا» دا بىرگە توتەپ بەرۋ، قاتاڭ ءتارتىپ پەن سابىر ساقتاۋ ءبىز ءۇشىن باستى ەم دەسە دە بولادى.
بەرەكە مەن بىرلىك، تاتۋلىق پەن ىمىراشىلدىق باردا بىزگە الىنبايتىن قامال جوق. باسقا تۇسكەن سىناققا ەل بولىپ توتەپ بەرىپ، بارلىق قيىندىقتى يىق تىرەستىرە ەڭسەرەيىك»، - دەدى ۇلجالعاس بۋراسانقىزى.

ايمان اسىل

Abai.kz