زاڭ جوباسىن ماجىلىستە تانىستىرعان اقپارات جانە قوعامدىق دامۋ ءمينيسترى داۋرەن اباەۆ "قازىرگى زاڭمەن سالىستىرعاندا جوبانىڭ بىرقاتار جاڭا تۇستارى بار" دەدى.
ءمينيستردىڭ ايتۋىنشا، جوباداعى ەلەۋلى وزگەرىستەردىڭ ءبىرى - "ەسكەرتۋ سيپاتىندا" بەيبىت جيىن وتكىزۋگە رۇقسات بەرۋ جانە اكىمدىكتەن جاۋاپ بولماعان جاعدايدا ءوتىنىشتىڭ "قاناعاتتاندىرىلعان" بولىپ ەسەپتەلەتىنى. اباەۆ جالعىز ادامدىق پيكەتتەردى ارنايى ورىن ەمەس - پيكەتكە قاتىسى بار نىسان ماڭىندا وتكىزۋ تۋرالى دەپۋتاتتاردىڭ ۇسىنىسىن قاراستىرۋعا كەلىستى. ول سونىمەن بىرگە ميتينگ كەزىندەگى جۋرناليستەرگە جۇكتەلگەن مىندەت تۋرالى بىرقاتار نورمالاردىڭ الىنۋى مۇمكىن ەكەنىن ايتتى.
ال جوباداعى بەيبىت جيىن تەك ارنايى بەلگىلەنگەن ورىنداردا ءوتۋى ءتيىس دەگەن پۋنكت وزگەرىسسىز قالعان.
اباەۆ تالقىلاۋ كەزىندە اتقارۋ ورگانى بەيبىت جيىن وتكىزۋ تۋرالى وتىنىشتەردىڭ ءبارىن مۇقيات قاراپ، جاۋابىن بەرۋى ءتيىس، ەگەر ءوتىنىشتى قاناعاتتاندىرماسا، ناقتى سەبەبىن كورسەتۋى ءتيىس دەدى.
پرەزيدەنت قاسىم-جومارت توقاەۆ وتكەن جىلى ماۋسىم ايىنداعى سايلاۋدان كەيىن بەيبىت جيىن تۋرالى زاڭ قابىلداۋعا ۋادە بەرىپ، ميتينگ وتكىزۋ ءۇشىن ەسكەرتۋدى عانا تالاپ ەتەتىن قۇجات قابىلداۋعا ۋادە بەرگەن. اقپان ايىندا اقپارات جانە قوعامدىق دامۋ مينيسترلىگى بەيبىت جيىن تۋرالى زاڭ جوباسىن قوعامدىق تالقىلاۋعا شىعاردى. قۇجاتپەن تانىسىپ شىققان قۇقىق قورعاۋشىلار مەن بەلسەندىلەر قازىرگى زاڭ سياقتى ونداعى ەرەجەلەردىڭ حالىقارالىق ستاندارتقا سايكەس كەلمەيتىنىن ايتتى.
قۇجاتقا سايكەس، توقاەۆ ۋادە ەتكەن “ەسكەرتۋ سيپاتىنداعى” ميتينگىلەر قاتىسۋشىلار سانى 250-دەن اسپايتىن كىشىگىرىم جيىندارعا عانا قاتىستى. ال ءىرى ميتينگىلەر ءۇشىن بيلىكتەن رۇقسات الۋ كەرەك. قۇجاتتا سونىمەن بىرگە ميتينگىنى ارنايى بەلگىلەنگەن ورىنداردا عانا وتكىزۋ كەرەك دەگەن تالاپ بار جانە بەيبىت جيىن وتكىزۋ ءتارتىبىن بۇزعاندار بۇرىنعىدان قاتاڭىراق جازالانادى.
Abai.kz
