الەۋمەتتىك جەلىدە قىزىلوردا وبلىسى اكىمىنىڭ ۇستالعانى تۋرالى اقپارات پايدا بولدى. 

ناقتىراق ايتساق، WhatsApp الەۋمەتتىك جەلىسىندە قىزىلوردا وبلىسىنىڭ اكىمى قۋانىشبەك ىسقاقوۆتىڭ، ونىڭ كومەكشىسى، كاسىپكەردىڭ تۋىسى جانە تاعى ءبىر كاسىپكەردىڭ ۇستالعانى تۋرالى حابار تارالعان. حابارلامادا وسى تۇلعالاردىڭ تولىق مالىمەتتەرى، ولاردىڭ جاسى جانە ۇستالعان كۇنى كورسەتىلگەن.

بۇل تۋرالى قىزىلوردا وبلىسى اكىمدىگىنىڭ ءباسپاسوز قىزمەتى ناقتى اقپارات بەرە المايتىنىن مالىمدەدى.

«كەشە جۇمىستا بولدى. قازىرگى جاعداي تۋرالى ناقتى اقپارات بەرە المايمىز. قاشىقتان جۇمىس ىستەۋگە كوشىپ كەتتىك. وبلىستىق اكىمدىكتە ناقتى اقپارات بولماعاندىقتان، قۇزىرلى ورگاندارعا حابارلاسىڭىز»، - دەلىنگەن اكىمدىك ءباسپاسوزىنىڭ جاۋابىندا.

ال، ءىىم-ءنىڭ پوليتسيا قىزمەتى تاراتىلعان حابارلاماعا قاتىسى جوق ەكەنىن، سوندىقتان اقپاراتتى راستايتىن دا، جوققا دا شىعارا المايتىنىن حابارلاعان.

بۇل ىسكە قاتىستى سىبايلاس جەمقورلىققا قارسى قىزمەت ءالى جاۋاپ بەرمەگەن.

ايتا كەتەيىك، قۋانىشبەك ىسقاقوۆ 2019 جىلدىڭ ماۋسىم ايىندا قىزىلوردا وبلىسىنىڭ اكىمى بولىپ تاعايىندالدى. بۇعان دەيىن ول ءۇش جارىم جىل وبلىس اكىمىنىڭ ورىنباسارى بولىپ جۇمىس ىستەپ، ەكونوميكا، قارجى، جۇمىسپەن قامتۋ جانە حالىقتى الەۋمەتتىك قورعاۋ ماسەلەلەرىنە جەتەكشىلىك ەتتى.

Abai.kz