تونگەن قاۋىپتى ءتۇسىنۋ ءۇشىن، تاعى قانشا ادام ءولۋى كەرەك؟
استانادا كوروناۆيرۋستان كوز جۇمعان اپامىز ناۋرىز مەرەكەلەرىندە الماتىعا قۇدالىققا بارىپ، ۆيرۋستى سول جەردەن جۇقتىرىپ كەلگەن ەكەن. بۇل نە دەگەن بەيقامدىق دەسەڭشى! قۇداي اۋ، قۇدالىعى نەسى؟
ەلدەگى جاعدايدى كورىپ وتىر، ءبىلىپ وتىر، اقپارات قۇرالدارىنىڭ ءبارى كۇندىز-ءتۇنى زارلاپ، ساقتانۋ شارالارىن ءتۇسىندىرىپ جاتىر. سويتە تۇرا، ادامدار ايتقان ءسوزدى، ەسكەرتكەن نارسەنى قۇلاقتارىنا ىلەر ەمەس. تاعى دا قانشا ادام ءولىمى بولۋى كەرەك، مىنا جۇرت تونگەن قاۋىپتى تۇيسىگىمەن تءۇسىنۋ ءۇشىن؟ ءالى كۇنگە دەيىن قالا ىشىندە دالا كەزىپ جۇرگەندەردىڭ تەڭ جارتىسى ماسكاسىز ءجۇر. تاكسيستتەر ساقتانبايدى، سۋ تاسۋشىلار قورعانبايدى، دۇكەندەگى ساتۋشىلار ماسكا تاقپايدى. بۇل نەتكەن باسسىزدىق! ناداندىقتى جۇرەكجۇتقاندىقپەن شاتاستىرىپ ءجۇر مە الدە؟ بىلمەيمىن، بۇل نە اڭقاۋلىق، نە بارىپ تۇرعان اقىماقتىق. ءبارىن قۇدايعا تاپسىردىق دەيدى سولاردىڭ كوبىسى. قۇداي ساقتانساڭ ساقتايدى. ساقتانباساڭ اتاڭنىڭ باسىن ساقتاي ما! ءبىر ءسات بولسا دا، ويلانايىق تا اعايىندار اۋ.
قۇدالىق دەيدى. تاپ قازىر، وسى كەزدە ۇيلەنبەسە قاتىنسىز قالام دەدى ما ەكەن بالاسى؟ ۆيرۋس ەندى تاراي باستاعاندا الەۋمەتتىك جەلىدە ءبىرازى وسى كارانتيندى پايدالانىپ ۇيلەنىپ قالىڭدار، راحات، توي جاساپ شىعىندانبايسىڭ دەپ ازىلدەپ ەدى. سويتسە ءازىلدى شىن كورەتىندەر بار ەكەن عوي.
وسىعان قاتىستى تاعى ءبىر ماسەلە.
ۆيرۋستان قازا تاپقان اپامىزعا العاشىندا تەست جاساعاندا كوروناۆيرۋس جوق دەگەن دياگنوز قويىپتى. دەگەنمەن، دارىگەرلەر ول كىسىگە كارانتينگە جاتۋدى ۇسىنعان كورىنەدى. اپامىز ودان باس تارتىپ، ۇيىنە قايتىپ كەتكەن. قالايشا دارىگەرلەر ۆيرۋسى بار بولۋى مۇمكىن ادامدى ۇيىنە جىبەرە سالدى؟ مۇنداي جاعدايدا ناۋقاس كونبەسە، كۇشپەن ۇستاپ قالۋ كەرەك ەمەس پە؟ ونىڭ ۇستىنە ەكىنشى قايتارا جاسالعان تەست ۆيرۋس بار ەكەنىن كورسەتتى. ال نە بولدى ال ەندى؟
ادام ءولدى، بۇل ءبىر. ۇيدەگىلەرگە دە جۇقتىرعان بولۋى مۇمكىن، بۇل ەكى. ۇشىنشىدەن، ۇلىنىڭ ايتۋىنشا قايتىس بولعاننىڭ ءمايىتىن ۇيگە اكەلگەندە ءبىرتالاي ادام كوڭىل بىلدىرەم دەپ كەلىپ كەتكەن كورىنەدى. ەگەردە ۆيرۋس ءۇي ىشىندەگىلەرگە جۇققان بولسا، وندا ول كەلىمدى-كەتىمدى ادامدارعا دا تاراعان شىعار. ەندى ولاردىڭ بارىنە ىزدەۋ سالۋ كەرەك. تاۋىپ، كارانتينگە جاپقانشا ول ادامدار تاعى قانشا اداممەن ارالاسىپ ۇلگەرەدى؟
بۇل دا بولسا، دارىگەرلەر مەن ءتارتىپ ساقشىلارىنا قويىلاتىن ۇلكەن سۇراق.
مۇحتار تۇمەنبايدىڭ الەۋمەتتىك جەلىدەگى جازباسى
Abai.kz
