كوروناۆيرۋس بۇدان دا تەزىرەك تارالا باستادى

دەرتتى جۇقتىرعان العاشقى ادام انىقتالعان كەزدەن اۋرۋلار سانى 100 مىڭعا جەتكەنشە دەيىن 67 كۇن وتسە، 100 مىڭنان 200 مىڭعا دەيىن نەبارى 11, ال 200 مىڭنان 300 مىڭعا دەيىن نەبارى ءتورت-اق كۇندە جەتىپ وتىر. ءدال قازىر الەم بويىنشا 381 مىڭنان استام ادامدا كوروناۆيرۋس تىركەلدى.

سوڭعى دەرەكتەرگە سۇيەنسەك، Covid-19 دەرتىنەن الەم بويىنشا 16 563 استام ادام كوز جۇمدى. ياعني، اۋرۋدان قايتىس بولۋ ىقتيمالدىعى 4,3 پايىزدى قۇراپ وتىر.

بۇگىنگى دەرەك بويىنشا ەلىمىزدە كوروناۆيرۋس جۇقتىرعان بارلىق ادام سانى 68 بولدى. بىرەۋى اۋىر حالدە جاتىر. كورىپ وتىرعانىمىزداي، 13 ناۋرىزدا 2 ادام تىركەلگەننەن بەرى 11 كۇن ىشىندە جۇقتىرعاندار سانى 34 (!) ەسە ءوستى.

قازىر الەمدە قىتايدان باسقا مەملەكەتتەردىڭ بارلىعى بۇل دەرتتىڭ تارالۋىنىڭ شىڭىنا جەتپەدى. دەمەك، قازاقستاندا دا اۋرۋلاردىڭ سانى وسە بەرەدى.

مەن كۇنى-ءتۇنى كوروناۆيرۋس بويىنشا بارلىق جاڭالىقتاردى وقىپ وتىرمىن. تالداي كەلە ۇققانىم، ەلدە جاعداي ءالى دە ۋشىعادى. ويتكەنى كوروناۆيرۋستىڭ قاۋىپتى دەرت ەكەنى ادامداردىڭ ساناسىنا ءالى كۇنگە دەيىن كىرمەي جاتىر.

ەلدەر توتەنشە جاعداي مەن كارانتينگە قاراماستان، استىرتىن توي جاساۋدا، كەيبىر ساناسىز كاسىپكەرلەر 50 ادامعا دەيىن جينالۋعا بولادى دەگەندى شىعارىپ الىپ، كاراوكەلەر مەن مەيرامحانالارىنا حالىقتى شاقىرۋمەن الەك، حالىق ناۋرىز كۇندەرى تۋىسقاندارىنا قوناقتاپ بارۋدى توقتاتپادى.

زاڭدى بۇزعانى ءۇشىن جاۋاپكەرشىلىككە تارتىلاتىنىن بىلە تۇرسا دا، جابىلعان الماتى قالاسىنا سىرتتاي كىرگىسى كەلەتىندەردىڭ لەگى ءالى دە تولاستاماعان سياقتى. ءالى كۇنگە دەيىن كوروناۆيرۋس دەگەن فەيك، ۇكىمەتتىڭ قولدان جاساپ جاتقانى دەۋشىلەر كوپتەپ تابىلادى.

بۇنىڭ ءبارى جاعدايدىڭ وڭالۋىنا اكەلمەيدى، ارينە. وسىندايلاردىڭ بەيقامدىعى مەن ساناسىز جاۋاپكەرشىلىكسىزدىگى ءۇشىن ارى قاراي نە بولاتىنىن بولجاۋ قيىن ەمەس. ەگەر ساقتىق شارالارىن قولعا الماي، ۇيدە وتىرماي، ەل كەزىپ قوناقتاپ ءجۇرۋدى دوعارماساق:

1. توتەنشە جاعداي مەرزىمى ۇزارتىلۋى مۇمكىن.

2. كومەندانتتىق ساعات ەنگىزىلۋى مۇمكىن، ياعني قازىر الماتى جابىلسا دا، سىرتقا شىعا الامىز. كومەندانتتىق ساعات ەنگىزىلسە ۇيدەن مۇلدە شىعا الماي قالامىز.

3. توتەنشە جاعداي ۇزارتىلعان جاعدايدا شاعىن جانە ورتا بيزنەستىڭ ءبىرازىنىڭ ساۋداسى بىتەدى. قازىردىڭ وزىندە كۇن سايىن شىعىن ساناپ وتىر. بۇل دەگەنىمىز - جاپپاي قىسقارتۋلار، جۇمىسسىزدىقتىڭ ءوسۋى، ەكونوميكالىق جاعدايىڭىزدىڭ تومەندەۋى.

4. ۆيرۋس تەزىرەك تارالادى، جۇقتىرعاندار سانى كوبەيگەن سايىن دەنساۋلىق ساقتاۋ جۇيەسىنە سالماق تۇسەدى، دەرتتەن ولگەن ادامدار سانى وسەدى. دامىعان يتاليانىڭ وزىندە رەسۋرستار جەتپەي، كىمدى ەمدەيتىنىن، ال كىمدى ولىمگە قياتىنىن تاڭداپ جاتىر.

اينالايىن وتانداستار. ءبىز كارانتيننىڭ العاشقى كۇنىنەن باستاپ ۇيدە وتىرمىز. ۇيىمىزدە توقسانداعى اتامىز بار، دەنساۋلىعىن ۋايىمدايمىز. ەگەر جاۋاپكەرشىلىك ءسىز بەن بىزدە جاپپاي بولماسا، ءبىز سياقتىلاردىڭ ارەكەتىنەن تۇك تە شىقپايدى. ۇيلەرىڭدە قالىڭىزدارشى. قۇداي تەرىس قاراماسا، 15 ساۋىردە ۇيرەنشىكتى قالپىمىزعا ورالامىز، جاعدايىمىزدى تەزىرەك رەتتەۋگە كىرىسەمىز.

ۇيدە وتىرماساڭىز، جوعارىدا اتالعان نەگاتيۆ ستسەناريدىڭ بولۋىنا جول اشاسىز جانە بىرەۋدىڭ ولىمىنە سەبەپشى بولۋىڭىز ابدەن مۇمكىن. ەڭ سوراقىسى - ءولتىرىپ العان جاعدايدىڭ وزىندە جاۋاپكەرشىلىكتى سەزىنبەي، "اللانىڭ قالاۋى سولاي بولدى، تۇزى تاۋسىلعان دا" دەي سالاسىز. بۇل كەزەڭ - جاۋاپكەرشىلىگىمىزدى شىڭداۋعا جاقسى مۇمكىندىك.

تومەندەگى سۋرەتتى سىزدەر ءۇشىن سىزدىق. سىزدە ەكى وپتسيا عانا بار. بىرەۋى ۇيدە وتىرماۋ، ەكىنشىسى - وتىرۋ. ارقايسىسى قانداي ناتيجە بەرەتىنى ايدان انىق. ويلانىڭىزدار.

باقىتجان بۇقاربايدىڭ الەۋمەتتىك جەلىدەگى جازباسى

Abai.kz