1969 جىلى ەڭبەك جولىمدى 10 سىنىپتا وقىپ ءجۇرىپ (وتىرار), دەزينفەكتورلىقتان باستادىم. مىڭ بولعىر كورشىمىز، اۋداندىق دەزينفەكتسيا ءبولىمىنىڭ باسشىسى مامىرحان ىبىراەۆ، جەسىر انا، جەتىم بالالاردىڭ جاعدايىن ەسكەرىپ، قازاق سسر-ءنىڭ ەڭبەك تۋرالى زاڭىن جيىپ قويىپ، جۇمىسقا شاقىردى.جاتقان جەرى جاي بولسىن، قايىرىمدى ادامنىڭ! وقۋدان تىس ۋاقىتتا سوۆحوز-سوۆحوز، اۋىل-اۋىلدى ارالاپ، ءتىپتى اۋداندىق اۋرۋحانانىڭ ءوزىن حلوروفوسپەن، دىموۆايا شاشكامەن ۇرعىلاپ جاتار ەدىم. ول جىلدارى سارىاۋرۋ ءتىپتى جانتۇرشىگەرلىك جامان بولاتىن. سارىاۋرۋدان كارانتين جاريالاناتىن. ارنايى كيىم كيىپ، ءدارى-دارمەك ارقالاپ، اۋرۋمەن ارپالىسىپ ءجۇرىپ بۋىنىم قاتىپ ەدى. ول جىلدارى دەزينفەكتسيا ءبولىمىنىڭ ارنايى ۋ شاشاتىن ماشيناسى بولاتىن. كۇشتى تەحنيكامەن قارۋلاناتىن ەدىك.

كوروناۆيرۋس كەلدى. ەلگە وڭاي بولىپ جاتقان جوق. جەكە-جەكە داي بولىپ، دۇنيە قۋىپ كەتكەن (ونىمەن جەتكەن ەشكىم جوق) قازاقتىڭ باسى مىنا سۇمدىق ءتاج تاجال تۇسىندا دا بىرىكپەي يت ءراسۋاسى شىعىپ وتىر. ساياسي كۇرەس ءبىر جاعىمىزدا. ەكونوميكالىق كريزيس جاعانى جىرتىپ ول اكەتىپ بارادى. دارقان قازاق ەلى دەپ جۇرگەن حالقىمىز توي جاساپ داراقىلىق تانىتۋدا. شىرىلداپ جۇرگەن دارىگەرلەر! راحمەت ولارعا! گيپپوكرات انتىنا ادالدىق تانىتۋدا!
استانا، الماتى ديزەنفەكتسيالانۋدا. باسقا ءوڭىر تىم-تىرىس. كۇندە قاداعالايمىن. ايتۋلى ەكى قالانىڭ ءوزىن ديزەنفەكتسيالاۋ كوڭىلىمنەن شىقپايدى. ءالسىز. تىم ءالسىز. جاياۋ جالپى ءجۇرىپ، بالانىڭ كىشى دارەتىندەي سىزدىقتاتىپ، حلاروفوس شاشۋ قۇتقارمايدى ءبىزدى. وزگە وڭىردە ول دا جوق. جىم-جىرت! وسى ۋلاۋ مەنى قاناعاتتاندىرمايدى.

قارۋلى تەحنيكا نەگە جۇمىلدىرىلمايدى؟ تۇسىنەمىن. كەشەگى جەكەشەلەنۋدە سالانىڭ الىپ ماشينالارى جەكەگە كەتتى. ءتىپتى دەزوتدەلدىڭ عيماراتتارى دا الدەكىمدەردىڭ تاقىمىندا كەتتى. بۇگىندە دەزينفەكتسيا ءبولىمى - انشەيىن اتى عانا. دارمەنسىز! تاجال تاناۋىمىزدىڭ استىنا كەلدى. وتىرا بەرەمىز بە قول قۋسىرىپ. ۇكىمەت قايدا قاراپ وتىر؟ قارجى سۇراڭىز. قۋاتتى ماشينانى كوپتەپ الدىرىڭىز. مەگاپوليس قالالاردان باستاپ، وبلىس ورتالىقتارى، اۋدان-اۋدان تۇگەل دەزينفەكتسيالانۋى كەرەك!

قالالاردا ءاربىر پودەزد، ءتىپتى ءاربىر پاتەر دەزينفەكتسيالانۋى كەرەك. ساعان دارمەنسىزدىك تانىتۋعا بولمايدى، ەلجان باتىر! كوروناۆيرۋسپەن كۇرەسۋدىڭ ءبىر اۋىر العىشارتى - دەزينفەكتسيالاۋ! كىرىسىڭىزدەر! جۇمىلا كىرىسىڭىزدەر! بۇل - بۇرىنعى دەزينفەكتور، مارقۇم اكەڭىزبەن سىيلاستىقتا بولعان، جازۋشى اعاڭنىڭ حالىق اتىنان ۇندەۋى، سەنىم ارتۋى دەپ ۇعىن!

قۇلبەك ەرگوبەك

Abai.kz