«اقيقات» جۋرنالىنىڭ باس رەداكتورى، اقىن امانحان ءالىمۇلى ومىردەن وزدى.

امانحان ءالىمۇلى 1952 جىلى 20 قاڭتاردا تۇركىستان وبلىسى، وتىرار اۋدانى، قوجاتوعاي اۋىلىندا تۋعان. 1969 جىلى سول اۋىلداعى امانگەلدى اتىنداعى ورتا مەكتەپتى بىتىرگەن. 1975 جىلى كازگۋ-ءدىڭ جۋرناليستيكا فاكۋلتەتىنە وقۋعا ءتۇسىپ، 1981 جىلى بىتىرەدى. وقۋدى بىتىرگەننەن سوڭ، 1981-1989 جىلدار ارالىعىندا رەسپۋبليكالىق باق «قازاقستان پيونەرى» («ۇلان»), «لەنينشىل جاس» («جاس الاش»), «قازاق ادەبيەتى»، «تۇركىستان» جانە «قازاق راديوسىندا» قىزمەت ەتتى. 1991-1993 جىلدار ارالىعىندا ماسكەۋدەگى م.گوركي اتىنداعى ادەبيەت ينستيتۋتىنىڭ جانىنداعى جوعارعى كۋرسىنىڭ كۇندىزگى بولىمىندە وقيدى. 1994-2012 جىلدار ارالىعىندا «زاڭ گازەتىندە» جاۋاپتى حاتشى جانە شولۋشى بولىپ قىزمەت ەتتى.

امانحان ءالىمۇلى قازاقستان رەسپۋبليكاسىنىڭ «مادەنيەت قايراتكەرى»، م.ماقاتاەۆ اتىنداعى سىيلىقتىڭ لاۋرەاتى (الاش» سىيلىعىنىڭ), وڭتۇستىك قازاقستانعا ەڭبەگى سىڭگەن مەدالىمەن، «جاندوس» اتىنداعى سىيلىقتىڭ يەگەرى، «ۇلت پاتريوتى» گراموتاسىمەن ماراپاتتالعان، قازاقستان جازۋشىلار وداعىنىڭ مۇشەسى. «وتكىردىڭ ءجۇزى»، «اينۇرى الاقانىمدا»، «جانىمنىڭ جاپىراعى»، «بەس قوڭىراۋ»، «كەزدەسۋ» پۋبليتسيستيكالىق جانە ولەڭدەر جيناعىنىڭ اۆتورى.سونداي-اق، «اتاقونىس» اتتى جىر-جيناعى جارىققا شىقتى.

امانحان ءالىمۇلى جۋىردا عانا جۋرناليستەر اكادەميسىنىڭ تولىق مۇشەسى-اكادەميگى ديپلومى جانە توسبەلگىسىمەن ماراپاتتالعان ەدى. سونداي-اق، قر پرەزيدەنتى ق.توقاەۆتىڭ 29 قاراشاداعى جارلىعىمەن «قۇرمەت» وردەنىمەن ناگرادتالعان بولاتىن.

Abai.kz اقپاراتتىق پورتالى رەداكتسياسى اقىننىڭ وتباسىنا قايعىرىپ كوڭىل ايتادى!

Abai.kz