مەملەكەت باسشىسى قاسىم-جومارت توقاەۆتىڭ ەلىمىزدەگى توتەنشە جاعدايعا جانە داعدارىسقا بايلانىستى ناقتى ءىس-شارالار بەلگىلەۋى – ونىڭ بيلىك تىزگىنىن قولىنا مىقتاپ الا باستاعانىن بىلدىرەدى.

ينفلياتسيعا وراي زەينەتاقى مەن الەۋمەتتىك جاردەماقى مولشەرىن 10 پايىزعا يندەكساتسيالاپ، مەملەكەت تاراپىنان 200 ميلليارد تەڭگەدەن استام قاراجات بولىنەتىنىن جاريالاۋىن قوعام وڭ قابىلداپ جاتىر.

وسى باتىل قادامى ارقىلى پرەزيدەنت وسىعان دەيىن «اقشا تاراتۋ دەگەن بارىپ تۇرعان پوپۋليزم» دەپ سايراعانداردىڭ اۋزىنا قۇم قۇيىپتى.

ەندى، 42 500 تەڭگەنى الاتىنداردىڭ ساناتى كەڭەيىپ، ءوزىن-ءوزى جۇمىسپەن قامتىعاندار مەن رەسمي تىركەلمەي جۇمىس ىستەيتىن 3 ميلليونعا جۋىق ازاماتىمىزعا قولداۋ كورسەتىلەدى.

اۋىل شارۋاشىلىعىمەن اينالىساتىن كاسىپكەرلەرگە بيۋدجەتتەن 70 ميلليارد تەڭگە، كوكتەمگى ەگىس ناۋقانى ءۇشىن 100 ميلليارد تەڭگە ءبولۋدى تاپسىرعانىن وتە قۇپتايمىز.

بىراق، بۇل ماقساتتارعا ارنالعان قارجىنى ۇلتتىق قور ەسەبىنەن الىناتىنى ويلاندىرادى. توتەنشە جاعداي سوزىلىپ كەتكەن جاعدايدا كاسىپورىندار، زاۋىتتار، مەكەمەلەر جۇمىسىن جالعاستىرا الماسا، سوڭى نە بولماق؟
قيىن كۇندەر ءالى الدا. ەندەشە، ۇلتتىق قوردىڭ قاراجاتىن ۇنەمدەۋ - مەملەكەتتىڭ باستى مىندەتى بولماق!

ءبىز وتكەن اپتادا «جاس الاش» گازەتىندە، «اباي.كز» سايتىندا ەلىمىزدەگى
92 240 مەملەكەتتىك قىزمەتكەردىڭ 25 پايىزىن قىسقارتۋدى ءدال بۇگىننەن باستاۋدى ۇسىنعانبىز. تەك، وسى قىزمەتكەرلەردىڭ جالاقىسىن كوتەرۋدى توقتاتۋدىڭ وزىنەن 980 ملرد تەڭگە ۇنەمدەلەدى ەكەن!

سونداي-اق، 1 ملن تەڭگەدەن (ودان دا جوعارى) جالاقى الاتىن مەملەكەتتىك قىزمەتكەرلەردىڭ تابەتىن شەكتەۋ. پارلامەنتتىڭ ەكى پالاتاسىنداعى 156 دەپۋتات، مينيسترلەر، اكىمدەر، كوميتەت توراعالارى، وبلىستىق دەڭگەيدەگى باسشىلار، «ا» كورپۋسىنىڭ مەملەكەتتىك قىزمەتكەرلەرى، جوعارعى سوت جانە ايماقتىق سوتتاردىڭ سۋديالارى، پروكۋرورلار، «سامۇرىق-قازىنا»، «بايتەرەك» سياقتى ۇلتتىق كومپانيالاردىڭ (ەنشىلەستەرىمەن بىرگە) توپ مەنەدجەرلەرىنىڭ ەڭبەكاقىسىن نۇر-سۇلتانداعى ورتاشا ايلىق
دەڭگەيىنەن اسىرماۋ شارالارىن زاڭداستىرۋ كەرەك!

زەينەت جاسىنداعى دەپۋتاتتار مەن اكىمدەر، مينيسترلەر، ۇلتتىق كومپانيا باسشىلارى نە ەڭبەكاقى، نە زەينەتاقىنىڭ بىرەۋىن عانا الۋى ءتيىس دەپ سانايمىز! بۇعان سانالىلىقپەن قاراۋدى سۇرايمىز.

مىنە، وسىنداي تەككە جۇمسالىپ جاتقان ميللياردتاردى حالىق يگىلىگىنە پايدالانساق، ۇلتتىق قوردىڭ دەڭگەيىن تۇسىرمەي، ساقتاي الامىز!

قايىم-مۇنار تابەەۆتىڭ الەۋمەتتىك جەلىدەگى جازباسى

Abai.kz