كوروناۆيرۋس ىندەتىنىڭ جاھاندىق جاعدايدا ەتەك جايۋىنا بايلانىستى مەملەكەت باسشىسى قاسىم-جومارت توقاەۆ 16 ناۋرىزدان باستاپ قازاقستاندا توتەنشە جاعداي جاريالادى.بۇگىنگى كۇنى ەلىمىزدىڭ رەسپۋبليكالىق ماڭىزى بار قالالارىمەن قوسا بىرقاتار وبلىس ورتالىقتارى دا كارانتينگە جابىلدى. مەديتسينا ماماندارى مەن پوليتسيا قىزمەتكەرلەرى كۇشەيتىلگەن جۇمىس كەستەسىنە كوشتى. كارانتين ەنگىزىلگەن ايماقتاردا حالىقتىڭ كۇندەلىكتى تۇرمىسىنا قاجەتتى نىساندار (دۇكەن، ءدارىحانا جانە تاعى باسقا) عانا جۇمىس ىستەپ، باسقا ۇيىمدار ءوز جۇمىستارىن ۋاقىتشا توقتاتتى. وسى ورايدا سەنات دەپۋتاتى، الەۋمەتتىك-مادەني دامۋ جانە عىلىم كوميتەتىنىڭ توراعاسى مۇرات باقتيارۇلى ەلدەگى توتەنشە جاعدايعا قاتىستى ءوز پىكىرىن بىلدىرگەن بولاتىن.

«بۇكىلالەمدىك بۇل ىندەت كوپتەگەن ەلدەردى تىعىرىققا تىرەدى. ونىڭ ىشىندە ءبىزدىڭ ەلدى دە اينالىپ وتكەن جوق. وسىعان بايلانىستى ەلىمىزدە توتەنشە جاعداي ەنگىزىلىپ، پرەزيدەنت پەن ۇكىمەت تاراپىنان ناقتى شەشىمدەر قابىلدانىپ جاتىر. الدىمەن ەكى قالا نۇر-سۇلتان مەن الماتى، سودان سوڭ كەشەلى بەرى بىرقاتار وبلىس ورتالىقتارى دا كارانتينگە جابىلىپ جاتىر. بۇل دۇرىس شەشىم. سەبەبى كوروناۆيرۋس ىندەتىنەن قۇتىلۋدىڭ بىردەن ءبىر جولى ول ۇيدەن شىقپاي وقشاۋلانۋ. وسىنداي جاعدايدا الدىمەن مەديتسينا سالاسى ماماندارىنا نەگىزگى اۋىرتپالىق تۇسەتىنى اقيقات. سودان سوڭ پوليتسيا قىزمەتكەرلەرى دە ەرەكشە ءرول اتقارۋدا. وسى مامانداردىڭ جۇمىستارى كۇشەيتىلگەن رەجيمگە اۋىستىرىلىپ، ولار 24 ساعات بويى تىنىشتىق تاپپاۋدا. سونىمەن قاتار حالىقتى ازىق-تۇلىك جانە باسقا كۇندەلىكتى قاجەتتى زاتتارمەن قامتاماسىز ەتۋشى قىزمەتكەرلەردىڭ ەڭبەگىن ەرەكشە اتاپ ءوتىپ، العىسىمىزدى بىلدىرەمىز. توتەنشە جاعدايدا جۇىس ىستەپ جاتقان ازاماتتاردىڭ ەڭبەگى ەرەن»، - دەدى م. باقتيارۇلى.

ول سەنات دەپۋتاتتارى ءوز كەزەگىندە مەديتسينا ماماندارىنىڭ جالاقىسىن ءوسىرىپ، ولارعا قوسىمشا ەڭبەكاقى تولەۋ ۇسىنىسىن قولدايتىنىن ايتىپ ءوتتى.

«ءبىراز ەلدەر توتەنشە جاعدايعا بايلانىستى شۇعىل شەشىمدەر قابىلداپ جاتىر. سونىڭ ىشىندە تىنىمسىز ەڭبەك ەتىپ جاتقان دارىگەرلەرگە جاعداي جاساۋ دا بار. پرەزيدەنتىمىز بەن ۇكىمەت باسشىسى ەلدە توتەنشە جاعداي ەنگىزىلگەن كۇننەن باستاپ ماسەلەنى نازاردا ۇستاۋدا. ءبىز سەناتورلار ءوز كەزەگىمىزدە مەديتسينا سالاسى ماماندارىنىڭ جۇمىسىنا قۇرمەتپەن قاراپ، ولارعا كورسەتىلەتىن كومەككە قاتىستى ۇسىنىستى ءبىر اۋىزدان قولدايمىز»، - دەدى ول.

سونىمەن قاتار دەپۋتات مۇرات باقتيارۇلى بۇگىندە سەنات جۇمىسىنىڭ توقتاپ تۇرماعانىن ايتا كەلە، جۇمىستىڭ قاشىقتان ونلاين تۇردە ءجۇرىپ جاتقانىن العا تارتتى.

«ءبىز وسى سوڭعى ەكى اپتا كولەمىندە قاشىقتان جۇمىس ىستەۋ رەجيمىنە كوشتىك. زاڭنامالاردى ونلاين تۇردە تالقىعا سالىپ، ارنايى چات ارقىلى ءبىر- بىرىمىزبەن پىكىر الماسۋدامىز. ياعني سەناتتىڭ جۇمىسى توقتاپ تۇرعان جوق. ايتار بولساق، الداعى ءساۋىر ايىنىڭ 9-ى مەن 30-ىندا بىرنەشە زاڭناما قابىلداناتىن بولادى. ول زاڭدار قارجى، ىشكى كوشى-قون جانە ەڭبەك سالالارىنا قاتىستى. اتالعان سالالارعا قاتىستى مينيسترلىكتىڭ ماماندارى قاجەت بولعان جاعدايدا ءبىز تەك ءبىر ماماندى نەمەسە ازىرلەۋشىنى شاقىرىپ، سول كىسى ارقىلى بارلىق سۇراقتارعا جاۋاپ الامىز نەمەسە ۇسىنىسىمىزدى بىلدىرەمىز. ودان دا باسقا توراعانىڭ تىكەلەي تاپسىرمالارىن ونلاين تۇردە الىپ، ونلاين تۇردە جاۋاپ بەرۋدەمىز»، - دەدى سەناتور.

سەناتور سونىمەن قاتار ەلىمىزدەگى توتەنشە جاعدايعا بايلانىستى جۇمىسىن توقتاتقان ورتا جانە شاعىن كاسىپكەرلىككە قاتىستى ءوز پىكىرىن ءبىلدىردى.

«وكىنىشكە قاراي، بۇل ىندەت كوپتەگەن ەلدەر ازاماتتارىنىڭ دەنساۋلىعى مەن قاتار ەكونوميكاسىنا دا كەرى اسەرىن تيگىزۋدە. قازىرگى تاڭدا قازاقستاندا مەنىڭ جەكە ەسەبىم بويىنشا 1 ملن جۋىق ادام جۇمىسىن توقتاتىپ، ۇيدە وتىر. بۇل ارينە اۋقىمدى كورسەتكىش. بۇعان بايلانىستى ۇكىمەت جانىنان قۇرىلعان ارنايى كوميسسيا ونىڭ ءبارىن ەسەپتەپ، ءتيىستى شارالاردى قابىلداپ جاتىر. وسىعان بايلانىستى سەناتورلار دا اقىلداسۋ-كەڭەسۋ شارالارىن وتكىزۋدە. ۇلتتىق ۆاليۋتانىڭ قۇنسىزدانۋى، كوروناۆيرۋس جانە كارانتيننىڭ ەڭگىزىلۋىنەن شاعىن جانە ورتا بيزنەسكە زور زالال كەلتىرۋدە. 2020 جىلدىڭ 1 جانە 2 توقساندارى ءۇشىن ۇكىمەت قوسىمشا قۇن سالىعىن تولەۋدەن تولىق بوساتىپ، 3 جانە 4 توقساندارى ءۇشىن قوسىمشا قۇن سالىعىن 6%-7% تومەندەتۋ جاعىن قاراستىرسا دەيمىن. كاسىپكەرلەردەن دە كوپ ۇسىنىس كەلىپ جاتىر. ولاردىڭ پىكىرىنشە، جۇمىس بەرۋشىلەر بيۋدجەتكە اۋداراتىن مىندەتتى زەينەتاقى جارناسى، جەكە تابىس سالىعى مەن الەۋمەتتىك سالىقتان 6 ايعا بوساتسا دەيدى. بىراق، ولار 3,5% كولەمىندەگى الەۋمەتتىك اۋدارىم، 2% مىندەتتى الەۋمەتتىك مەديتسينالىق ساقتاندىرۋ مەن 1 % كولەمىندەگى جارنانى تولەي بەرۋگە بولاتىنىن ايتادى. وسى ۇسىنىستار ۇكىمەتكە جىبەرىلەدى، - دەدى م. باقتيارۇلى.

Abai.kz