پرەزيدەنتتەن پارمەن ءتۇسىپ، ۇكىمەت ماقۇلداعان سوڭ، الگى جىر بولعان 42 500 تەڭگە باس-اياعى 3 ميلليون ادامعا بەرىلەتىن بولعان-دى.

ءبىر ەمەس، بىرنەشە مينيستر ءمالىم قىلىپ، جارىلقاپ بەرگەن جاردەمپۇلدى الۋدىڭ جولدارىن ءتۇسىندىردى. ارنايى سايت اشىلاتىنى ايتىلدى. ال شىنتۋايتىنا كەلگەندە «سايت» سىزىلىپ-سوزىلىپ ول تۇردى. «ەلەكتروندى ۇكىمەت» «كىلت» تۇگەندەپ ول تۇردى. «تەلەگرامم-بوتتاردىڭ» حابارىن ەستىگەن ادام تاعى جوق. كۇن ۇزاققا سايتتىڭ بەتىن شۇقىلاپ وتىرعان كوپ ادام اقىرى وتىنىشتەرىن وتكىزە العان جوق.

ال كەشە مينيستر اسقار جۇماعاليەۆ كەشەگى تەحنيكالىق اقاۋلار ءۇشىن اقتالىپ سويلەيمىن دەپ، سوزدەن ءسۇرىنىپتى. ءدال ايتساق، اسقاردىڭ ايتقاندارى الەۋمەتتىك جەلى قولدانۋشىلارىنىڭ ءاجۋاسىنا اينالدى.

«ەلەكتروندى ۇكىمەتتىڭ جۇمىس ىستەۋ مۇمكىنشىلىگىنە توقتالساق، حقكو-لارجابىلعان سوڭ، پورتال شتاتتىق رەجيمدە جۇمىس ىستەدى. پورتالدى پايدالانۋشىلار سانى بىردەن كوبەيدى. سوعان قاراماستان پورتال شتاتتىق رەجيمدە جۇمىس ىستەدى.

كۇندەلىكتى رەجيمدە پورتالدا 600 مىڭ ءوتىنىم تۇسەتىن. قازىر ەڭ جوعارعى شەكتىك جۇكتەمە كەزىندە ساعاتىنا 15 ميلليونعا دەيىن جەتىپ وتىر. ول ءوز كەزەگىندە ايتارلىقتاي اۋىر جۇكتەمە.

ءبىز ءتۇنى بويى جۇمىس ىستەپ، اتالعان قىزمەتتى ىسكە قوستىق. وسىدان كەيىن الەۋمەتتىك تولەمدى ۇسىنۋعا قاتىستى ءتيىستى قىزمەتتى ىسكە اسىرۋدى باستادىق. پورتالدا ءبىر مەزگىلدە 15 ميلليونعا دەيىنگى سەسسيا تىركەلدى. بۇل كورسەتكىش بارلىق شتاتتىق رەجيمدەردەن اسىپ ءتۇستى. ارينە، بۇل تۇرعىدا بەلگىلى ءبىر ماسەلەلەر تۋىنداپ، ءبىز پروبلەمالاردى شەشۋ ماقساتىندا سىرتقى كانالداردى اجىراتتىق»، - دەپتى مينيستر.

سونىمەن، ءمينيستردىڭ سوزىنەن ۇققانىمىز توتەنشە جاعدايعا بايلانىستى ەلىمىزدەگى بارلىق حقكو جابىلعاننان سوڭ، «egov» سايتىنا سۇرانىس ارتقان. ال ۇكىمەت 42 مىڭدىق كومەكتى بەرۋ تۋرالى شەشىم شىعارعاندا، مينيسترلىكتىڭ ماماندارى ءتۇن بالاسى كوز ىلمەي ءجۇرىپ، ارنايى سايت اشقان. ونىسى جاڭاعى «42500.enbek.kz» دەيتىن سايت. الايدا وعان ءبىر دەگەندە 15 ميلليون ادام كىرىپ، سايتتىڭ شاماسى جەتپەي، ىستەمەي قالعان-مىس.

ءوزى ەلدە 18 ميلليوننان از اساتىن جان سانى بولسا. مينيسترلىك جاپ-جاڭا اشقان، اشقانىنا 1 تاۋلىك تە بولماعان ول سايتقا ءبىر كۇندە 15 ميلليون ءوتىنىش تۇسكەن بولسا، ءارى قاراي ءوزىڭىز ەسەپتەي بەرىڭىز.

«ءبىر كۇندە پالەنشە ميلليون ادامنان، ءبىر ەمەس، بىرنەشە ءوتىنىش كەلىپ، سودان وسى 15 ميلليون دەگەن سان شىقتى» دەسە جانە سەنەر ەك. ال الگى اڭگىمەسى كوپ 42 مىڭدى الۋعا 15 ميلليون ادام ءوتىنىش بەرگەن دەگەندى اريفمەتيكانىڭ قاي امالىنا سالىپ ەسەپتەسەڭىز دە، اقىلعا سىيمايتىن دۇنيە.

اسەكەڭ مينيستر. ءجاي مينيستر ەمەس، قازاقستاننىڭ تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى. ياعني، ەلدەگى تسيفروۆيزاتسيا ساياساتىنا تىكەلەي قاتىسى بار ادام. ايتپەسە، جاردەمپۇلعا جاۋاپتى ەڭبەك ءمينيسترى سۇراققا الىنۋى كەرەك-ءتى. جوق. بۇ جولى اسەكەڭ ءتۇستى، «مايدانعا».

ەندى ءالىمىز جەتكەنشە اقتاپ كورەيىك. بۇل جەردە، ءبىر بولسا، سوزدەن سۇرىنگەن شىعار، اسەكەڭ. ونداي-ونداي قازاقستاننىڭ شەنەۋنىكتەرىنە بۇرىننان ءتان ادەت قوي. ءارىسى «پوتومۋ چتو – پوتومۋ چتو»، دەپ تانىلعان ەكس-مينيستر ابدەنوۆتى، بەرىسى كەشەگى «ناكونەتس تو»، دەپ كۇلكىگە قالعان بۇرىنعى باس سانيتار بەكشيندى ايتىڭىز. مىسال كوپ. اناۋ، قاراقۇسوۆا اپامنىڭ ءار ءسوزى ەل ىشىندە «حيت». دەپۋتاتتاردان كوسارەۆ پەن بوجكولار، مينيسترلەردەن بەكەتاەۆتار مەن سۇلەيمەنوۆتەر بار. ەندى بۇل ساناتقا اسەكەڭ دە قوسىلدى، انە.

تاقىرىپقا تۇزدىق رەتىندە بىلە ءجۇرىڭىز:

قازاقستاننىڭ حالىق سانى – 18 ميلليون 600 مىڭ ادامنان كوپ. ونىڭ ىشىندە: قالا حالقى – 58,5 پايىز، اۋىل حالقى – 41,5 پايىز. قازاقستاندا – 6 ميلليونعا جۋىق بالا بار. مەكتەپكە باراتىندارى – 2,5-3 ميلليون. زەينەت جاسىنا جەتكەن 2 ميلليوننان استام ادام تاعى بار.

ال اسەكەڭنىڭ اريفمەتيكاسى: (18 ملن. – 15 ملن. = 42 500 تەڭگە) دەيدى.

ايتپاقشى، وسى ماقالا جازىلىپ جاتقاندا استانا جاقتاعى اق جاعالىلار ەسەپ-قيساپتارىن تۇزەتىپتى.

جەدەل شتاب تاراتقان مالىمەتتەرگە قاراعاندا، 4 ساۋىردەگى تاڭعى ساعات 9-داعى جاعداي بويىنشا قازاقستاندىقتاردان توتەنشە جاعداي كەزەڭىندە تابىسىنان ايىرىلۋىنا بايلانىستى الەۋمەتتىك تولەم تاعايىنداۋعا 351 777 ءوتىنىش قابىلداندى.

ونىڭ ىشىندە:

eGov پورتالى ارقىلى – 292 281;

42500.enbek.kz سايتى ارقىلى – 59 496.

Abai.kz