پارلامەنت ءماجىلىسىنىڭ دەپۋتاتى گەننادي شيپوۆسكيح ەلباسى نۇرسۇلتان نازارباەۆتىڭ ماقالاسىن وقىپ، ودان نە تۇيگەنىن ايتىپ بەردى.

«تۇڭعىش پرەزيدەنت – ەلباسىنىڭ شىققان بۇگىنگى ماقالاسىمەن وقىپ، تانىستىق. ماقالادا تەرەڭ وي جاتىر. بىرىنشىدەن ەلباسى وسىناۋ كۇردەلى كەزەڭدە حالىقپەن اقىلداسىپ وتىر. ىندەت قازىر قازاقستاندى عانا ەمەس، كۇللى الەمگە قاۋپىن تۋعىزۋدا.

تۇڭعىش پرەزيدەنتتىڭ ماقالاسىندا ەكى اسپەكتكە ەرەكشە نازار اۋداردىم: بىرىنشىدەن ەلباسى ۇلتتىق قورعا بايلانىستى حالىققا ناقتى اقپارات بەردى. پاندەمياعا بايلانىستى حالىقتى قولداۋ ءۇشىن ۇلتتىق قوردان ءتيىستى قاراجات بولىنەتىنىن ايتتى. جالپى كىمگە قانداي جەڭىلدىكتىڭ بەرىلەتىنى دە اتالدى»، - دەيدى گەننادي شيپوۆسكيح قازاقپارات تىلشىسىنە تەلەفون ارقىلى ايتقان پىكىرىندە.

دەپۋتاتتىڭ ايتۋىنشا، بۇرىن ەلباسىنا ۇلتتىق قورداعى اقشانى بۇعان دەيىنگى قاجەتتىلىكتەرگە جۇمساۋ تۋرالى سان ءتۇرلى ۇسىنىس بولعان.

«ايتسە دە، نۇرسۇلتان نازارباەۆتىڭ سول تۇستا مىزعىماعان قاعيداتىنىڭ بۇگىنگى كۇنى پايداسىن كورىپ وتىرمىز. سونىمەن بىرگە ەكىنشى اسپەكت: ەلدى تىڭداتا بىلەتىن زيالى قاۋىمعا ايتىلعان وي.

سەبەبى ەلباسى ايتىپ وتىرعانداي حالىقتى سابىرعا شاقىرىپ، وسكەلەڭ ۇرپاققا دۇرىس وي-اقىل ايتۋ كەرەك. قازاقستان تاۋەلسىزدىگىن جاريالاعالى بەرى 30 جىل ۋاقىت ءوتتى. ياعني سول كەزدە تۋعان بالا قازىر وردا بۇزار وتىز جاسقا جەتتى. ءبىر قاراساڭ، كوپ تە، از دا ەمەس.

مەملەكەت وسىعان دەيىن دە، كەيىن دە جاستارىمىزدى قولداپ، ءبىلىمىن شىڭداي بەرمەك. قازىر سول جاستارىمىز ىندەتتىڭ بەتىن قايتارۋ ءۇشىن ءبىرى دارىگەر، ءبىرى پوليتسيا قىزمەتكەرى بولىپ، كۇن-ءتۇن دەمەي ەڭبەكتەنىپ ءجۇر. ەلباسى ولاردىڭ ەڭبەگىنە دە ەرەكشە العىسىن ايتتى.

اباي دا «ءبىرىڭدى قازاق، ءبىرىڭ دوس، كورمەسەڭ ءىستىڭ ءبارى بوس» دەيدى. وسىناۋ قىسىلتاياڭ شاقتا ەلدەگى ءار ازامات «ەلىم ءۇشىن نە ىستەي الامىن؟» دەپ وزىنە ءوزى سۇراق قويۋى ءتيىس. بۇگىنگى ەلباسى ماقالاسىندا يدەولوگيالىق تۇرعىدا ۇلكەن قۇندىلىقتار جاتىر. وسى قۇندىلىقتاردى قولداپ، ءوزىمىز ارقاشان كۇش بىرلىكتە ەكەنىن ءتۇسىنۋىمىز كەرەك»، - دەيدى دەپۋتات.

Abai.kz