ۇلتتىق كەڭەستىڭ مۇشەسى رەتىندە جاڭا زاڭ جوباسى بويىنشا جۇمىس توپتارىنداعى تالقىلاۋعا قاتىستىم. وففلاين تالقىلاۋلار ەلدەگى توتەنشە جاعداي مەن كارانتينگە بايلانىستى اياقاستى ونلاين رەجيمگە اۋىستى. بۇل ورايدا دا مۇنى كەيىنگە قالدىرۋ قاجەت ەدى دەگەن پىكىرلەردى وقىپ قالدىم. مەنىڭشە جۇمىستى ورتا جولدان تاستاپ، بەلگىسىز مەرزىمگە قالدىرۋدىڭ قاجەتى جوق. ونلاين تالقىلاۋدىڭ وففلاين تالقىلاۋدان اسا ءبىر ارتتا قالىپ قويعان ايىرماشىلىعى بولدى دەپ ايتا المايمىن. كۇندە ساعاتتاپ بايلانىسقا شىعىپ وتىردىق. ازاماتتىق قوعام وكىلدەرى، زاڭگەرلەر، دەپۋتاتتار وزدەرىنىڭ ويلارىن، پىكىرلەرىن اشىق ايتتى. كەرەك جەرىندە ءتىپتى قاتتى ايتقان كەزدەر دە بولدى. ءبىز دە ءوز تاراپىمىزدان جۋرناليستەردىڭ جۇمىسىن رەتتەيتىن نورمالارعا قاتىستى، پيكەتتەردىڭ ماسەلەسى، ميتينگ وتكىزىلەتىن ارنايى ورىندارعا بايلانىستى جانە باسقا دا نورمالارعا سۇراقتارىمىز بەن ۇسىنىستارىمىزدى ايتتىق. بارىمىزگە ءسوز بەرىلدى. كەيبىر پىكىرتالاستار ساعاتقا سوزىلدى. ونىڭ بارلىعى وڭ ناتيجە بەرگەنىن جانە وسى سوزدەرىمدى ۇلتتىق كەڭەستەگى ارىپتەستەر ەرلان سايروۆ، مۇحتار تايجان، مارات باشيموۆ، مۇرات ابەنوۆ راستايدى دەپ ويلايمىن. جۇمىس توبىنىڭ توراعاسى، دەپۋتات قانات مۋسين مىرزانىڭ دا كاسىبي ەڭبەگىن اتاپ وتكىم كەلەدى. قانشاما جان-جاقتى، كەيدە قاراما-قايشى پىكىرلەردىڭ بارلىعىن مۇقيات، سابىرمەن تىڭداپ، بارىنە ۋاقىت ۇيلەستىرە ءبىلدى. ەڭ باستىسى وسى جۇمىستىڭ ناتيجەسى.

انىعىن ايتايىق، جاڭا زاڭ جوباسىنىڭ كوپتەگەن نورمالارى العاشقى نۇسقاسىنان جەتىلدىرىلە ءتۇستى. ەسكەرتۋ ۋاقىتى قىسقارتىلدى، زاڭمەن تىيىم سالىنباعان (قاۋىپتى ينفراقۇرىلىم نىساندارىنىڭ ماڭىنان وزگە) كەز-كەلگەن جەردە پيكەت ۇيىمداستىرۋعا رۇقسات بەرىلمەك. جۋرناليستەردىڭ جۇمىسىن رەتتەيتىن نورمالاردىڭ ءبارى دەرلىك الىنىپ تاستالدى. تۇبەگەيلى جاڭا زاڭنان وڭ ناتيجە كۇتەمىز.

اسحات سادىرباي

Abai.kz