10-ءساۋىر كۇنى تۇركى كەڭەسىنىڭ مەملەكەت باسشىلارى "COVID-19" پاندەمياسىنا قارسى كۇرەسكە ارنالعان بەينەكونفەرەنتسيا وتكىزەدى. اتالعان بەينەجيىنعا قازاقستان پرەزيدەنتى قاسىم-جومارت كەمەلۇلى دا قاتىساتىنىن راستادى. بۇل تۋرالى پرەزيدەنتتىڭ ءباسپاسوز حاتشىسى جازدى. 

سونداي-اق تۇركى كەڭەسىنىڭ قازىرگى توراعاسى، ازەربايجان رەسپۋبليكاسىنىڭ پرەزيدەنتى يلحام اليەۆتىڭ باستاماسىمەن شاقىرىلعان بۇل سامميتكە قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ، تۇرىك رەسپۋبليكاسىنىڭ پرەزيدەنتى رەدجەپ تايپ ەردوعان، وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ، تۇرىكمەنستان پرەزيدەنتى گۋربانگۋلى بەردىمۇحامەدوۆ، ماجارستان پرەمەر-ءمينيسترى ۆيكتور وربان جانە تۇركى كەڭەسىنىڭ باس حاتشىسى باعداد امىرەەۆ قاتىسادى.

بەينەكونفەرەنتسيادا دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى دوكتور تەدروس ادحانوم گەبرەيەسۋس تا بولادى.

سامميتتە مەملەكەتتەر باسشىلارى كوروناۆيرۋس ىندەتىنە قارسى كۇرەسكە ۇلتتىق دەڭگەيدە قابىلدانعان شارالار، دەنساۋلىق ساقتاۋ سالاسىندا كوپجاقتى ىنتىماقتاستىقتى دامىتۋ جانە وڭىردە "COVID-19" ىندەتىنىڭ ءورشۋىن تۋىنداتقان ورتاق ماسەلەلەردى شەشۋ تۋرالى پىكىر الماسادى.

ولار كوروناۆيرۋستىڭ ۇلتتىق جانە الەمدىك ەكونوميكاعا تەرىس اسەرىن جويۋ جولدارىن تالقىلاپ، داعدارىس ۋاقىتىندا جانە پاندەميادان كەيىنگى كەزەڭدە ساۋدا ەكونوميكالىق قاتىناستاردى جالعاستىرۋ جانە كەدەرگىسىز تاسىمالداۋدى قامتاماسىز ەتۋ ءۇشىن بولاشاقتا بىرلەسكەن كۇش-جىگەر مەن ورتاق شارالاردى قابىلداۋ ماسەلەلەرى توڭىرەگىندە پىكىر الماسادى.

سامميت سوڭىندا مەملەكەتتەر باسشىلارى بىرلەسكەن دەكلاراتسياسىن قابىلدايدى.

Abai.kz