قازاقستاندا كوروناۆيرۋس دەرتىنە شالدىققان 600 دەن اسا ادامنىڭ 120 ادامى، ياعني 19%-ى دارىگەرلەر دەگەن دەرەك تارادى. وتە قورقىنىشتى جانە الاڭدارلىق دەرەك. سەبەبى، ينفەكتسيانىڭ ناعىز وشاعى بولعان يتاليانىڭ وزىندە بۇل كورسەتكىش 8% بولسا، يسپانيادا 14%، گەرمانيادا 3%، قىتايدا 4% اسپاعان. ال، بىزدە 19%! ياعني، دەرتكە شالدىققانداردىڭ بەستەن ءبىرى دەگەن ءسوز!

ەندىگى قىزىقتى قاراڭىز. جەلى قولدانىلۋشىلارى اراسىندا «پرەزيدەنت توقاەۆ دارىگەرلەرگە بەرەتىن ءوسىمپۇلدى بەلگىلەگەننەن كەيىن، دارىگەرلەر وسىلاي جاپپاي جۇقتىرا باستادى نەمەسە جۇقتىردىق دەپ وتىرىك اقپارات بەرە باستادى» دەگەن پىكىرلەر بوي كوتەرە باستادى. مۇنداي پىكىر ءبىلدىرۋ – جۇمسارتىپ ايتقاندا، قيانات («يتتىك» دەۋگە ءبىراز دوستارىمنىڭ كوڭىلىنە كەلەر دەپ، تەجەلىپ وتىرمىن), دوستار!

ءبىز ءبىر نارسەنى ۇعىپ الساق. COVID-19 – «جۇقتىرسام، ەمدەلىپ الام عوي!» دەپ تاۋەكەلگە باراتىن، ناقتى ۆاكتسيناسى، شتامى بار ءسىز بەن ءبىز بىلەتىن اۋرۋ ەمەس. ونى ەلدەگى اۋرۋدان ايىققانداردىڭ سانىنا، پايىزدىق مولشەرلەمەسىنە قاراپ اڭعارۋعا بولادى. ال ولاردى ەمدەپ جاتقان دارىگەرلەر مۇنى بىزدەن ارتىق بىلەدى. بۇل جەردە بىلاي ايتقاندا «رۋسسكايا رۋلەتكا» سياقتى. يممۋنيتەتىڭ مىقتى،تاماعىڭ دۇرىس، ۇيقىڭ، ميىڭ تىنىش ادام بولساڭ، قۇداي وڭداپ، اتالارىڭ قولداپ، دەرتتى جەڭۋىڭ مۇمكىن. بۇل بەس قارۋىڭ ساي بولماسا، كەتتىم دەي بەر.

ال ەندى، دارىگەرلەردىڭ جاعدايىنا تۋرا قارايىق. ءاۋ باستا وسى ىندەت باستالعالى ونىمەن بەتپە-بەت كەلگەن وسى دارىگەرلەر. ولاردىڭ قاتارىنا جالپى پراكتيكاداعى (ۆوپ), ۋچاسكەلىك دارىگەرلەردەن باستاپ، جەدەل جاردەم جانە ينتەنسيۆتى تەراپيا دارىگەرلەرىنە دەيىنگى دارىگەرلەردىڭ تۇتاس ارمياسى كىرەدى. توتەنشە جاعداي جاريالانباي وتىرىپ، مۇنىڭ ءبارى كۇندەلىكتى سول ناۋقاستارمەن قويان-قولتىق جاعدايدا جۇمىس جاسادى.

ودان قالا بەردى، سوعىستىڭ العاشقى جىلدارىنداعى ەكەۋارا ءبىر ۆينتوۆكا تيگەن اتالارىمىز سياقتى، قورعانىش ماتەريالدارى جەتكىلىكسىز جاعدايدا، ءبىر رەتتىك قورعانىش كيىمىن بىرنەشە رەت جۋىپ كيىپ، جۇمىس جاسادى (بۇل تۋرالى دا جازىلدى). كوپشىلىك دارىگەرلەرگە ماسكالار جەتكىلىكسىز بولدى. سونداي قاربالاس جاعدايدا، مامان تاپشىلىعى بولعاندىقتان، كۇن ءتۇن دەمەي ۇيقىسىز، دۇرىس تاماقسىز وسى ەلدىڭ ازاماتتارىن اۋرۋدان اراشالاپ قالۋ ءۇشىن دامىلسىز جۇمىس جاسادى. اقپارات ءۇشىن ايتا كەتەيىن، تەك الماتىداعى ي.جەكەنوۆا اتىنداعى اۋرۋحانانىڭ ءوزى كۇنىنە شامامەن 140 ادامعا دەيىن قابىلداپ وتىرعان!

دارىگەرلەر اياقتا كەرزى ەتىك، ۇستىدە «سكافاندر»، ونىڭ سىرتىنان دوجدەۆيك سىندى ءبىر رەتتىك جابىن، بەتتە ماسكا، ونىڭ سىرتىنان رەسپيراتور، كوزدە شاڭعىشىلاردىكىندەي كوزىلدىرىكپەن توقتاۋسىز اياقتارىنان تىك تۇرىپ ۇيقىسىز قىزمەت ەتكەن. تاماق پەن ترانسپورت جاعدايىنىڭ قانداي بولعانىن جازدىق. جەلىدە ءبارىمىز جاپپاي شۋلاپ ءجۇرىپ ونى بەرتىندە عانا تۇزەتتىك. سوندا، بۇكىل اۋاسى لاستانعان جەردە 24 ساعات توقتاۋسىز شاپقىلاپ، سىلەلەيتىن، ۇيقى كورمەگەن، دۇرىس تاماق ىشپەگەن، پسيحولوگيالىق قىسىمدا جۇرگەن، يممۋنيتەتتەرى پلينتۋستان تومەن قۇلاعان دارىگەرلەر جۇقتىرماعاندا، ۇيدە كارانتيندە ديۆاندا جاتقان بىزدەر جۇقتىرامىز با؟

دوستار، ەگەر مەن قولىمدا زاكۇن كۇشى بار ادام بولاتىن بولسام، ءدال قازىر سول وتەماقىنى ينفەكتسيالىق جۇقپالى اۋرۋحانالاردا قىزمەت ەتىپ جاتقان ءاربىر دارىگەرىنەن باستاپ، كۇزەتشىسىنە دەيىن، ولاردان بولەك ۋچاسكەلىك دارىگەرلەردەن باستاپ، كىم وسى دەرتپەن كۇرەسكە جاناما بولسىن ارالاسسا، ەشبىرىن الالاماي بەرگىزەر ەدىم. سەبەبى، ولاردىڭ جەگەن اسى – ادال، ەڭبەكتەرى زور. وعان ولاردى سول وتەماقى ءۇشىن اۋرۋ جۇقتىردى دەپ ساۋەگەيسىمەي، سولاردىڭ ورنىندا ءبىر كۇن جۇمىس جاساپ كورسەك كوز جەتكىزەر ەدىك.

P.S.ايتپاقشى، وتەماقىعا بايلانىستى وتكەندە جازىلعان پوستتىڭ ناتيجەسىنە توقتالا كەتەيىن. الماتىداعى ي.جەكەنوۆا اتىنداعى جۇقپالى اۋرۋلار اۋرۋحاناسىنىڭ باسشىلىعى وتكەندە وتەماقىعا قاتىستى جازىلعان پوستتان كەيىن، باكتەريولوگيالىق لابوروتوريانىڭ قىزمەتكەرلەرىنە وتەماقى بەرەتىن بولىپتى دا، لابوروتوريالىق ءبولىم مەن زارارسىزداندىرۋ ءبولىمىن (ستەريلنىي بلوك) ءالى دە شومىشتەن قاعىپ وتىر ەكەن. مۇنى «سابوتاج» دەپ اتاعاننان باسقا ءسوز تۇسپەي وتىر اۋىزعا. جاعداي ءالى دە تۇزەلمەسە، پرەزيدەنتتىڭ اتىنا اشىق حات جازۋ عانا قالادى.

نۇراددين سادىقوۆتىڭ الەۋمەتتىك جەلىدەگى جازباسى

Abai.kz