بۇگىندە ەلىمىزدە كومەككە مۇقتاج وتباسىلار از ەمەس. الايدا قايىرىمدى جانداردىڭ ارقاسىندا الەۋمەتتىك از قامتىلعان وتباسىلارعا ءتيىستى جاردەم بەرىلىپ كەلەدى. ماسەلەن، جۋىردا قازاقستان مۇسىلماندارى ءدىني باسقارماسىنىڭ ۇيىتقى بولىمەن بىرقاتار وتباسىلار الەۋمەتتىك كومەك العان ەدى.

ناۋرىزباي قاجى تاعانۇلى جەتەكشىلىك ەتەتىن قازاقستان مۇسىلماندارى ءدىني باسقارماسى وتكەن اپتادا 5 957 وتباسىنا الەۋمەتتىك جاردەم جاساعان. اتالعان قايىرىمدى ىسكە باس ءمۇفتيدىڭ ءوزى ۇيىتقى بولىپ، ەلورداداعى قايىرىمدىلىق شاراسىن باستاپ بەردى. كومەككە مۇقتاج وتباسىلارعا بارىپ، حال-جايىن ءبىلىپ، ولارعا ازىق-تۇلىك تاراتىپ، ناسيحاتىن جەتكىزدى.

ناۋرىزباي قاجى تاعانۇلىنىڭ ايتۋىنشا، ءدىني باسقارمانىڭ نەگىزگى جۇمىستارىنىڭ ءبىرى – قايىرىمدىلىق شارالارىنا ۇيىتقى بولۋ.

-«قازاقتا «قايىرىمدىلىق جاساساڭ – قايىرىن ءوزىڭ كورەسىڭ» دەگەن اتالى ءسوز بار. ءبىزدىڭ باسقارمانىڭ نەگىزگى باعىتتارىنىڭ ءبىرى – قايىرىمدىلىق. مەن جۇرتىمىزعا جولداعان ۇندەۋىمدە كارانتين كەزىندە ۇمىتسىزدىككە بوي الدىرماي، ساۋاپتى امالدار مەن قايىرىمدىلىق شارالارعا ۇلەس قوسۋعا شاقىردىم. ءبىز قاشان دا وزگەلەرگە قايىرىمدىلىق جاساپ، جان-جاعىمىزعا شۋاعىمىزدى توگىپ، شاراپاتىمىزدى تيگىزىپ، ادامنىڭ العىسىن الىپ ءوسىپ-ونگەن ەلمىز. سىندارلى ساتتە ءبىر-بىرىمىزگە جىلى ءسوز ايتىپ، جابىققان جاندارعا كومەكتەسۋدىڭ ساۋابى مول. وسىناۋ ساۋاپتى ىسكە ۇلەس قوسقان بارشا ءدىن قىزمەتكەرلەرى مەن دەمەۋشى ازاماتتارعا رياسىز ريزاشىلىعىمدى بىلدىرەمىن»,-دەدى باس ءمۇفتي.

قازاقستان مۇسىلماندارى ءدىني باسقارماسى ۇيىتقى بولعان اتالمىش قايىرىمدىلىق اكتسياسى رەسپۋبليكا دەڭگەيىندە جۇزەگە اسقان. تۇرمىستىق زاتتار مەن ازىق-تۇلىككە 25 015 950 تەڭگە كولەمىندە قاراجات جۇمسالعان.

باس ءمۇفتيدىڭ بۇل قايىرىمدى ءىسىن اقتوبە وبلىسىنىڭ باس يمامى تولەبي قاجى وسپان باستاعان ءدىن ماماندارى مەن جەرگىلىكتى حالىق قولدادى. ءسويتىپ، قايىرىمدىلىق شاراسىنا ءبىر كىسىدەي جۇمىلعان.

قمدب باستاماسىنىڭ اياسىندا 2 ءساۋىر كۇنى وبلىس ورتالىعىنداعى كوتەرمە ساۋدا ورىندارىنىڭ يەلەرى مەن جەرگىلىكتى كاسىپكەرلەر بىرىگە وتىرىپ، 100 وتباسىنا جالپى كولەمى 2,5 توننا بولاتىن ازىق-تۇلىك پاكەتتەرى تابىستالعان.

اقتوبە وبلىسىنداعى “نۇر عاسىر” مەشىتىنىڭ جانە شالقار، العا، مۇعاجار، ويىل اۋداندارى مەن ەمبى قالالىق مەشىتتەرىنڭ باس يمامدارىنىڭ، ءدىن قىزمەتكەرلەرى دە قمدب نىڭ قايىرىمدىلىق شاراسىنا ءوز ۇلەستەرىن قوسىپ جاتىر. ماسەلەن، وسى اپتادا كارانتين ءتارتىبىن ساقتاپ ۇيدە وتىرعان كوپبالالى جانە جالعىزباستى انالارعا كۇندەلىكتى قاجەتتى ازىق-تۇلىك ونىمدەرى مەن قايىرىمدىلىق قورجىندارى تاراتىلدى. جالپى العاندا،اقتوبە وبلىسىنىڭ ءدىن ماماندارى وڭىردەگى كوپبالالى جانە الەۋمەتتىك جاعىنان از قامتىلعان 94 وتباسىنا جاردەم بەرگەن. جاردەم كولەمى 2 توننا 153 كەلى ازى-تۇلىكپەن قاتار جالپى سوماسى 670 000 تەڭگەنى قۇرايدى.

مۇنداي قايىرىمدىلىق شاراسى قوستاناي وڭىرىندە دە جالعاسىن تاپتى. ناقتىراق ايتساق، قوستاناي وبلىسى اۋليەكول اۋدانىنىڭ ءاميت يشان مەشىتىندە ەلىمىزدەگى ورىن العان توتەنشە جاعدايعا بايلانىستى «Nur Otan» پارتياسى قولعا العان «ءبىز بىرگەمىز» اكتسياسى ءوتتى.

اتالعان شارا تۋرالى اۋداننىڭ باس يمامى نۇرلان قاجى سىزدىقوۆ قايىرىمدىلىققا مۇقتاج ادامدارعا قمقورلىق جاساۋ ماقساتىندا يگىلىكتى ءىستى قولعا العاندارىن ايتىپ ءوتتى.

وڭىردەگى ءدىن قىزمەتكەرلەرى الەۋمەتتىك جاعىنان از قامتىلعان ون وتباسىنا ازىق-تۇلىك ۇلەستىردى. باس يمامنىڭ ايتۋىنشا، مۇنداي ىزگى ىستەر الداعى ۋاقىتتا دا جالعاسىن تابا بەرمەك.

سونىمەن قاتار، قمدب ۇندەۋىنە شىمكەنت قالاسى دا بەلسەنە قاتىسقان. ولار باس ءمۇفتي ناۋرىزباي قاجى تاعانۇلىنىڭ يگى باستاماسىنا ءوز ۇندەرىن قوسۋ ماقساتىندا، شىمكەنت قالاسىنىڭ باس يمامى باقتىباي بەيسەنباەۆ، نايب يمام مۇحامەدجان ەستەمىروۆ باستاعان بىرقاتار ءدىن وكىلدەرى مەن ەرىكتى ازاماتتار قاتىسقان. وسى يگى شارا اياسىندا شىمكەنت قالاسى، ءال-فارابي اۋداندىق «ا.قاتتاني» مەشىتىندە «سovid-2019» جۇقپالى ىندەتىنەن تەزىرەك ايعىپ، ەلدىڭ اماندىعىن تىلەپ اللا جولىندا ءنازىر قۇرباندىق شالدىندى.

ال، پاۆلودار وڭىرىندە ەلىمىزدە بەلگىلەنگەن توتەنشە جاعدايعا بايلانىستى باس ءمۇفتي ناۋرىزباي قاجى تاعانۇلىنىڭ قايىرىمدىلىق شاراسىن ءارى قاراي جالعاستىرىپ، ۇندەۋىنە قولداۋ ءبىلدىردى.

مىسالى، وبلىستىق وكىلدىكتىڭ ايەل-قىزدار سەكتورى جانىنداعى “ىقىلاس”  ەرىكتىلەر توبى ايەل ادامدارمەن بىرلەسە وتىرىپ، وڭىردەگى كوپبالالى وتباسىلار مەن مۇگەدەك جاندارعا، جالعىزباستى انالارعا جاردەم بەردى. وسى جولعى «جۇرەك جىلۋى» قايىرىمدىلىق جوباسى اياسىندا پاۆلودار قالاسىنداعى 40 وتباسىنا ازىق-تۇلىك پاكەتتەرى تاراتىلدى. ازىق-تۇلىكتى مۇقتاج جاندارعا مەشىت قىزمەتكەرلەرى مەن جاماعات وكىلدەرى جەتكىزىپ بەرگەن. جەتكىزىلگەن ءاربىر پاكەتتە: كۇنباعىس مايى، ءشاي، قانت، پياز، كارتوپ، ءسابىز، ۇن، ماكارون ونىمدەرى قامتىلعان.

پاۆلودار وبلىسىنداعى «جۇرەك جىلۋى» اكتسياسى وسى ۋاقىتقا دەيىن بەلسەندى تۇردە جۇمىستار اتقارىپ كەلەدى. ەلىمىزدەگى توتەنشە جاعداي اياقاتلعانشا اتالمىش شارا دا ءوز جالعاسىن تاپپاق.

وسىلايشا قازاقستان مۇسىلماندارى ءدىن باسقارماسىنىڭ توراعاسى، باس ءمۇفتي ناۋرىزباي قاجى تاعانۇلىنىڭ ۇيىتقى بولۋىمەن ەلىمىزدەگى توتەنشە جاعداي كەزىندە ءار وڭىردەگى الەۋمەتتىك جاعىنان از قامتىلعان وتباسىلار قايىرىمدىلىق شارالارىنىڭ شاراپاتىن كورۋدە.

Abai.kz