Reuters اگەنتتىگىنىڭ حابارلاۋىنشا، ءتورت كۇنگە سوزىلعان سوزىلعان كەلىسسوز اقش پرەزيدەنتى دونالد ترامپتىڭ قىسىمىمەن وتكەن. ول الەم نارىعىندا مۇناي باعاسىنىڭ قۇلدىراۋىن توقتاتقىسى كەلەدى.

مۇناي ەكسپورتتاۋشى ەلدەر 2022 جىلدىڭ ساۋىرىنە دەيىن مۇناي ءوندىرىسىن بىرتىندەپ ازايتۋعا كەلىستى. وسىلايشا مۇناي ءوندىرىسىن قىسقارتۋ تاريحىنداعى ەڭ ءىرى كەلىسىم جاسالدى - 2008 جىلعى داعدارىس كەزىندە جاسالعان كەلىسىممەن قىسقارتىلعان ءوندىرىس كولەمى بۇدان ءتورت ەسە از بولعان ەدى.

"وپەك+ ۇيىمىمەن ۇلكەن مۇناي كەلىسىمى جاسالدى. ول اقش-تىڭ ەنەرگەتيكا سالالارىندا ءجۇز مىڭداعان جۇمىس ورنىن ساقتاپ قالادى" دەپ جازدى ترامپ. اقش باسشىسى رەسەي پرەزيدەنتى ۆلاديمير پۋتين مەن ساۋد ارابياسىنىڭ كورولى سالمانعا ريزاشىلىعىن ءبىلدىردى.

كەلىسىمگە 23 ەل قول قويعان. بۇعان دەيىن وپەك+ ەلدەرى مۇناي ءوندىرىسىن تاۋلىگىنە 10 ملن باررەلگە دەيىن قىسقارتادى دەلىنگەن. الايدا مۇناي ەكسپورتتاۋشىلار 9,7 ملن باررەل دەپ كەلىسكەن، ويتكەنى مەكسيكا ۇستانىمىن وزگەرتۋدەن باس تارتىپ، 400 مىڭ باررەل كۆوتاعا كەلىسپەگەن.

يران مۇناي ءمينيسترىنىڭ حابارلاۋىنشا، "مەكسيكا مامىر جانە ماۋسىم ايلارىندا مۇناي ءوندىرىسىن تاۋلىگىنە 100 مىڭ باررەلگە قىسقارتادى. قالعان 300 مىڭ باررەلدى مەكسيكانىڭ ورنىنا اقش قىسقارتۋعا ۋادە بەردى".

وپەك+ ەلدەرى وكىلدەرىنىڭ كەلەسى ۆيدەوكونفەرەنتسياسى بيىل 10 ماۋسىمدا وتەدى.

Abai.kz